1. Bua tshinyi kudi misangu itudi mua kumvua buôwa?

 KUTU misangu itu muntu yonso eu umvua buôwa. Kadi patudi balonge Bible katutshiena ne buôwa bua bafue, bua malu a mîdima anyi bua tshiatufikila to. Kadi tudi mu tshikondo tshia “malu adi akuatshisha buôwa,” bu mudi mvita, tshikisu ne masama. (Luka 21:11) Tudi mua kutshina kabidi bantu, mbulamatadi idi itukengesha anyi mene bena mu dîku dietu badi batuluisha bua ntendelelu wetu. Bamue badi basamisha mutu bualu mbamone ne: ki mbakumbane bua kutantamena lutatu ludibu nalu mpindieu anyi pamuapa luabakuata mu matuku atshilualua to.

2. Umvuija nsombelu uvua nende Davidi pavuaye mu tshimenga tshia Gata.

² Davidi wakumvua pende buôwa. Tshilejilu, pavua mukalenge Shaula ukeba kumushipa, wakanyemena mu tshimenga tshia Gata tshia bena Peleshete. Akisha mukalenge wa Gata wakalua kumanya ne: Davidi uvua tshilobo tshia mvita tshivuabu batumbisha mu musambu bua muvuaye mushipe bena Peleshete ‘makumi a binunu.’ Davidi ‘wakumvua buôwa bua bungi bua bualu abu.’ (1 Sam. 21:10-12) Wakatuadija kusamisha mutu bua tshivua mukalenge Akisha mua kumuenzela. Mmunyi muvua Davidi mutshimune buôwa?

3. Bilondeshile Misambu 56:1-3, 11, mmunyi muvua Davidi mutshimune buôwa?

³ Mu Misambu 56, Davidi wakaleja muvuaye umvua mu tshimenga tshia Gata. Mu musambu au Davidi udi uleja bua tshinyi uvua mumvue buôwa ne muvuaye mufike ku dibutshimuna. Pavua Davidi ne buôwa, wakeyemena Yehowa. (Bala Misambu 56:1-3, 11.) Dimueyemena diende kadiakedibua mâyi ku makasa to. Yehowa wakamuambuluisha bua kupeta lungenyi luimpe  lua tshia kuenza. Wakadishiya bu mupale. Akisha wakamona Davidi bu muntu tshianana pamutu pa kumumona bu muntu uvua umuenza buôwa, ke Davidi kupeta mushindu wa kunyema.—1 Sam. 21:13–22:1.

4. Mmunyi mutudi mua kueyemena Yehowa bikole? Fila tshilejilu.

⁴ Tuetu beyemene Yehowa, netudiate petu buôwa. Kadi mmunyi mutudi mua kueyemena Yehowa bikole nangananga tshikondo tshitudi ne buôwa? Tshilejilu, bobu bakuambile ne: udi ne disama; udi mua kuanji kumvua buôwa. Nansha nanku udi mua kujikija buôwa abu wewe mueyemene doktere. Pamuapa ukadi muondope babedi ba bungi bavua ne disama diebe adi. Udi mua kukuteleja ne ntema yonso, ukujadikila ne: mmumanye muudi udiumvua. Udi mua kukupesha buanga buvuaye muondope nabu bantu bakuabu. Bia muomumue, bua tuetu kueyemena Yehowa bikole, mbimpe tuetu kukonkonona malu akadiye mutuenzele, adiye utuenzela ne aluaye kutuenzela. Ke tshivua Davidi muenze. Patudi tuenda tukonkonona mêyi avuaye muambe ku bukole bua nyuma muimpe adi mu Misambu 56, ela pebe meji a muudi mua kueyemena Yehowa bikole ne kudiata buôwa.

NTSHINYI TSHIKADI YEHOWA MUTUENZELE?

