Ikala mudilongolole

‘Nudilongolole, bualu bua Muana wa muntu nealue pa dîba dinudi kanuyi belangane meji.’​—MAT. 24:44.

1, 2. (a) Mmalu kayi akavua Bible mulaye atudi mua kufuanyikija ne nyama wa tshisumpa ntambue uvua mubunde mfumuende? (b) Dibunda edi didi dikutangila mushindu kayi?

KUKADI bidimu bia bungi, muenji wa manaya kampanda muende lumu uvua unaya kumpala kua bantu ba bungi ne nyama yende ya bisumpa ntambue ivuaye mulongeshe bimpe. Wakamba ne: “Nyama yeye mukunange, udi udimona anu bu ne: mbakupeshe tshintu tshimpe bikole tshidi tshitambe bikuabu bia pa buloba.” Kadi mu dia 3 ngondo wa 10 mu 2003, nyama yende eyi kayivua kabidi mimueyemene to. Umue wa ku nyama yende uvua ne bujitu bua kilo 172 wakamubunda bua bualu budi kabuyi bumanyike. Muena nyama eyi kavua mudilongolole to, bualu kavua mumanye ne: nyama eu uvua mua kumubunda to.

² Mbia mushinga bua tuetu kumanya ne: Bible ukavua mumanyishe bua mvita ivua ‘nyama wa luonji’ ne bua kuela, nunku tudi ne bua kuikala badilongolole. (Bala Buakabuluibua 17:15-18.) Mbanganyi badi nyama eu ubunda? Bu mudi malu enda ashintuluka mu mushindu udi bantu kabayi batekemene, bulongolodi bua Diabolo budi buenda bupanduluka bobu nkayabu. Nyama wa luonji wa dikala dikunze udi umvuija nsangilu wa matunga masanga, ne “nsengu dikumi” idi yumvuija makalenge onso a tshididi. Biobi ebi nebiluishe mukaji wa masandi udi muikale Babulona munene anyi nsangilu wa bitendelelu bia dishima, nebimubutule ne tshikisu tshionso. Bualu ebu nebuenzeke tshikondo kayi? Katuena bamanye dituku ne dîba to. (Mat. 24:36) Tudi bamanye ne: nebienzeke pa dîba ditudi katuyi batekemene, tudi bamanye kabidi ne: musangu udi mushale kumpala kua kubundabu mukaji eu mmuipi. (Mat. 24:44; 1 Kol. 7:29) Nunku, tudi ne bua kuikala badilongolole bua pikalabu mua kutubunda ne pikala Kristo ne bua kulua kubutula baluishi aba atupandishe. (Luka 21:28) Bua tuetu kudilongolola, tudi ne bua kuidikija batendeledi ba Nzambi ba lulamatu bavua pabu badilongolole ne badimuene muvua Nzambi mukumbaje milayi yende. Netulondeku tshilejilu tshiabu anyi?

Ikala mudilongolole anu bu Noa

3. Mmalu kayi avua mua kupangisha Noa bua kuenzela Nzambi mudimu ne lulamatu?

³ Nansha muvua malu manyanguke bikole pa buloba mu tshikondo tshia Noa, yeye uvua mudilongolole bua kumona muvua mulayi wa Nzambi ne bua kukumbana. Ela meji bua ntatu ivua Noa mua kuikala mupete pavua banjelu batomboke mu diulu, bavuale mibidi ya bantu bua kulua kuenda masandi ne bana ba bakaji pa buloba. Banjelu aba bakalela ne bakaji abu bana bavua ne meji ne bukole bipite bia bantu, bavua bantu “banene” anyi bilobo bivua bikengesha bakuabu. (Gen. 6:4) Ela meji bua tshikisu tshivuaku ne tshimvundu tshivua bantu ba mpolondo aba bakebesha miaba yonso ivuabu baya. Tshikisu tshiakavulangana ne lungenyi lua bantu ne bienzedi biabu biakanyanguka bikole. Ke Yehowa kuangata dipangadika dia kubutula bantu babi abu.​—Bala Genese 6:3, 5, 11, 12. *

4, 5. Mmu mushindu kayi mudi malu adi enzeka lelu mafuanangane ne a mu tshikondo tshia Noa?

