1. Ntshinyi tshitudi mua kuenza bua kujadika bituikala ne ditabuja dikole?

BANTU ba bungi batu bitaba anu malu adibu badimuenene ne mêsu. Mmunyi mutudi mua kuambuluisha bantu ba nunku bua kuitabujabu Yehowa? Bushuwa Bible utu wamba ne: “Kakuena muntu ukadi mumone Nzambi musangu nansha umue.” (Yone 1:18) Bu mudibi nanku, mmunyi mutudi mua kujadika ne: ditabuja dietu kudi Yehowa, “Nzambi udi kayi umueneka” ndikole? (Kolos. 1:15) Bualu bua kumpala, bidi bikengela kumanya malongesha adi abuitshidija bulelela budi butangila Yehowa. Pashishe, tudi ne bua kuenza mudimu bimpe ne Bible bua kutonkola ngelelu yonso ya meji idibu “bajula bua kuluisha dimanya dia Nzambi.”​—2 Kol. 10:4, 5.

2, 3. Mmalongesha kayi abidi atu apangisha bantu bua kumanya bulelela budi butangila Nzambi?

² Dimue dia ku malongesha a dishima adi matangalake bikole didi dipangisha bantu bua kumanya bulelela budi butangila Nzambi ndia ne: bintu mbidienzekele. Ngelelu wa meji wa bantu eu udi ubengangana ne tshidi Bible wamba ne udi upangisha bantu ditekemena. Dilongesha dia ne: bintu mbidienzekele ndimanyine pa lungenyi lua ne: bintu bionso bidi ne muoyo mbilue ku mpukapuka; nunku didi dileja mudi muoyo wa muntu kawuyi ne tshipatshila.

³ Ku lukuabu luseke, bamfumu ba bitendelelu batu balongesha ne: tshibuashibuashi pamue ne: buloba ne bintu bionso bidi ne muoyo bidipu bitshidi anu ne bidimu binunu bikese patupu. Bantu aba batu bitaba malu a bufuki ne badi mua kuikala bangata Bible ne mushinga wa bungi, kadi badi bamba muvua Nzambi mufuke bintu bionso mu matuku asambombo a mêba 24 patupu, baleja mudi bualu ebu buenzeke kutshidi anu bidimu binunu bikese. Badi babenga bijadiki bilelela bia bena sianse bidi bibengangana ne lungenyi luabu elu. Nunku, dilongesha dia bantu aba didi bushuwa dipepeja Bible, dimuvuija kayi wamba malu majalame ne a meji. Bantu batu batua ngenyi eyi nyama ku mikolo badi batuvuluija bamue bantu ba mu bidimu lukama bia kumpala bavua ne tshisumi bua Nzambi ‘kadi kabiyi bilondeshile dimanya dijalame to.’ (Lomo 10:2) Mmunyi mutudi mua kuenza mudimu ne Dîyi dia Nzambi bua kutonkola dilongesha dia ne:  bintu mbidienzekele ne dia ne: mbafuke bintu mu matuku asambombo a mêba 24 adi menze bu “ngumbu idi mikole”? * Tudi mua kuenza nunku anu tuetu tudienzeja bikole bua kupeta dimanya dilelela dia tshidi Bible ulongesha.

4. Ditabuja dietu didi ne bua kuikala diashila pa tshinyi?

⁴ Bible udi utulongesha bua kuvudija dimanya. (Nsu. 10:14) Yehowa mmusue bua tukoleshe ditabuja dietu kudiye ne bua dikale diashila pa bijadiki ne pa ngelelu muimpe wa meji, kadi ki mpa malu a nkidi ya bantu anyi pa bilele bia mu bitendelelu to. (Bala Ebelu 11:1.) Bua ditabuja dietu kudi Nzambi kukoladi, tudi ne bua kuanji kuikala bajadike ne: Yehowa udiku. (Bala Ebelu 11:6.) Tudi tufika ku ditaba bualu ebu patudi tukonkonona bijadiki ne tuenza mudimu bimpe ne ‘tshieledi tshietu tshia lungenyi,’ kadi ki mbilondeshile meji etu to.​—Lomo 12:1.