5. Davidi uvua muelangane meji a malu kayi bua kushisha kutshimuna buôwa? (Misambu 56:12, 13)

⁵ Pavua muoyo wa Davidi mu njiwu, wakatuma meji ende ku malu akavua Yehowa muenze. (Bala Misambu 56:12, 13.) Wakenza nanku mu nsombelu wende mujima. Tshilejilu, kudi misangu ivuaye welangana meji a midimu ya kukema ya Yehowa, ivua imuvuluija mudiye wa Bukole Buonso ne mudiye utabalela bantu. (Mis. 65:6-9) Uvua muelangane kabidi meji a malu akavua Yehowa muenzele bakuabu. (Mis. 31:19; 37:25, 26) Kadi wakelangana kabidi meji nangananga a malu akavua Yehowa mumuenzele yeye muine. Yehowa uvua mukube Davidi, mumuambuluishe katshia ku buana buende. (Mis. 22:9, 10) Elabi meji a muvua kuelangana meji a malu au kuambuluisha Davidi bua kueyemena Yehowa bikole!

6. Tuetu bumvue buôwa, ntshinyi tshiatuambuluisha bua kueyemena Yehowa bikole?

⁶ Paudi umvua buôwa, diebeja ne: ‘Ntshinyi  tshikadi Yehowa muenze?’ Ela meji a bidiye mufuke. Tshilejilu, patudi ‘tutangila bimpe’ mudi Yehowa utabalela nyunyi ne bilongo bidi kabiyi nansha bifukibue mu tshimfuanyi tshiende, bidi kabiyi nansha mua kumutendelela, netumueyemene bikole batuishibue ne: neatutabalele petu. (Mat. 6:25-32) Konkonona kabidi malu akadi Yehowa muenzele batendeledi bende. Pamuapa udi mua kulonga bilejilu bia mu Bible bia bantu bavua ne ditabuja dikole anyi udi mua kubala malu a batendeledi ba Yehowa ba lelu. a Bualu bukuabu, elangana meji a mukadi Yehowa mukuambuluishe wewe muine. Mmunyi muvua Yehowa mukukoke mu bulelela? (Yone 6:44) Mmunyi muvuaye muandamune masambila ebe? (1 Yone 5:14) Mulambu wa muanende munanga uvuaye mufile udi ukupetesha malu kayi mimpe dituku dionso edi?—Ef. 1:7; Eb. 4:14-16.

7. Mmunyi muvua malu avua mafikile muprofete Danyele mambuluishe Vanessa bua kutshimuna buôwa?

⁷ Vanessa, b muanetu wa bakaji wa mu Haïti wakapeta nsombelu uvua umukuatshisha buôwa. Muntu mukuabu wa mu musoko wabu uvua umubikila ku telefone, umufundila mesaje dituku dionso, umusuya bua amunange. Vanessa wakamuambila kayi udia tshibanga ne: kavua musue to. Kadi muntu au wakatuadija kumukanyina, umufunyina bua kumuenzela bibi. Vanessa udi wamba ne: “Ngakumvua buôwa.” Mmunyi muvuaye mutshimune buôwa? Uvua muenze malu kampanda bua kudikuba. Mukulu mukuabu wakamuambila bua ambile bena mbulamatadi bualu abu. Kadi uvua mutume meji ende ku mushindu uvua Yehowa mukube batendeledi bende ba kale. Udi wamba ne: “Muntu wa kumpala umvua muelele meji, mmuprofete Danyele. Bavua bamuele mu buina bua ntambue ivua ne nzala nansha muvuaye kayi muenze bualu. Kadi Yehowa wakamuambuluisha. Ngakalomba Yehowa bua atangile tshilumbu tshianyi atshi. Pashishe buôwa bumvua nabu buakajika.”—Dan. 6:12-22.

NTSHINYI TSHIDI YEHOWA WENZA MPINDIEU?