⁴ Yezu ukavua mulaye ne: mu matuku etu aa malu avua ne bua kuikala anu bu mu matuku a Noa. (Mat. 24:37) Tshilejilu, tuetu petu tudi tumona mudi nyuma mibi yenza malu. (Buak. 12:7-9, 12) Banjelu aba ke bavua bavuale mibidi ya bantu mu tshikondo tshia Noa. Nansha mudibu  kabayi mua kuvuala kabidi mibidi eyi lelu, badi badienzeja bua kuikala balombola bansonga ne bantu bakulumpe. Ke bualu kayi, badi basanka padibu bamona bantu benza malu mabi.​—Ef. 6:11, 12.

⁵ Mukanda wa Nzambi udi wamba mudi Diabolo muikale ‘mushipianganyi’ ne mudiye ne “bukole bua lufu.” (Yone 8:44; Eb. 2:14) Kadi, kabiena bisua kumvuija ne: Nzambi mmumupeshe bukole bua kushipa muntu yonso udiye musue kushipa to. Nansha nanku, muanjelu mubi eu udi utangalaja dishima ne udi usaka bantu ku ditombokela Nzambi. Udi ukuna bantu lungenyi lua kushipa bakuabu. Tshilejilu, mu bana 142 badi baledibua mu États-Unis, umue wa kudibu nebamushipe kudi benzavi. Udiku wela meji ne: mushindu udi tshikisu tshivule lelu eu, Yehowa katuku unyingalala bu muakenzaye mu matuku a Noa anyi? Neapangile bua kujikija malu aa anyi?

6, 7. Mmunyi muvua Noa ne dîku diende baleje muvuabu ne ditabuja ne ditshina dia Nzambi?

⁶ Nzambi wakamanyisha Noa dilua dia mvula wa tshipupu pa buloba uvua ne bua kubutula bantu ne bintu. (Gen. 6:13, 17) Yehowa wakambila Noa bua kusonga buatu bunene. Noa ne dîku diende bakatuadija kuenza buatu. Ntshinyi tshivua tshibambuluishe bua kutumikila ne kuleja muvuabu badilongolole pavua Nzambi ne bua kubutula bantu babi?

⁷ Ditabuja dikole ne ditshina dia Nzambi ke bivua bisake Noa ne dîku diende bua kutumikila mukenji wa Nzambi. (Gen. 6:22; Eb. 11:7) Bu muvuaye mfumu wa dîku, Noa wakashala anu mulamate Yehowa ne kubenga kuenza malu mabi avua bantu ba mu tshikondo tshiende benza. (Gen. 6:9) Uvua mumanye ne: bena mu dîku diende bavua ne bua kuepuka bikadilu bia tshikisu ne lungenyi lubi luvua nalu bantu ba mu tshikondo tshiabu. Kabavua ne bua kuditua ne kasuki mu malu a mu nsombelu to. Nzambi uvua mubapeshe mudimu wa kuenza, nanku bivua bimpe bua bobu kuditua anu mu mudimu au.​—Bala Genese 6:14, 18.

Noa ne dîku diende bavua badilongolole

8. Ntshinyi tshidi tshileja ne: bena mu dîku dia Noa bavua balamate Nzambi?

⁸ Muyuki wa mu Bible eu udi utamba kukoka lungenyi luetu pa Noa mfumu wa dîku, kadi mukajende ne bana bende ba balume ne bakaji babu bavua pabu batendelela Yehowa. Muprofete Yehezekele wakajadika bualu ebu. Wakamba ne: bu Noa muikale ne muoyo mu tshikondo tshia Yehezekele, bana bende kabavua mua kupanduka bua malu makane a tatuabu to. Bakavua bakumbane bua kudisunguila bua kutumikila Nzambi anyi kubenga kumutumikila. Nanku bakaleja nkayabu muvuabu banange Nzambi ne mikenji yende. (Yeh. 14:19, 20) Bena mu dîku dia Noa bavua bitabe tshivua Nzambi mubambile, bavua bamuitabuje ne kabavua balekele bantu babapangisha bua kukumbaja mudimu uvua Nzambi mubapeshe to.

