TATU ne mamu bakapetangana mu 1919 mu mpungilu wa bantu bafumine mu matunga a bungi wa Balongi ba Bible uvua muenzekele mu Cedar Point mu Ohio mu États-Unis. Bakaselangana ku ndekelu kua tshidimu atshi. Ngakaledibua mu 1922 ne bakalela muakunyanyi wa balume Paul panyima pa bidimu bibidi. Mukajanyi Grace uvua yeye muledibue mu 1930. Baledi bende Roy ne Ruth Howell bavua bakolele mu dîku dia Balongi ba Bible, ne bakakuende bavua pabu Balongi ba Bible ne balunda ba Charles Taze Russell.

Tuakapetangana ne Grace mu 1947 ne tuakaselangana mu dia 16/7/1949. Kumpala kua tuetu kuselangana, tuakayukila bikole bua tshituvua ne bua kuenza mu matuku atshivua alua. Tuakangata dipangadika dia kuenza midimu ya pa buayi ne dia kubenga kulela. Mu dia 1/10/1950 tuakalua bampanda-njila. Pashishe mu 1952, bakatutuma batangidi ba tshijengu.

Tuetu bonso tuakumvua ne: tuvua dijinga ne diambuluisha dia bungi bua kukumbaja mudimu mupiamupia eu. Pamvua nkeba diambuluisha kudi bena Kristo bavua ne dimanya dia bungi, mvua nkebela kabidi Grace. Ngakayukila ne Marvin Holien uvua mudie bulunda ne dîku dietu munkatshi mua bidimu bia bungi uvua mutangidi muena ngendu uvua ne dimanya dia bungi, ne ngakamuebeja ne: “Bu mutshidi Grace nsonga, ne kayi ne dimanya dia bungi, kuenaku mua kumupesha muntu bua yeye kuenza nende mudimu bua tshikondo kampanda bua kupetaye dimanya anyi?” Wakandamuna ne: “Eyowa. Edna Winkle mpanda-njila udi ne dimanya dia bungi udi mua kumuambuluisha bikole.” Grace wakalua kuamba pashishe bua Edna ne: “Uvua wenza bua ngikale ndiumvua mudilekelele ku nzubu ne ku nzubu, uvua mumanye mua kupita bimpe ne bipumbishi ne wakandongesha bua kuteleja muntu bua meme kumanya tshivua tshikumbane bua kumuandamuna. Uvua bushuwa muntu umvua nende dijinga.”

Meme ne Grace tuvua bakumbule bijengu bibidi mu tshimenga tshia Iowa kusangisha ne bitupa bia mu tshimenga tshia Minnesota ne tshia Dakota du Sud. Pashishe bakatutuma mu tshijengu tshia New York 1, tshivua kabidi ne tshimenga tshikese  tshia Brooklyn ne tshia Queens. Katuena mua kupua muoyo bua mutuvua tudiumvua katuyi ne dimanya dikumbane dia mudimu au. Tshijengu tshietu tshivua kabidi ne tshisumbu tshia Brooklyn Heights tshivua tshidisangishila ku Nzubu wa Bukalenge wa ku Betele ne tshivua ne bana betu ba ku Betele ba bungi bavua ne dimanya dia bungi. Panyima pa meme mumane kuenza muyuki wanyi wa kumpala mu tshisumbu atshi, muanetu Nathan Knorr wakalua kungambila ne: “Malcolm, udi mutupeshe mibelu mimpe be ya kutumikila anu pa dîba diayi. Kupu muoyo ne: wewe kuyi mutupeshe mibelu mikumbane, kuakuikala ne mushinga mu bulongolodi to. Tungunuka anu ne kuenza mudimu bimpe nunku.” Pakajika bisangilu, ngakambila Grace bualu ebu. Pashishe tuakabanda ku nzubu wa kuulu uvuabu batulongoluele ku Betele. Bu muvua bualu ebu bututonde, tuakadila.

Ngondo mikese pashishe, tuakapeta mukanda wa dibikila bua kubuela mu Kalasa ka Gilada ka 24 kakajika mu ngondo 2 mu 1955. Kumpala kua kuya mu kalasa bakatuambila ne: katuvua tuyamu bua kupeta dimanya dia kulua bamisionere to. Kadi, kavua mua kutuambuluisha bua kuenza mudimu wa butangidi buena ngendu bimpe. Kalasa aku kavua kimpe ne kakatuambuluisha bua kuikala ne didipuekesha.

Patuakajikija kalasa, ngakashala mutangidi wa distrike. Distrike dietu divua kabidi ne tshimenga tshia Indiana, tshia Michigan ne tshia Ohio. Biakatukemesha patuvua bapete mukanda mu ngondo wa 12 wa 1955 ufumina kudi muanetu Knorr uvua wamba ne: “Ngambila bulelela, kunsokoki bualu to. Biwikala musue bua kulua ku Betele ne kushalaku . . . peshi biwikala musue kuenza mudimu mukuabu panyima pa wewe mumane kuenza mudimu ku Betele bua tshikondo kampanda, ngambila. Ndi musue kumanya biwikala musue mudimu wa butangidi bua distrike ne bua tshijengu.” Tuakandamuna ne: netuikale ne disanka dia kuenza mudimu kayi wonso uvuabu mua kutupesha. Matuku makese pashishe, bakatuambila bua kuya ku Betele.

