PAVUA mazuwa aya masemene kumpala mu mavuala a mâyi manene a Atlantike matangile ku Mputu, umue wa ku bena ngendu, diende George Young, wakavuluka ne disanka malu avuaye muenze bua Bukalenge mu Brésil. * Kadi mpindieu, udi utuma meji ende ku mudimu wende mupiamupia uvuaye ne bua kuenza mu Espagne ne mu Portugal, miaba ivuabu kabayi banji kuyisha. Diakamue padiye ufikamu, udi ulongolola malu bua muanetu Rutherford alue kuenza miyuki, ne bua kuabanya trakte binunu 300!

Pakafika muanetu Young mu Lisbonne mu 1925, wakapeta ditunga mu kayumbayumba. Bena mu ditunga bakajula tshimvundu mu 1910, kubengabu bua kabikadi babakokesha kabidi kudi bantu ba mu dîku dimue, ne kupangishabu tshitendelelu tshia Katolike bua kuikala ne dîyi mu ditunga adi. Bantu bakapeta budikadidi bua bungi, kadi nsombelu kavua anu muanji kuakana to.

Patshivua muanetu Young ulongolola malu bua muyuki wa muanetu Rutherford, bakasua kutonkola bukalenge buvua mu nkuasa. Ke mbulamatadi kutekaye ditunga ku bukokeshi bua basalayi. Mufundi kampanda wa Kumpanyi wa bena Grande-Bretagne ne wa ku babende wa Bible wakambila muanetu Young ne: uvua ne bua kupeta buluishi bua bungi. Nansha nanku, muanetu Young wakalomba dianyisha bua miyuki yenzekele mu nzubu wa dibidija mubidi wa tulasa tua bikadilu tua Camões, kumuitabilabu!

Dituku dia 13/5 divua muanetu Rutherford ne bua kuenza muyuki diakafika. Divua dindila ne muoyo kuulu kuulu! Muyuki au uvua ne tshiena-bualu ne: “Mua kusomba kashidi pa buloba.” Bavua batshifunde pa bibayabaya ne mu bikandakanda. Baluishi betu ba mu bitendelelu bikuabu bakaya kupatula ne lukasa tshiena-bualu kampanda mu bikandakanda biabu tshivua tshidimuija bantu bua difika dia “baprofete ba dishima.” Bakimana ku tshiibi tshia nzubu wa dibidija mubidi au, kuabanyabu broshire binunu ne binunu ivua ne malu avua abenga malongesha a muanetu Rutherford.

Nansha nanku, bantu batue ku 2 000 bakuwula tente mu nzubu au, bakuabu bungi bumue abu bakapanga kubuelamu bualu mukavua mupate. Bamue bateleji bavua babande ku bibandilu bia nshinga, bakuabu babande pa bintu bia mu nzubu amu.

Malu onso kaavua mapitakane bimpe to. Baluishi bakela mbila, kutshibulabu nkuasa. Kadi muanetu Rutherford wakashala mupuwe, kubandaye bitekete bitekete pa mêsa bua bantu bamuteleje bimpe. Pakajikijaye, pabuipi ne mundankulu, bantu bapite pa 1 200 bakafila mêna abu ne miaba ivuabu basombele bua bapete mikanda yetu. Dituku diakalonda, tshikandakanda tshia O Século tshiakakula bua muyuki wa muanetu Rutherford.

Mu ngondo wa 9/1925, Tshibumba tshia Nsentedi tshia mu Tshimputulukeshi tshiakatuadija kupatuka  mu Portugal. (Tshikavua tshituadije kupatuka mu Brésil.) Bu mu tshikondo atshi, Virgílio Ferguson, mulongi wa Bible uvua musombele mu Brésil, wakatuadija kudilongolola bua kuya kusombela mu Portugal bua kuyisha lumu luimpe. Kumpala, uvua muenze mudimu ne muanetu Young mu Brésil mu Betele mukese wa Balongi ba Bible. Virgílio ne mukajende bakenza luendu diakamue bua kuya kutuilangana kabidi ne muanetu Young. Muanetu Ferguson uvua mufike dîba dimpe bualu muanetu Young ukavua pa kuya kuyisha miaba mikuabu too ne mu Union soviétique.