9. Tudi mua kufuanyikija ditabuja dia Noa ne bilejilu kayi lelu?

⁹ Bidi bitusankisha lelu bua kumona mudi bamfumu ba mêku a Bantemu ba Yehowa pa buloba bujima badienzeja bua kuidikija Noa. Mbamanye ne: kabiena bikengela anu kukebela bena mu mêku abu biakudia, bilamba, muaba wa kulala ne kubalongeshisha tulasa to. Kadi badi kabidi baditatshisha bua malanda a bena mu mêku abu ne Nzambi. Padibu benza nunku,  badi badilongolola bua tshikala Yehowa mua kuenza mu katupa kîpi emu.

10, 11. (a) Mmunyi muvua Noa ne dîku diende bumvue pavuabu mu buatu? (b) Ndukonko kayi lutudi ne bua kudiebeja?

¹⁰ Noa, mukajende, bana bende ne bakaji babu bavua mua kuikala basonge buatu bidimu bitue ku 50. Pavuabu basonga buatu, bavua mua kuikala babuelamu ne bapatuka misangu nkama ne nkama. Bavua babuenze mu mushindu wa kupangisha mâyi bua kubuela, bavua babuejamu biakudia ne nyama. Anji fuanyikijabi muvua malu menzeke. Dituku dinene divuabu bindile didi difika. Badi babuela mu buatu mu dia 17 ngondo muibidi wa tshidimu tshia 2370 kumpala kua Yezu. Yehowa udi ukanga tshîbi, mvula udi utuadija kuloka. Ki mmvula wa bilele utu uloka pa tshibidilu to. Mvula mukole mupite bungi wakaloka pa buloba, bienze anu bu mâyi a mbuu afumina mu diulu. (Gen. 7:11, 16) Bantu badi pambelu pa buatu badi benda bafua, kadi badi munda buobu mbapandishibue. Noa ne dîku diende bavua mua kuikala bumvue bishi? Bavua bela Nzambi tuasakidila ne muoyo mujima. Bavua mua kuikala badiambila ne: ‘Tudi ba diakalenga bua mutuvua bende ne Nzambi mulelela ne bashale anu badilongolole.’ (Gen. 6:9) Difuanyikijabi pebe panyima pa Armagedone, mutshima webe newikale muule tente ne dianyisha dia muomumue, ki mmomu anyi?

¹¹ Tshintu nansha tshimue katshiena mua kupangisha Nzambi wa Bukole buonso bua kukumbaja mulayi wende wa kubutula bulongolodi bua Satana to. Diebeja ne: ‘Ndiku mueyemene milayi ya Nzambi ne muoyo umue mushindike ne: neayikumbaje buonso buayi mu tshikondo tshijadika anyi?’ Bikalabi nanku, ikala mudilongolole ne mulame ‘dituku dia Yehowa’ didi dilua ne lukasa luonso mu lungenyi.​—2 Pet. 3:12.

Mose wakashala anu mudilongolole

12. Mmalu kayi avua mua kunyanga lungenyi lua Mose?

¹² Tukonkononayi tshilejilu tshikuabu. Ku dimona dia buntu, Mose uvua umueneka muikale mu nsombelu muimpe mutambe mu Ejipitu. Bu muvuabu bamukoleshe kudi muana wa bakaji wa Palô, bavua bamuangata ne mushinga wa bungi ne uvua udia biakudia bimpe, uvuala bilamba bimpe ne munyunguluka kudi bintu bimpe. Uvua mulonge tulasa tua bungi. (Bala Bienzedi 7:20-22.) Uvua mua kupeta bumpianyi bunene.