8. Davidi uvua mutuishibue bua bualu kayi? (Misambu 56:8)

⁸ Nansha muvua Davidi mu njiwu ya lufu mu tshimenga tshia Gata, kavua mulekele buôwa bumutshibuila panshi to. Kadi wakateta kujingulula tshivua Yehowa wenda umuenzela tshikondo atshi. Wakamanya ne: Yehowa uvua wenda umulombola, umukuba ne uvua mumanye muvuaye udiumvua. (Bala Misambu 56:8.) Davidi uvua kabidi ne balunda bu mudi Yonatana ne muakuidi munene Ahimeleke bavua bamuambuluishe bimpe ne lulamatu luonso. (1 Sam. 20:41, 42; 21:6, 8, 9) Nansha muvua mukalenge Shaula ukeba kushipa Davidi, wakanyema. Uvua mutuishibue ne: Yehowa mmumanye lutatu luende bimpe ne muvuaye udiumvua bua lutatu alu.

9. Ntshinyi tshidi Yehowa utangila kudi yonso wa kutudi?

⁹ Wewe mutuilangane ne lutatu ludi lukuenza buôwa, vuluka ne: Yehowa mmumanye lutatu alu ne muudi udiumvua. Tshilejilu, Yehowa uvua mumanye malu mabi avua bena Ejipitu benzela bena Isalele ne ‘makenga avuabu nawu.’ (Ekes. 3:7) Davidi wakimba ne: Yehowa mmumanye “lutatu luanyi” ne “dikenga dianyi dikole.” (Mis. 31:7) Pavua bantu ba Nzambi bakenga bua mapangadika abu mabi a butatakane, Yehowa “uvua ukenga pende.” (Yesh. 63:9) Wewe ne buôwa, manya ne: Yehowa mmumanye muudi udiumvua ne udi uzuka bua kukuambuluisha bua ubutshimune.

10. Bua tshinyi udi mutuishibue ne: Yehowa neakutabalele ne neakuambuluishe bua kutantamena lutatu kayi luonso?

 ¹⁰ Udi mua kudiebeja ne: Kadi Yehowa neangambuluishe mushindu kayi pandi mu lutatu? Mulomba akuambuluishe bua umone mudiye ukukuatshisha. (2 Bak. 6:15-17) Pashishe diebeja ne: Muyuki anyi diandamuna didibu bafile mu bisangilu mbinkoleshe anyi? Mukanda, filme anyi musambu wa pa buawu munkankamije anyi? Kudiku muntu mundondele bualu buimpe anyi mumbadile mvese anyi? Pamuapa tudi mua kupua muoyo ne lukasa mudi bana betu batunange ne mudi mvese mimpe ya mu Bible mituambuluishe. Pabi mmapa mimpe a pa buawu a kudi Yehowa. (Yesh. 65:13; Mâko 10:29, 30) Mapa au ntshijadiki tshia ne: Yehowa udi ututabalela. (Yesh. 49:14-16) Adi aleja kabidi mudi Yehowa mukumbane bua wewe kumueyemena.