Pavua basalayi batonkole bukalenge buvua mu nkuasa, bakaluisha mudimu wetu bikole. Muanetu Ferguson wakashala anu mu ditunga amu ne dikima dionso, kuenzaye malu bua kukuba kasumbu kakese ka Balongi ba Bible ne bua kuvudija mudimu wabu. Wakalomba dianyisha bua bikale benzela bisangilu mu nzubu muende. Bakamuanyishila mu ngondo wa 10/1927.

Mu tshidimu tshia kumpala tshia butshikokesha nkaya atshi, bantu batue ku 450 mu Portugal bakafila mêna abu bua bikale bapeta Tshibumba tshia Nsentedi. Bualu bukuabu, ku diambuluisha dia trakte ne broshire, dîyi dia bulelela diakamuangalaka too ne miaba ya kule ivua ku bukokeshi bua Portugal, bu mudi mu Açores, mu Angola, mu Cap-Vert, mu Goa, mu Madère, mu Mozambique, ne mu Timor-Oriental.

Mu 1929, tshidime kampanda mupuekele wa mu Portugal, diende Manuel da Silva Jordão, wakaya kusombela mu Lisbonne. Pavuaye mu Brésil, wakateleja muyuki wa patoke uvua muanetu Young muenze. Wakajingulula musangu umue bulelela, kupetaye dijinga dia kuambuluisha muanetu Ferguson bua kuvudija mudimu wa kuyisha. Bua bualu abu, Manuel wakalua kolportere (lelu mpanda-njila). Bu muvuabu balongolole malu bimpe bua kupatula mikanda yetu ne kuyabanya, tshisumbu tshipiatshipia tshia mu Lisbonne tshiakadiunda!

Mu 1934, muanetu Ferguson ne mukajende bavua ne bua kupingana mu Brésil, bobu kuya. Nansha nanku, bakavua bakune ntete ya bulelela. Kasumbu ka Bantemu ba mu Portugal kakashala ne lulamatu kudi Yehowa mu bikondo bikole bia mvita ya bena mu Espagne ne Mvita mibidi ya buloba bujima. Bakafuanangana ne makala a kapia, kadi mu 1947, kapia ka kasumbu aka kakatema bikole pavua misionere wa kumpala wa ku Gilada, John Cooke, mufikamu. Pashishe, bungi bua bamanyishi ba Bukalenge buvua anu buenda buvula. Too ne pavua mbulamatadi mukandike midimu ya Bantemu ba Yehowa mu 1962, bamanyishi bavua bavula anu kuvula. Pakanyishilabu Bantemu ba Yehowa bua kuenza midimu yabu mu ngondo wa 12/1974, bungi bua bamanyishi buvua bupite pa binunu 13 mu ditunga dijima.

Lelu, bamanyishi ba Bukalenge bapite pa binunu 50 badi bayisha lumu luimpe lua Bukalenge bua Nzambi mu Portugal ne mu bidiila bia bungi mudibu bakula Tshimputulukeshi, bayisha too ne mu Açores ne mu Madère. Mu bamanyishi aba mudi ndelanganyi ya bamue ba ku bantu bavua bateleje muyuki wa katshia ne katshia wa muanetu Rutherford mu 1925.

Tudi tuela Yehowa tuasakidila, tuela ne bena Kristo netu ba kumpala ba lulamatu bavua batunzuluile njila ne dikima dionso bua mudimu wa buambi, badi bu ‘bena mudimu ba Kristo Yezu kudi bantu mu bisamba bikuabu.’​—Lomo 15:15, 16.​—Mu bintu bietu bia kale mu Portugal.