Katshia Nzambi wafuka bantu, mmuyukile nabu ku diambuluisha dia bangelu ne dia baprofete. Uvua muenze kabidi bua bantu bafunde mêyi ende ne milayi yende. Nzambi mmulaye ne: netupete nsombelu wa disanka mu matuku atshilualua. Mpindieu, mmuaba kayi utudi mua kupeta milayi ya Nzambi eyi lelu?

Mêyi adi Nzambi utuambila adi mu Mifundu minsantu. (2 Timote 3:16) Ntshinyi tshivua Nzambi muenze bua baprofete kufundabu mêyi ende? (2 Petelo 1:21) Nzambi uvua mubueje ngenyi yende mu mitu ya bafundi, bobu pabu kuyifundabu. Tuangatabi tshilejilu. Mfumu wa mudimu yeye muambile sekretere wende bua kufunda mukanda, ngenyi idi mu mukanda ayi nya mfumu wa mudimu au. Bia muomumue, nansha muvua Nzambi musake bantu bua kufunda mêyi ende, yeye ke muena Mifundu minsantu.

Mêyi a Nzambi adi ne mushinga wa bungi, bualu Nzambi mmusue bua bantu bonso baabale ne bawumvue. Lelu “lumu luimpe lua tshiendelele” lua Nzambi ludi lumvuika kudi ‘tshisamba tshionso, tshisa tshionso, ne muakulu wonso.’ (Buakabuluibua 14:6) Nzambi mmuenze bua ne: kuikale mukanda udi ne Mifundu ya tshijila mujima anyi tshitupa tshiawu mu miakulu mipite pa 3 000. Kakuena mukanda udi mu miakulu mipite bungi nunku pa buloba lelu to.