13. Mmunyi muvua Mose mushale anu mueyemene milayi ya Nzambi?

¹³ Bidi bimueneka ne: malu avua baledi ba Mose bamulongeshe ku buana akamuambuluisha bua kujingulula ne: ntendelelu wa mpingu wa bena Ejipitu uvua wa patupu. (Ekes. 32:8) Tulasa tuvua Mose mulonge mu Ejipitu ne biuma bia mu nzubu wa mfumu kabiakamufikisha ku dilekela ntendelelu mulelela to. Dimanya ne dielangana meji bua malu avua Nzambi mulaye bankambua bende biakamusaka bua kukeba mua kuenza disua dia Nzambi. Ndekelu wa bionso, Mose wakambila bena Isalele ne: ‘Yehowa, Nzambi wa Abalahama, Nzambi wa Isaka ne  Nzambi wa Yakoba wakuntuma kunudi.’​—Bala Ekesode 3:15-17.

14. Mmunyi muvua ditabuja dia Mose ne dikima diende bitetshibue?

¹⁴ Nansha mudi Yehowa kayi umueneka, Mose uvua umumona bu muntu mulelela mushilangane ne mpingu ivua kayiyi ne muoyo ya mu Ejipitu. Uvua wenza malu anu bu uvua mumone ‘yeye udi kayi umueneka ku mêsu.’ Mose uvua mushindike ne: bavua ne bua kulekela bantu ba Nzambi ku bupika, kadi kavua mumanye dituku ne dîba to. (Eb. 11:24, 25, 27) Wakaleja muvuaye ujinga bikole bua balekele Isalele ku bupika pakashipaye muena Ejipitu uvua ukuma muena Isalele. (Ekes. 2:11, 12) Kadi atshi katshivua tshikondo tshivua Yehowa mulongolole bua kubapikula to, ke Mose kunyemena mu ditunga dia kule bua kusokoma. Kakuyi mpata, kavua kabidi mua kuikala ne nsombelu muimpe wa buena uvuaye nende mu Ejipitu mu tshipela muvuaye amu to. Kadi Mose uvua anu mudilongolole bualu wakatungunuka ne kutumikila bionso bivua Yehowa umuambila. Panyima pa yeye mumane kuenza bidimu 40 mu Midiyana, nunku Nzambi uvua mua kukuata nende mudimu bua kupikula bena Isalele. Mose wakatumikila dîyi dia Nzambi dia kupingana mu Ejipitu. Tshikondo tshivua tshikumbane bua Nzambi kupesha Mose mudimu uvuaye ne bua kuenza muvua Nzambi musue. (Ekes. 3:2, 7, 8, 10) Pakapinganaye mu Ejipitu, Mose uvua ‘mupite bantu bonso bupuekele’ uvua dijinga ne ditabuja ne dikima bua kumonangana ne Palô. (Nom. 12:3, MMM) Mose wakaya, kadi kavua muye anu musangu umue au to, uvua wenza nunku misangu yonso ivua Yehowa umutuma bua kumanyisha bipupu nansha muvuaye kayi mumanye bungi bua misangu ivuabu ne bua kumutuma kudi Palô.

15. Nansha muvua Mose mutekeshibue, ntshinyi tshivua tshimusake bua kutungunuka anu ne kutumbisha Tatuende wa mu diulu?

¹⁵ Mu bidimu 40 biakalonda, Mose uvua mutuilangane ne nsombelu ivua mimutekeshe. Kadi uvua ukeba mishindu ya kutumbisha Yehowa ne uvua ukankamija bena Isalele ne muoyo mujima bua kuenzabu pabu nanku. (Dut. 31:1-8) Bua tshinyi? Bualu uvua munange dîna dia Yehowa ne bukokeshi buende kupita dîna diende yeye. (Ekes. 32:10-13; Nom. 14:11-16) Nansha mutudi petu mua kutekeshibua mu mikolo, tudi ne bua kutungunuka ne kutua bumfumu bua Nzambi nyama ku mikolo bashindika ne: udi wenza malu ne meji, buakane ne mu mushindu muimpe mutambe. (Yesh. 55:8-11; Yel. 10:23) Ke muutu pebe musue kuenza anyi?