5. Mbualu kayi bumue budi mua kutujadikila ne: Nzambi udiku?

⁵ Mupostolo Paulo udi utuleja bualu bumue budi mua kutuitabujija ne: Nzambi udiku nansha mutudi katuyi mua kumumona. Paulo wakafunda bua Yehowa ne: “Ngikadilu yende idi kayiyi imueneka, mmumue ne: bukole buende bua tshiendelele ne Bunzambi buende, idi imueneka bimpe katshia buloba buafukibua, bualu badi bayijinguluila ku bintu bidi bifukibue.” (Lomo 1:20) Mmunyi muudi mua kuambuluisha muntu udi wamba mudi Nzambi kayiku bua kumonaye mudi mêyi avua mupostolo Paulo mufunde ku bukole bua nyuma muimpe aa malelela? Udi mua kukonkonona bimue bia ku bijadiki bia mu bufuki bidi bilonda ebi bidi bileja mudi Mufuki wetu muikale ne bukole ne meji.

6, 7. Mmunyi mudi bukole bua Yehowa bumuenekela mu bintu bibidi bidi bitukuba?

⁶ Bukole bua Yehowa budi bumuenekela mu bintu bibidi bidi bitukuba ebi: kapepele ka buloba ne bukole budi nabu buloba bua kukoka bintu bu tshiamu tshia nzembu. Kapepele katu katuambuluisha tshilejilu bua kupuyakana, kadi ki nkujike to. Kadi katukuba kabidi ku bukoya bua bungi budi butangalake mu tshibuashibuashi. Bitupa bia mabulunge bidi mua kukebesha njiwu minene bitu bioshika padibi bibuela mu kapepe ka buloba, nunku bienza bua kuikale butoke muulu butuku.

⁷ Bukole bua buloba budi buenze bu tshiamu tshia nzembu budi pabu butukuba ku njiwu. Bukole ebu budi bufumina muinshi menemene mua buloba. Tshitupa tshia pambelu tshia muoyo wa buloba tshidi tshienza ne tshiamu tshifiike tshidi tshienguluka tshitu tshipatula bukole budi buenze bu bua tshiamu tshia nzembu budi butunyunguluke ne butangalake mu tshibuashibuashi. Bukole ebu budi butukuba ku nsese idi ifumina ku bukenke bua dîba ne ku bintu bitu bitayika bidi pabuipi ne dîba. Ku diambuluisha dia bukole ebu, bintu bidi bilamuka ku mabulunge ebi kabiena biosha bintu bionso bia muoyo bidi pa buloba to. Kadi budi bubikoka ne bubivingutula. Tudi tumona mudi bukole ebu bukuata mudimu bua kupatula nsese ya mekala mashilashilangane muulu pabuipi ne ku Nord ne ku Sud kua buloba. Kakuyi mpata, Yehowa udi ne “bukole” bua bungi.​—Bala Yeshaya 40:26.

8, 9. Mmunyi mudi meji a Yehowa amuenekela ku dishintuluka didi dienza bua muoyo wikalaku?

⁸ Meji a Yehowa adi amuenekela mu dishintuluka dia bintu didi dienza bua kuikala muoyo pa buloba. Tshilejilu: Fuanyikija ne: udi mu tshimenga tshidi ne bantu ba bungi tshinyunguluka kudi lumbu, kakuyi mushindu wa kupeta mâyi mimpe anyi kupatula bintu bia bukoya. Tshimenga tshia nunku tshidi mua kulua ne bukoya bua bungi mu katupa kîpi ne kakuyi mushindu wa kusombamu. Mu mushindu kampanda, buloba buetu ebu mbuenze anu bu tshimenga etshi. Budi ne mâyi mimpe anu makese tshianana, ne mbikole bua kutuma bintu bia bukoya bidipu muaba mukuabu. Kadi miliyo  ne miliyo ya bifukibua idi mua kusomba pa buloba budi bu tshimenga atshi bipungu ne bipungu. Bua tshinyi? Bualu tshidi ne mushindu udi ukemesha wa kushintulula bintu bidimu bua mu tshimenga emu muikale muoyo.

