Bua kushipa bena tshibawu, bisamba bia bungi bia mu tshikondo tshia kale bivua bibapopela ku mutshi. Bena Lomo bavua basuika muntu wa nunku ku mutshi anyi bamupopelaku, muaba uvuaye ushala ukenga bua bivua bimusama, nyota, nzala ne bua munya ne mashika munkatshi mua matuku makese. Bena Lomo bavua bamona dipopela muntu bu dinyoka dia bundu divuabu ne bua kupesha benji ba malu mabi ba milongo mishadile.

Kadi, bena tshisamba tshia Isalele bobu bavua benza bishi? Bavuaku bashipa benji ba malu mabi pa kubuowela ku mutshi anyi? Mikenji ya Mose ivua miambe ne: “Pikala muntu muenze bualu bubi, nuenu bamufundile tshibawu tshia lufu, bashipe muntu awu, balembeleje tshitalu tshiende ku mutshi, tshitalu atshi katshiladi kulu butuku to. Nutshijike amu dituku adi.” (Dut. 21:22, 23, MMV) Nunku, mu tshikondo tshia Mifundu ya tshiena Ebelu, bidi bimueneka patoke ne: muntu uvuabu ne bua kushipa, bavua banji kumushipa ne pashishe bamukudika ku mutshi.

Bua bualu ebu, Lewitiki 20:2 udi wamba ne: ‘Muntu yonso wa bena Isalele anyi wa benyi ba munkatshi mua bena Isalele udi ufila muanende kudi Moleke neashipibue bulelela; bena buloba nebamukume ne mabue.’ Bavua ne bua kushipa kabidi muena ‘mupongo anyi mutempi wa mbuku.’ Mushindu kayi? Pa ‘kumukuma ne mabue.’​—Lew. 20:27.

Mu Dutelonome 22:23, 24 tudi tubala ne: ‘Bikalaku mushikankunde utshidi kamama, udi mubangila kudi mulume, ne muntu mukuabu udi usangakena nende mu musoko, udi ulala nende; pashishe nebalue nabu bubidi buabu ku tshilumbuluidi tshia ku tshibi tshia musoko au, nenubakume ne mabue too ne pafuabu; mushikankunde, bualu bua yeye kakadila pakadiye mu musoko, ne mulume, bualu bua yeye wakanyanga mukaji wa muena mutumba nende: nunku nenumushe malu mabi munkatshi muenu.’ Nanku, mushindu munene uvua bena Isalele ba kumpala bashipa muntu uvua muenze bubi bunene, nkumuasa mabue. *

Dutelonome 21:23 udi wamba ne: “Muntu yonso muowa ku mutshi udi muedibue mulau kudi Nzambi.” Kukudika tshitalu tshia muntu mubi uvua “muedibue mulau kudi Nzambi” bua bantu batshimone kuvua didimuija kudi bena Isalele.