Ikala mutabale

16, 17. Bua tshinyi mêyi adi mu Mâko 13:35-37 adi ne mushinga wa bungi buebe wewe?

¹⁶ Yezu wakamba ne: ‘Dimukayi, nutabale bimpe, nutendelele Nzambi, bualu kanuena bamanye dituku adi paluadi.’ (Mâko 13:33) Yezu wakafila didimuija edi pavuaye wambila bayidi tshimanyinu tshia nshikidilu wa bulongolodi ebu. Mu mulayi wende udi mu Mâko, Yezu wakajikija wamba ne: ‘Nudimuke, bualu kanuena bamanye dituku dialua muena nzubu, ne ndilolo, ne mmundankulu, ne mpasama tshitala tshia diambedi, ne mmu dinda. Bialuaye lukasa, kalu kunusangana balale tulu. Ndi ngambila bantu bonso dîyi dingakunuambila ne: dimukayi.’​—Mâko 13:35-37.

¹⁷ Didimuija dia Yezu edi didi disaka bantu ku dienza bualu kampanda. Wakakula bua bikondo bishilangane bia kushala batabale butuku. Tshikondo tshia ndekelu tshivua mua kuikala tshikole bua kushala batabale bualu tshidi  tshituadija pa dîba 3 wa patshiatshia too ne mu dinda. Baluanganyi bapiluke ba mvita batu bamanye ne: dîba dimpe dia kukuata baluishi, mpatshidibu “balale.” Bia muomumue lelu, padi bantu ba bungi kabayi bitaba lumu lua Bukalenge, bidi mua kutukolela bua kushala batabale. Tudiku mua kuelakana bua mutudi ne bua kushala ‘batabale’ ne kuikala ‘badimuke’ bua nshikidilu uvuabu balaye ne bupikudi buetu anyi?

18. Bu mutudi Bantemu ba Yehowa, ndiakalenga kayi dinene ditudi nadi?

¹⁸ Pavua nyama wa tshisumpa ntambue mubunde mfumuende utuvua batele ku ntuadijilu eku, kavua mumushipe to. Kadi milayi ya mu Bible yoyi idi yamba ijadika ne: bitendelelu bia dishima ne bulongolodi ebu nebibutudibue ku kabutu kakadi kasemene. (Buak. 18:4-8) Nunku, batendeledi bonso ba Nzambi, bakulumpe ne bana badi ne bua kumona ne: bidi ne mushinga bua bobu kuenza ne muabu muonso bua kuikala badilongolole bua dituku dia Yehowa anu bu Noa ne dîku diende. Tudi munkatshi mua bantu badi kabayi banemeka Nzambi, mudi balongeshi ba bitendelelu bia dishima ne bantu badi kabayi bitaba ne: Nzambi udiku baseka Mufuki. Kadi katuitabi bua bantu aba batunyange to. Tuidikijayi bilejilu bitudi bakonkonone ne tukebe mishindu ya kubingisha ne kutumbisha Yehowa bualu ‘udi Nzambi wa nzambi mikuabu, Nzambi munene ne mukole, udibu batshina.’​—Dut. 10:17.

[Mêyi adi kuinshi]

Udiku muvuluke anyi?

• Bua tshinyi Noa uvua ne bua kuteka malanda a bena mu dîku diende ne Nzambi pa muaba wa kumpala?

• Mmunyi mudi matuku etu aa mafuanangane ne a mu tshikondo tshia Noa?

• Nansha muvua Mose mutekeshibue mu mikolo, bua tshinyi wakashala anu mueyemene malu avua Yehowa mulaye?

• Mmilayi kayi ya mu Bible idi ikusaka bua kushala mutabale?

[Nkonko ya dilonga]

[Tshimfuanyi mu dibeji 25]

Noa ne dîku diende bavua baditue anu mu mudimu wa Yehowa

[Tshimfuanyi mu dibeji 26]

Malu malelela avua Nzambi mulaye akambuluisha Mose bua kushala mutabale