⁹ Tuakule bua dishintuluka dia kapepe. Bifukibua miliyo ya bungi bitu bipuyakana bikoka kapepe kimpe ne bipatula kapepe kabi. Nansha nanku, kapepe kimpe kakatu kajika to, ne tshibuashibuashi katshitu tshiuwula ne kapepe kabi to. Bua tshinyi? Tudi tupeta diandamuna mu mushindu wa dikema utu bikunyibua bipeta biakudia. Bikunyibua bitu bikoka kapepe kabi, mâyi, nsese ya dîba ne bidishi ne bipatula nsukadi ne kapepe kimpe. Patutu tukoka kapepe kimpe aka, tudi tuenza dishintakaja. Bidi bimueneka patoke ne: Yehowa udi ukuata mudimu ne bikunyibua bidiye muenze bua kupesha “bantu bonso muoyo, ne mueyelu.” (Bien. 17:25) Aa si mmeji a dikema!

10, 11. Mmunyi mudi tshibeyibeyi ne kalombo bileja mudi Yehowa ne meji a bungi?

¹⁰ Bungi bua meji a Yehowa budi bumuenekela kabidi mu bifukibua bungi kabuyi kubala bidi pa buloba buetu ebu. Badi batshinka ne: bungi bua mishindu mishilangane ya bintu bidi pa buloba budi mua kuikala pankatshi pa miliyo ibidi ne miliyo 100. (Bala Musambu wa 104:24.) Tangila tshijadiki tshia meji tshidi tshimuenekela mu bimue bia ku bifukibua ebi.

¹¹ Tshilejilu, tshibeyibeyi tshidi ne buongo budi bunene bua lusongo lua bike. Kadi, tshidi mua kuenza luendu lua kilometre mitue ku 3 000 tshiumbukila mu Canada tshitangile mu dîtu kampanda dia mu Méxique ku diambuluisha dia dîba. Kadi tshitu tshibuka mushindu kayi patu dîba dibuela? Yehowa mmuenze bua buongo buatshi bukese ebu buikale ne mushindu wa kukuata mushindu utu dîba dienda. Tuangate kabidi tshilejilu tshia tshishi tshidibu babikila ne: kalombo (anyi munjidinjidi). Tshishi etshi tshitu tshimona ku diambuluisha dia mêsu abidi. Dîsu dionso ndienza ne tumonyi tutue ku binunu 30. Nansha nanku, buongo bukese bua kalombo budi mua kukamanyisha kalu ne kalu konso kadi tumonyi tuonso tumona.

12, 13. Mbualu kayi budi bukemesha mu mushindu udi Yehowa muenze tutupa tukese tudi tuenza mubidi webe?

¹² Bualu budi butamba kukemesha mbua mushindu udi Yehowa muenze tutupa tukese tua mubidi (anyi selile) tudi tuenza bifukibua bionso bidi ne muoyo pa buloba. Tshilejilu, mubidi webe mmuenza ne tutupa etu tutue ku miliyare binunu lukama. Mu katupa konso mudi kamuonji kakese menemene kadibu babikila ne: ADN. Kamuonji aka katu kalama malu a bungi adi akengela bua kuibaka mubidi webe mujima.

