Patudi tubala muyuki wa bufuki mu mukanda wa mu Bible wa Genese, tudi tumona ne: Nzambi wakambila muntu wa kumpala Adama ne: ‘Udi mua kudia mamuma a mitshi yonso ya mu budimi, bu muudi musue; kadi mamuma a mutshi wa lungenyi lua kujingulula malu mimpe ne malu mabi kuadi nansha; bualu bua mu dituku diudi uadia wewe neufue bulelela.’ (Genese 2:16, 17) Mukenji eu udi uleja bimpe patoke ne: bu Adama mutumikile mukenji wa Nzambi eu, kavua mua kuikala mufue to, kadi uvua ne bua kutungunuka ne kuikala ne muoyo mu budimi bua Edene.

Diakabi, pamutu pa Adama kusungula bua kutumikila Nzambi ne kushala ne muoyo kashidi, wakasungula yeye bua kubenga kutumikila mukenji wa Nzambi, kudiaye tshimuma tshikandika pavua mukajende Eva mumupeshatshi. (Genese 3:1-6) Tutshidi ne bipeta bibi bia dibenga kutumikila adi too ne lelu. Mupostolo Paulo wakumvuija bualu ebu mu mushindu eu: “Bu muakalua bubi pa buloba bua muntu umue, ne lufu lulue bua bubi abu, nunku lufu luakakuata bantu bonso, bualu bantu bonso bakenza bubi.” (Lomo 5:12) “Muntu umue” udibu bakuila muaba eu ng’Adama. Kadi bubi buvuabu benze buvua bubi kayi? Bua tshinyi buvua bufikishe ku lufu?

Bubi buvua Adama muenze buvua bua kubenga kutumikila ku bukole mukenji wa Nzambi anyi kuushipa ku bukole. (1 Yone 3:4) Tshibawu tshia bubi ndufu anu bu muvua Nzambi muambile Adama. Bu Adama ne bana bavuaye mua kulela batungunuke ne kutumikila mukenji wa Nzambi, kabavua mua kuikala ne bubi ne kabavua mua kuikala bafua to. Nzambi kavua mufuke bantu bua bikale bafua to, kadi mbua bikale ne muoyo, bushuwa, muoyo wa kashidi.

Katuena mua kuela mpata ne: lufu ‘ndukuate bantu bonso’ anu bu mudi Bible muambe. Kadi kudiku tshitupa  kampanda munda muetu tshidi tshitungunuka ne kuikala ne muoyo patudi tufua anyi? Bantu ba bungi badi mua kuandamuna ne: eyowa, kudi tshitupa kampanda munda muetu tshidibu babikila ne: anyima tshidi katshiyi tshifua to. Kadi kuamba nunku kudi kuleja ne: Nzambi uvua mushime Adama. Mushindu kayi? Bualu koku tshitupa kampanda tshidi tshitungunuka ne kuikala ne muoyo muaba mukuabu patudi tufua, dîba adi lufu kaluvua mua kuikala tshibawu tshia bubi bu muvua Nzambi muambe to. Bible udi wamba ne: ‘Nzambi kena mua kushima.’ (Ebelu 6:18) Mu bulelela, Satana ke uvua mushime pavuaye muambile Eva ne: “Kanuena nufua bulelela.”​—Genese 3:4.

Bualu ebu budi bujula lukonko elu: Bikala dilongesha dia ne: anyima kena ufua dimanyine pa dishima, nunku mu bulelela, ntshinyi tshidi tshienzeka padi muntu ufua?

Muyuki wa bufuki wa mu Genese udi wamba ne: “Yehowa Nzambi wakabanga kuenza muntu ne lupuishi lua buloba, kuelaye mupuya wa muoyo mu mimpempe yende, ne yeye eu kuluaye muntu wa muoyo.” Tshiambilu tshia ne: “muntu wa muoyo” ntshifumine ku muaku wa mu tshiena Ebelu wa nephesh. * Muaku eu udi umvuija ku muaku ku muaku ne: “Tshifukibua tshidi tshipuyakana.”​—Genese 2:7, NWT; dimanyisha kuinshi kua dibeji.

Nunku Bible udi uleja patoke ne: bantu ki mbafukibue ne anyima udi kayi ufua to. Kadi yonso wa kudibu udi “muntu wa muoyo.” Ke bualu kayi udi mua kukeba ne muoyo webe mujima, kuakupeta mvese nansha umue mu Bible udi wakula bua “anyima udi kayi ufua.”