11. Ntshinyi tshivua tshiambuluishe Aida bua kudiata buôwa?

¹¹ Aida wa mu ditunga dia Sénégal uvua mumone muvua Yehowa mumuambuluishe pavuaye mu lutatu. Bu muvuaye muanabute, baledi bende bavua batekemene ne: neapete makuta makumbane bua kudiambuluisha ne kubambuluisha pabu. Kadi yeye mumane kuakaja malu bua kulua mpanda-njila, uvua ne tukuta tukese. Bena mu dîku diende bakamufiikila munda kutuadijabu kumuamba. Udi wamba ne: “Mvua ne buôwa bua ne: tshiakukumbana bua kuambuluisha baledi banyi ne bantu bonso kabakuntshuka to. Ngakela too ne Yehowa tshilumbu pambidi bua muvuaye mulekele malu enda anyanguka.” Dituku dikuabu divuaye muye mu bisangilu, wakamba ne: “Muanetu uvua muele muyuki wa katuvuluija ne: nansha tuetu batapike ku muoyo mushindu kayi, Yehowa mmumanye mputa yetu. Ku kakese ku kakese mibelu ivua bakulu ne bana betu bakuabu bampesha, yakanjadikila ne: Yehowa mmunange. Ngakatuadija kusambila kabidi Yehowa ne dieyemena dionso. Pamvua mmona wandamuna masambila anyi ngakapeta ditalala dia mu muoyo.” Aida wakapeta mudimu uvua umuambuluisha bua kukumbaja majinga ende ne kuambuluisha baledi bende ne bantu bakuabu. Udi wamba ne: “Ndi mufike ku dilonga ne: mbimpe  kueyemena Yehowa ne muoyo mujima. Mpindieu pandi nsambila, buôwa buanyi butu anu bujika.”

NTSHINYI TSHIALUA YEHOWA KUENZA?

12. Bilondeshile Misambu 56:9, Davidi uvua mutuishibue bua bualu kayi?

¹² Bala Misambu 56:9. Mvese eu udi uleja mushindu mukuabu uvua Davidi mufike ku ditshimuna buôwa. Nansha mutshivua muoyo wende mu njiwu, wakelangana meji a malu avua Yehowa ne bua kulua kumuenzela. Uvua mumanye ne: Yehowa neamusungile mu tshikondo tshiakane. Nansha nanku Yehowa uvua muambe ne: Davidi neikale mukalenge wa Isalele. (1 Sam. 16:1, 13) Davidi uvua mumanye ne: tshionso tshivua Yehowa wamba tshivua ne bua kukumbana.

13. Tudi ne bua kutuishibua ne: Yehowa neatuenzele malu kayi?

¹³ Yehowa mmulaye bua kukuenzela tshinyi? Katuena tutekemena bua atukube ku ntatu yonso mu tshishima to. c Kadi nansha wewe mutuilangane ne ntatu ya mushindu kayi mu bulongolodi bubi ebu, Yehowa neayijikije yonso mu bulongolodi bupiabupia. (Yesh. 25:7-9) Mufuki wetu udi ne bukole bua kujula bafue, bua kutuondopa, ne bua kubutula baluishi betu bonso.—1 Yone 4:4.

14. Tudi mua kuelangana meji bua malu kayi?

¹⁴ Wewe umvua buôwa, elangana meji a tshialua Yehowa kuenza. Ela meji a muumvua pabutulabu Satana ne benji ba malu mabi, kadi bashiya benji ba malu mimpe, ne pikala dipanga bupuangane dienda dijika ku kakese ku kakese. Malu avua mu programe wa mpungilu wa rejon wa 2014 avua aleja mutudi mua kuelangana meji a ditekemena dietu. Bavua balejamu mudi tatu ne bena mu dîku diende mua kubala mêyi a mu 2 Timote 3:1-5 mu mushindu mukuabu bu biobi ne: mvese ayi idi yakula muikala nsombelu mu Mparadizu. Bavua mua kuyibala ne: “Mu bulongolodi bupiabupia nekuikale bikondo bimpe bia disanka, bualu bantu nebikale banangi ba bantu bakuabu, bangata malanda abu ne Yehowa ne mushinga, bamanye mikalu yabu, bena budipuekeshi, batumbishi ba Nzambi, batumikila baledi babu, bena dianyisha, bena lulamantu, banange bena mu mêku abu bikole, bikale ne lungenyi lua kumvuangana, bakula anu bimpe bua bakuabu, badikanda, bena bupole, banangi ba malu mimpe, ba kueyemena, bitaba tshia bakuabu, bikale ne lungenyi lua budipuekeshi, banangi ba Nzambi pamutu pa kuikala banangi ba masanka, balamate Nzambi ne muoyo umue; nunku lamate bantu aba bikole.” Utuku uyukila ne bena mu dîku dienu anyi bena Kristo nebe bua muikala nsombelu mu bulongolodi bupiabupia anyi?

