Nzambi mmufuke mubidi wetu ne bukole bua dikema bua kudiondopa nkayawu. Bilondeshile tshibambalu kampanda tshia makanda a mubidi, muntu yeye mutapike anyi mufiondoke, mubidi “udi wenza mudimu mu mushindu wa dikema bua kumisha mputa nansha yeye munene anyi mukese.” (Johns Hopkins Medicine) Mubidi udi utuadija diakamue kuimanyika mashi adi apatuka, kudiundisha mijilu, kumisha mputa, ne kukolesha misunyi.

ELABI MEJI: Bu mudi Mufuki muenze mubidi wetu mu mushindu wa umisha mputa, katuenaku mua kuikala ne ditabuja mu malu adiye mutulaye bua kutuambuluisha bua kujikija kabidi tunyinganyinga tuetu anyi? Mufundi wa misambu wakafunda ne: “Yeye udi wondopa badi ne mioyo misunsuke; udi usuika mputa yabu.” (Misambu 147:3) Kadi wewe ne malu adi makushiye mu tunyinganyinga, tshidi mua kukujadikila ne: Yehowa neasuike mputa yebe mpindieu ne mu matuku atshilualua tshinyi?

Nzambi udi utulaya ne: “Kutshinyi to, bualu ndi nebe. Kupampakanyi to, bualu ndi Nzambi webe. Nenkukoleshe, eyowa, nenkuambuluishe.” (Yeshaya 41:10) Muntu udi mumanye ne: Yehowa udi umutabalela udi ne ditalala dia munda ne bukole bua kumanya mua kupita ne ntatu mishilashilangane. Mupostolo Paulo wakabikila ditalala dia munda edi ne: “ditalala dia Nzambi didi dipite dijingulula dionso dia malu.” Paulo wakamba kabidi ne: “Bua malu onso ndi ne bukole ku diambuluisha dia yeye udi umpesha bukole.”​—Filipoyi 4:4-7, 9, 13.

Bible udi utuambuluisha bua kuikala ne ditabuja mu malu adi Yehowa mulaye bantu kumpala eku. Tshilejilu, Buakabuluibua 21:4, 5 udi utuambila tshienzaye ne tshitudi tuitabila ne: neatshienze.

• “Neakupule tshinsonji tshionso” ku mêsu kua bantu. Yehowa neumbushe makenga etu onso ne tunyinganyinga tuetu tuonso, nansha malu adi amueneka bu adi kaayi ne mushinga kudi bantu bakuabu.

• Mukalenge Wa Bukole Buonso wa bifukibua bionso udi “musombe mu nkuasa wa bukalenge” mu butumbi bua mu diulu, neenze mudimu ne bukole ne bukokeshi biende bua kujikija makenga ne kutupesha diambuluisha ditudi tukengela.

• Yehowa udi utujadikila ne: milayi yende ‘nya lulamatu ne mmilelela.’ Mbuena kuamba ne: udi wangata lumu luende lua mudiye Nzambi mulelela bu tshijadiki tshia muakumbajaye milayi yende.

“‘Neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.’ Yeye udi musombe mu nkuasa wa bukalenge wakamba ne: ‘Tangilayi! Ndi ngenda mvuija bintu bionso bipiabipia.’ Udi wamba kabidi ne: ‘Funda, bualu mêyi aa nga lulamatu ne mmalelela.’”​—Buakabuluibua 21:4, 5.

Bufuki bua Nzambi ne Bible bidi bituleja bumuntu bua Tatu wetu wa mu diulu ne ngikadilu yende. Bufuki budi butubikila mu tshimuma bua tufike ku dimanya Nzambi bu Mulunda wetu wa pa muoyo, kadi Bible yeye udi utubikila buludiludi wamba ne: “Semenayi pabuipi ne Nzambi ne yeye neasemene pabuipi nenu.” (Yakobo 4:8) Bienzedi 17:27 udi wamba mudiye “kayi kule ne yonso wa kutudi.”

Paudi wangata dîba dia kumanya Nzambi neupete bijadiki bia bungi bidi bikuleja ‘mudiye ukutabalela.’ (1 Petelo 5:7) Ditabuja dia nunku kudi Yehowa didi mua kukuambuluisha mushindu kayi menemene?

Mona tshivua tshifikile Toru wa mu Japon. Mamuende uvua muena Kristo, kadi yeye wakabuela mu kampanza ka bayakuza, bangondavi ba mu ditunga adi. Udi wamba ne: “Mvua ngela meji ne: Nzambi uvua munkine, ne mvua mmona ne: lufu lua bantu bamvua mumanye, nangananga lua bamvua mutambe kunanga, luvua dinyoka dia kudi Nzambi.” Toru udi wamba ne: bu muvuaye musombele muaba udi munyanguke bikole ne muwule tente ne malu mabi eu, wakalua “muntu wa muoyo mubi, ne makenga a bantu bakuabu kaavua amuambila bualu to.” Bua bipatshila biende, udi wamba ne: “Mvua musue kufua muana panyima pa meme mumane kushipa muntu kampanda muende lumu kumpita bua bashale bantumbisha meme.”

 Kadi pavua Toru ne mukajende Hannah balonge Bible, Toru wakashintuluka mu mushindu wa dikema! Hannah udi wamba ne: “Mvua mudimuene ne anyi abidi muvua bayanyi wenda ushintuluka.” Toru udi wamba mpindieu kayi udia tshibanga ne: “Kudi Nzambi udi bushuwa utabalela yonso wa kutudi. Ki mmusue bua muntu afue to, kadi mmusue bua kubuikidila bonso badi banyingalala bua bilema biabu ne muoyo umue. Udi uteleja malu atudi katuyi mua kuambila muntu mukuabu anu yeye ne adi muntu mukuabu kayi mua kumvua. Mu matuku makese emu, Yehowa neumbushe ntatu yonso, ne makenga, ne tunyinganyinga. Nansha mpindieu udi utuambuluisha mu mishindu itudi katuyi belele meji. Mmutunange ne udi utuambuluisha patudi bapuekeshibue.”​—Misambu 136:23.

Anu muvua tshivua tshifikile Toru tshileja, kumanya ne: Nzambi udi ne bukole bua kumbusha ntatu yonso ne kukupula tshisonji tshionso, ne ukadi pa kuenza nanku, kudi kutupesha ditekemena dilelela bua matuku atshilualua, kutupetesha kabidi nsombelu muimpe mpindieu. Bushuwa, nansha mudiku lelu makenga matule mapuwe, Yehowa udi mua kukutabalela ne dinanga.