Nzambi wakapesha bantu dipa dia pa buadi, mmumue ne: bukokeshi bua kuyukila nende ne kumukuatshila yabu ya munda ku diambuluisha dia disambila. Muprofete Davidi wakasambila ne: “Wewe Muteleji wa disambila, bantu ba mishindu yonso nebalue kuudi.” (Misambu 65:2) Kadi mmunyi mutudi mua kusambila bua Nzambi atuteleje ne atubeneshe?

Masambila audi wenza neakuambuluishe bua kupumuna muoyo webe kumpala kua Nzambi, mmumue ne: kumukuatshila yebe ya munda. (Misambu 62:8) Wa Bukole Buonso mmunange kuteleja masambila menza ne muoyo mujima.

Nansha mudi Nzambi ne mianzu ya bungi, udi ne dîna anu dimue dia nsungansunga. Yeshaya 42:8 udi wamba ne: “Meme ndi Yehowa. Adi ndîna dianyi.” Dîna dia Yehowa didi disanganyibua mu Mifundu ya tshijila misangu mitue ku 7 000. Baprofete ba bungi bavua babikila Nzambi mu dîna diende dia nsungansunga. Abalahama wakamba ne: “Mfuila koku luse Yehowa, . . . anyisha bua ntungunuke ne kuakula [nebe].” (Genese 18:30) Tuetu petu tudi ne bua kubikila Nzambi mu dîna diende dia Yehowa patudi tusambila.

Nzambi mmumanye meji etu ne mushindu utudi tudiumvua nansha tuetu tuakula muakulu kayi. Dîyi diende didi ditujadikila ne: “Nzambi kena ne kansungansunga to, kadi udi witaba muntu wa mu tshisamba tshionso udi umutshina ne udi wenza malu makane.”​—Bienzedi 10:34, 35.

Nansha nanku, bua Nzambi kutubeneshaye, bidi bikengela tukumbaje malu makuabu pa kumbusha disambila. Mu biena-bualu bidi bilonda, netumone malu atudi ne bua kukumbaja au.