15. Nansha muvua Tanja ne buôwa, ntshinyi tshivua tshimuambuluishe bua kubutshimuna?

¹⁵ Muanetu wa bakaji wa mu Macédoine du Nord diende Tanja wakatshimuna buôwa pavuaye welangana meji a masanka adi matuindile kumpala. Baledi bende bavua babenga ne muoyo mujima bua yeye kulonga Bible. Udi wamba ne: “Amue a ku malu amvua ngumvuila buôwa ne: neenzeke, akenzeka. Mamu uvua umpela mututu panyima pa bisangilu bionso. Baledi banyi bavua bankanyina ne: meme mulue Ntemu wa Yehowa nebanshipe.” Kamana kamana, bakamuipata kumbelu. Ntshinyi tshiakenzaye? Udi wamba ne: “Ngakela meji a mu ngikala ne disanka dia kashidi meme mushale ne lulamatu ne a muamfuta Yehowa mu bulongolodi bupiabupia bua bintu bionso bindi pamuapa mujimije mu bulongolodi bubi ebu ne mutuapua kabidi malu onso muoyo.” Muanetu Tanja wakashala anu ne lulamatu.  Yehowa wakamuambuluisha yeye kupeta muaba wa kusombela. Lelu eu, bakadi bamusele kudi muanetu wa balume udi munange Yehowa, badi bamuenzela mudimu wa ku dîba ne ku dîba ne disanka dionso.

EYEMENA YEHOWA BIKOLE ANU KU MPINDIEU

16. Ntshinyi tshiatuambuluisha bua kushala ne dikima patuamona malu adi mu Luka 21:26-28 akumbana?

¹⁶ Mu dikenga dinene bantu nebafue “bipuka bua buôwa.” Kadi bantu ba Nzambi nebashale bashindame ne dikima dionso. (Bala Luka 21:26-28.) Bua tshinyi katuakuzakala? Bualu tukavua balonge bua kueyemena Yehowa. Tanja utukadi batele kulu eku udi uleja mudi malu avuaye mutuilangane nawu kale amuambuluisha bua kutantamena ntatu idiye nayi mpindieu. Udi wamba ne: “Ndi mufike kudilonga ne: kakuena nsombelu udi mua kutufikila udi Yehowa kayi mua kutuambuluisha bua kunanukila to. Misangu mikuabu tudi mua kumona ne: bantu ke badi ne malu mu bianza; kadi mu bulelela Yehowa udi ne bukole bua bungi kubapita. Nansha lutatu luolu lukole mushindu kayi, nelujike anu kujika.”

17. Mvese wetu wa tshidimu tshia 2024 neatuambuluishe mushindu kayi? (Tangila tshimfuanyi tshia pa tshizubu.)

¹⁷ Kumvua buôwa ki nkubi to. Anu bu Davidi, katulekedi buôwa butuela tshibula to. Mvese wetu wa tshidimu tshia 2024, ndisambila dia Davidi kudi Yehowa dia ne: “Pandi ne buôwa, ndi nkueyemena wewe.” (Mis. 56:3) Mumanyi kampanda wa malu a mu Bible wakamba bua mvese eu ne: “Davidi kavua mutungunuke ne kuela meji a malu avua amuenza buôwa anyi ntatu yende to, kadi uvua weyemena eu uvua mua kumusungila.” Mu ngondo idi ilua eyi, ela meji a mvese wetu wa ku tshidimu nangananga paudi utuilangana ne nsombelu idi yenza buôwa. Keba dîba dia kuelangana meji a malu akadi Yehowa muenze, adiye wenza ne aluaye kuenza. Pashishe newambe pebe anu bu Davidi ne: “Ndi ngeyemena Nzambi; tshiena ntshina to.”—Mis. 56:4.