¹³ ADN udi mua kulama malu bungi kayi? Tufuanyikije bungi bua bintu bidi grame umue wa ADN mua kulama ne ebu budi ditadi dia CD mua kulama. Ditadi dia CD didi mua kulama malu a mu diksionere dijima, bualu budi bukemesha patudi tumona mudi ditadi dia CD dikale anu kantu kakese tshianana kenza ne tshindundu. Kadi grame umue patupu wa ADN udi mua kulama malu adi matadi a CD matue ku miliyare tshinunu mua kulama. Mu kuamba kuimpe, kalukutu kamue ka ADN miumisha kadi mua kuikala ne  malu adi mua kuibaka bantu bonso badi ne muoyo lelu, ne kuenza nanku bungi ebu buvudija misangu 350.

14. Malu adi bena sianse bapete adi akusaka bua kumvua bishi bua Yehowa?

¹⁴ Mukalenge Davidi wakaleja mudi bintu bidi bikengela bua kuibaka mubidi wa muntu bu bifunda mu mukanda wa mu tshimfuanyi. Wakamba bua Yehowa Nzambi ne: ‘Mêsu ebe akumona bitupa bia mubidi wanyi kabiyi bianji kulamakana. Matuku anyi onso akadi mafunda mu mukanda webe, matuku mene awakapangadija bua meme ngikale ne muoyo, diambedi dituku dimue dia munkatshi muawu kadiyi dianji kuikalaku.’ (Mus. 139:16) Bidi biumvuika ne: pavua Davidi mukonkonone mushindu uvua mubidi wende muenza, biakamusaka bua kutumbisha Yehowa. Malu adi bena sianse bajingulule bidimu bishala ebi mmadikumbaje patupu ku mushindu ututu tumvua dianyisha patudi tuelangana meji bua mushindu udi Yehowa mutuenze. Malu adibu bapete aa adi atusaka kabidi bua kuitaba mêyi avua mufundi wa Misambu muambe bua Yehowa a ne: ‘Ndi nkusakidila, bualu bua difukibua dianyi didi dilengeja meji a mua kukunemeka bikole, didi dinkemesha. Midimu yebe yonso idi malu a kukema; mutshima wanyi udi mumanye bualu ebu bimpe.’ (Mus. 139:14) Nunku, mmunyi mudi bantu kabayi mua kumona mudi bufuki buleja ne: kudi Nzambi wa muoyo?

15, 16. a) Mmunyi mudi mikanda yetu ikolesha dianyisha dietu bua mushindu udi Yehowa mufuke bintu? b) Ntshimue tshia ku biena-bualu kayi bia ne: “Hasard ou conception?” tshivua tshikukemeshe bikole?

¹⁵ Kukadi bidimu makumi a bungi, tshibejibeji tshia Réveillez-vous! ntshiambuluishe bantu ba bungi bua kuanyisha malu adi bufuki buleja adi atangila Nzambi wa muoyo. Tshilejilu, Réveillez-vous! wa ngondo wa 9 wa 2006 uvua ne tshiena-bualu tshia ne: “Y a-t-il un Créateur?” uvua muenza yonso mujima bua kukangula mêsu a bantu badi bafofomija kudi dilongesha dia ne: bintu mbidienzekele ne dia ne: bintu mbifuka mu matuku asambombo a mêba 24. Muanetu wa bakaji mukuabu wakafundila Betele wa mu États-Unis bua numero wa pa buende eu ne: “Difila dia pa buadi dia Réveillez-vous! wa pa buende eu mu buambi divua dienzeke bimpe be! Mamu mukuabu udi mulongeshi wa biologie uvua muyindombe 20 bualu uvua musue bua balongi bende bonso bamupete.” Muanetu wa balume mukuabu wakafunda ne: “Ndi mutuadije kuyisha ku ndekelu kua bidimu bia 1940 ne ndi mpindieu ne bidimu bitue ku 75. Kadi tshitu muanji kupeta disanka dia bungi mu mudimu wa diyisha bu dimvua mupete pamvua ngabanya Réveillez-vous! wa pa buende eu to.”

