Bible utu ufila bulombodi buimpe
Katuedi meji ne: mapangadika atuangata neatupeteshe bipeta bimpe bituikala tuangata tulonda mutudi tuetu tumona malu anyi mudi bakuabu baamona to. Bible udi uleja bua tshinyi bidi nanku, uleja kabidi malu makuabu a bungi. Udi utuleja mua kutapulula tshidi tshimpe ne tshidi tshibi bua tuikale ne disanka.
BULOMBODI BUTUDI TUJINGA
Yehowa a Nzambi udi uleja mu Bible ne: bantu badi dijinga ne diambuluisha diende, kabena mua kudilombola to. (Yelemiya 10:23) Ke bualu kayi mmutupeshe mikenji ya malu a bikadilu mu Bible. Mmunange bantu ne mmusue kutuepula ku diangata mapangadika mabi atukebela ntatu ne tunyinganyinga. (Dutelonome 5:29; 1 Yone 4:8) Kupita bionso, bu mudiye Mufuki wetu, udi ne dimanya ne meji a bungi ne mmukumbane bua kutupesha mibelu mitambe buimpe ya malu a bikadilu. (Misambu 100:3; 104:24) Nansha nanku, Nzambi kena wenzejangana bua kutumikila mikenji yende to.
Yehowa wakapesha Adama ne Eva, mulume ne mukaji ba kumpala, bionso bivuabu nabi dijinga bua bikale ne disanka dilelela. (Genese 1:28, 29; 2:8, 15) Uvua mubelele kabidi mikenji mipepele ivuaye musue bua batumikile. Kadi bobu ke bavua ne bua kuyitumikila anyi kubenga kuyitumikila. (Genese 2:9, 16, 17) Bia dibungama, Adama ne Eva bakabenga kutumikila mikenji ya Nzambi ku bukole, kudielelabu yabu mikenji. (Genese 3:6) Ntshinyi tshiakenzeka? Lelu eu, bantu badiku ne disanka padibu benza tshidibu basue anyi? Nansha kakese. Mu kupita kua bidimu, tudi bamone ne: kubenga kutumikila mikenji ya Nzambi kakuena kupetesha ditalala ne disanka dilelela to.—Muambi 8:9.
Bible udi utupesha buludiki buimpe bua tuangate mapangadika mimpe nansha tuetu basombele muaba kayi anyi ba mu dîku kayi. (2 Timote 3:16, 17; tangila kazubu ka “ Mukanda wa bantu bonso.”) Tumonayi mudi Bible utupesha bulukidi abu.
Longa malu a bungi adi aleja bua tshinyi mbikumbane bua kubikila Bible ne: ‘n’Dîyi dia Nzambi.’—1 Tesalonike 2:13. Tangila filme wa Muena Bible nnganyi? mu jw.org.
BIBLE UDI ULEJA TSHIDI NZAMBI MUSUE BUA TUENZE
Bible udi uleja mutu Nzambi wenzela bantu malu katshia ku tshibangidilu. Malu adimu adi atuleja tshidi Nzambi umona ne: ntshibi anyi tshimpe, ne tshidi mua kutuambuluisha anyi kutuenzeja bibi. (Misambu 19:7, 11) Malongesha adimu atu anu ne mushinga bikondo bionso ne neatuambuluishe bua kuangata mapangadika mimpe dituku dionso.
Tshilejilu, mona mubelu udi mu Nsumuinu 13:20 eu: “Muntu udi wenda ne bena meji nealue muena meji, kadi muntu udi ubuelakana ne bantu batatakane neakenge.” Dîyi dinene edi ditshidi ne mushinga too ne lelu eu. Mu Bible mudi mibelu ya buena eyi ne mêyi manene adi atuambuluisha.—Tangila kazubu ka “ Mibelu ya mu Bible idi ne mushinga bikondo bionso.”
Kadi udi mua kudiebeja ne: ‘Mmunyi mundi mua kudijadikila ne: mibelu idi mu Bible itshidi ne mushinga too ne lelu?’ Tshiena-bualu tshialonda netshituleje muvua bantu benze nanku.
a Yehowa ke dîna dia Nzambi.—Misambu 83:18.