Bu mudi Bible kayi wamba ne: muntu udi ne tshintu tshidibu babikila ne: anyima udi kayi ufua, bua tshinyi bitendelelu bia bungi bidi bilongesha ne: anyima kena ufua? Bua kupeta diandamuna tualukile mu Ejipitu wa kale.

Hérodote, mumanyi wa malu a kale muena Greke wa mu bidimu bia 400 kumpala kua Yezu,  wakamba ne: bena Ejipitu ke bavua “bantu ba kumpala bavua bimanyina dilongesha dia ne: anyima kena ufua.” Bena Babilona ba kale bavua pabu ne dilongesha dia ne: anyima kena ufua, kadi kabayi batamba kuimanyinapu to. Tshikondo tshivua Alexandre Munene mukuate Moyen-Orient mu 332 kumpala kua Yezu, bena nkindi bena Greke bakavua babueje dilongesha edi mu bantu bikole, ne mu matuku makese diakatangalaka mu tshitupa tshionso tshivua bena Greke bakokesha.

Mu bidimu lukama bia kumpala, tusumbu tubidi tumanyike tua mu tshitendelelu tshia bena Yuda, mmumue ne: kasumbu ka bena Essene ne ka Bafalese, tuvua tulongesha ne: anyima udi utungunuka ne kuikala ne muoyo padi mubidi ufua. Mukanda kampanda udi wamba ne: “Bena Yuda bakapeta dilongesha dia ne: anyima kena ufua pavuabu batuilangane ne lungenyi lua bena Greke ne nangananga malongesha a nkindi a Platon.” (The Jewish Encyclopedia) Bia muomumue, Josèphe mumanyi wa malu a kale wa mu bidimu lukama bia kumpala wakamba muvua dilongesha edi kadiyi difumine mu Bible, kadi difumine ku “malongesha a bantu ba mu Grese” avuaye umona bu nsangilu wa mianu ya kudi bedi babu ba mianu.

Bu muvua bibidilu bia bena Greke bitungunuka ne kumuangalaka, bantu bavua badiamba muvuabu bena Kristo bakitaba pabu dilongesha dia dishima edi. Bilondeshile mumanyi wa malu a kale Jona Lendering, “lungenyi lua Platon lua ne: kumpala anyima wetu uvua muaba muimpe kadi mpindieu udi muaba munyanguke luakenza bua bikale bipepele bua kutuangaja dilongesha dia nkindi dia Platon ne buena Kristo.” Nunku tshitendelelu tshivua tshidiamba muditshi tshia bena Kristo tshiakitaba dilongesha dia dishima dia ne: anyima kena ufua, ne dilongesha edi diakalua dimue dia ku malongesha atshi manene.

Mu bidimu lukama bia kumpala, mupostolo Paulo wakafila didimuija edi: “Dîyi diamba ku nyuma didi diamba patoke ne: mu bikondo bialua, bantu bakuabu nebalekele ditabuja, bateleja mêyi adi apambuisha mamba kudi nyuma mibi, ne malongesha a bademon.” (1 Timote 4:1) Mêyi aa avua bushuwa makumbane! Dilongesha dia dibenga kufua dia anyima ndimue dia ku “malongesha a bademon.” Kadiena mu Bible to, kadi ndituadijile mu bitendelelu bia kale bia bampangano ne mu malongesha a nkindi.

Diakalenga buetu tuetu, Yezu wakamba ne: “Nenumanye bulelela, ne bulelela nebunupeshe budikadidi.” (Yone 8:32) Patudi tupeta dimanya dijalame dia bulelela bua mu Bible, tudi tupeta budikadidi ku malongesha adi apendesha Nzambi ne ku bilele bidi bitendelelu bia bungi bia pa buloba bujima bimanyina. Bulelela bua mu Dîyi dia Nzambi budi kabidi butupesha budikadidi ku bupika bua bilele ne bitabataba bidi bisuikakaja ku tshilumbu tshia lufu.​—Tangila kazubu ka ne: “ Bafue badi penyi?”

Mufuki wetu kavua mufuke bantu bua bikale balala pa buloba anu bidimu 70 anyi 80 ne pashishe baya kutungunuka ne muoyo muaba mukuabu bua kashidi to. Nzambi uvua mulongolole ku ntuadijilu bua bantu bavuaye mufuke basombe pa buloba apa kashidi bu bana bende badi bamutumikila. Dilongolola dinene edi didi dileja mudi Nzambi munange bantu, ne kakuena muntu udi mua kudipangisha bua kukumbanadi to. (Malaki 3:6) Bidi bitukolesha ku muoyo patudi tubala mêyi a mufundi wa Misambu aa: ‘Bantu bakane nebapiane buloba, nebashikamemu tshiendelele.’​—Misambu 37:29.