¹⁶ Mu bidimu bishala ebi, mu Réveillez-vous! ya bungi mudi tshiena-bualu tshia ne: “Hasard ou conception?” Tshiena-bualu tshîpi etshi tshitu tshileja bijadiki bidi bikemesha bia mu bufuki ne tshileja mishindu itu muntu mutete mua kuidikija Mufuki wa tshintu tshidibu bakuila. Tuvua bapete malu makuabu adi ambuluisha bua kupesha Nzambi lumu mu broshire uvuabu bapatule mu 2010 uvua ne tshiena-bualu tshia ne: La vie a-t-elle été créée? Bimfuanyi bimpe ne bijengu bidi ne malongesha bidi mu broshire eu mbienza bua kutusaka bua kukolesha dianyisha dietu bua mushindu udi Yehowa mufuke bintu. Nkonko idi ku ndekelu kua tshitupa tshionso idi yambuluisha mubadi bua kuela meji ku malu adiye mubale. Ukadiku muenze mudimu ne broshire eu paudi uyisha ku nzubu ne ku nzubu, miaba idi bantu ba bungi anyi dîba didi mpunga umueneka anyi?

17, 18. a) Baledi wetu, mmunyi munudi mua kuambuluisha bana benu bua kudimonabu bakumbane bua kumvuija ditabuja diabu? b) Mmunyi muudi muenze mudimu ne broshire idi yakula bua bufuki mu ntendelelu wenu wa mu dîku?

¹⁷ Baledi wetu, nukadiku bakonkonone broshire wa mekala eu ne bana benu mu ntendelelu wenu wa mu dîku anyi? Nuenu benze nunku, nenubambuluishe bua kukoleshabu dianyisha diabu bua Nzambi wa muoyo. Pamuapa nudi ne bana bakadi bansonga badi mu tulasa tua bikadilu. Batu babalongesha dilongesha dia dishima dia ne: bintu mbidienzekele. Bena malu a sianse, balongeshi,  filme ya malu a bufuki ne dijikija lutetuku dia mu bulongolodi ebu bu mudi malu adibu baleja ku television ne filme bidi biamba mudi dilongesha dia ne: bintu mbidienzekele dilelela. Udi mua kuambuluisha bansonga aba bua kukandamena malu adi matangalake aa ku diambuluisha dia broshire wa Cinq questions à se poser sur l’origine de la vie uvua pende mupatuke mu 2010. Broshire eu udi pende ukankamija bansonga bua kukolesha ‘dijingulula diabu dia malu” anu bu broshire wa ne: La vie a-t-elle été créée? (Nsu. 2:10, 11, MMV) Udi ubalongesha mushindu wa kumanya bulelela pa bidi bitangila malu adibu balonga mu kalasa.

¹⁸ Imue kudi ngumu idi ileja mudi bena malu a sianse bangule bintu muinshi mua buloba bidi bileja mudi dilongesha dia ne: bintu mbidienzekele dilelela. Peshi badi mua kuleja ne: bena sianse mbukumbane bua kuenza bintu bidi ne muoyo ku diambuluisha dia biamu. Broshire wa L’origine de la vie mmuenza bua kuambuluisha balongi bua kukonkonona bikala malu aa malelela. Baledi wetu, enzayi mudimu ne broshire eyi bua kuambuluisha bana benu bua kuikalabu batuishibue padibu bumvuija bua tshinyi badi bitaba ne: kudi Mufuki.​—Bala 1 Petelo 3:15.

19. Ndiakalenga kayi ditudi tuetu bonso nadi?

¹⁹ Malu makebulula bimpe atudi tupeta ku diambuluisha dia bulongolodi bua Yehowa adi atuambuluisha bua kujingulula ngikadilu yende milenga mu bifukibua biende bidi bitunyunguluke. Etshi ke tshijadiki tshinene tshidi tshitusaka bua kutungunuka ne kutumbisha Nzambi wetu. (Mus. 19:1, 2) Tudi ne diakalenga dinene dia kupesha Yehowa, Mufuki wa bintu bionso butumbi ne bunême budi bumukumbanyine menemene.​—1 Tim. 1:17.