Mu bidimu bia disanka bindi muenze ku Betele, mvua kabidi ngenza miyuki mu bisumbu, mu mpuilu ne mpungilu mu États-Unis mujima. Mvua ndongesha ne ngambuluisha bansonga ba bungi bakalua kuambula majitu a bungi mu bulongolodi bua Yehowa pashishe. Ndekelu wa bionso, ngakalua sekretere wa muanetu Knorr mu biro bivua bilongolola mudimu wa buambi wa pa buloba bujima.

Ngakamona ne: bidimu bimvua muenze mu Tshibambalu tshia mudimu bivua bia disanka. Ngakenzamu mudimu ne muanetu Thomas (Bud) Sullivan. Uvua muenze mudimu bidimu bia bungi bu mutangidi wa tshibambalu etshi. Kadi, kuvua malu makuabu a bungi amvua mulongele kudi bantu bakuabu. Umue wa kudibu uvua Fred Rusk uvuabu batume bua kundongesha. Ndi mvuluka mumvua mumuebeje ne muoyo mujima ne: “Fred, bua tshinyi udi  ushintulula malu a bungi mu imue ya ku mikanda indi mfunda?” Wakaseka, kadi kungeleshishaye meji bimpe wamba ne: “Malcolm, paudi wamba bualu, udi mua kubumvuija mu mêyi makuabu, kadi paudi ufunda bualu kampanda nangananga budi bufumina muaba eu, budi ne bua kuikala bumvuika bimpe ne bulelela.” Pashishe kungambilaye ne bulenga ne: “Ikala ne dikima, udi wenza mudimu bimpe ne mu bungi bua matuku, neuwenze bimpe menemene.”

Mu bidimu bitudi benze ku Betele, Grace mmuenze midimu mishilashilangane bu mudi: disukula nzubu ne diyakajilula. Uvua munange bikole mudimu wende. Too ne lelu, patutu imue misangu tupetangana ne bamue bana betu batshivua bansonga bavua ku Betele mu bidimu abi, batu bambila Grace ne disanka ne: “Uvua mundongeshe mua kuadija bulalu, ndi nkuambila ne: mamuanyi uvua muanyishe tshiuvua muenze.” Grace uvua muenze kabidi mudimu mu tshibambalu tshia bibejibeji, tshia difunda mikanda ne dipatula bande. Kuenza mudimu mu bibambalu bishilashilangana ebi kuakamuambuluisha bua kumanya ne: tshintu tshionso tshitudi tuenza ne muaba kayi wonso utudi tuenza mudimu mu bulongolodi bua Yehowa ndiakalenga ne ndibenesha. Too ne lelu, ke mutuye anu umvua nunku.

Mu bidimu bia 1970, tuakamona ne: bivua bikengela kutabalela bikole baledi betu bakavua bakulakaje. Nunku, tuvua ne bua kuangata dipangadika dikole. Katuvua basue kumbuka ku Betele ne kushiyangana ne bana betu batuvua tuenzela nabu Yehowa mudimu batuvua banange bikole to. Kadi, ngakamona ne: mvua ne bujitu bua kutabalela baledi betu. Nunku, pakapita matuku tuakumbuka ku Betele kadi bikale ne ditekemena dia ne: pavua malu mua kushintuluka, tuvua mua kupingana.

Bua kupeta makuta, ngakatuadija kuenza mudimu wa kupanyisha bantu bintu kampanda. Ntu anu mvuluka tshivua mfumu wa mudimu kampanda mungambile pavuaye undongesha ne: “Mudimu eu udi ulomba kuikala kuya kutangila bantu dilolo. Bualu ke dîba diudi mua kubapeta. Kakuena tshintu nansha tshimue tshidi tshimpe kupita kuikalaku dilolo dionso bua kuya kutangila bantu to.” Ngakamuambila ne: “Ndi ngela meji ne: udi wamba bilondeshile malu audi mumanye, ne ndi muitabe. Kadi ndi kabidi ne majitu a malu a Nzambi antu tshiyi muanji kupepeja, ne tshiena mua kutuadija kuapepeja mpindieu to. Nengikale nya kutangila bantu madilolo makuabu, kadi mu Dibidi ne mu Dinayi dilolo ndi ne bua kuya mu bisangilu bidi ne mushinga wa bungi.” Bushuwa Yehowa wakangambuluisha bua mumvua tshiyi mpumbisha bisangilu bua kuenza mudimu wa bianza.

Tuvua ku luseke lua mamu pakafuaye mu ngondo wa 7 wa 1987 mu nzubu ivuabu balamina bakulakaje. Mulombodi wa nzubu eyi wakalua kudi Grace ne kumuambilaye ne: “Grace, pingana kumbelu bua wikishe. Bantu bonso mbamanye ne: uvua ulua muaba eu dîba dionso bua kutangila mamuebe muenu. Ikala ne ditalala mu mutshima ne ikala udiangata ne mushinga.”

Mu ngondo wa 12 wa 1987, tuakuwuja kabidi dilomba bua kupingana ku Betele, muaba utuvua  banange. Kadi matuku makese pashishe, bakakuata Grace ne disama dia kansere ka mu muongo. Panyima pa dimupanda ne yeye mumvue bimpe, bakamanyisha ne: disama diende divua dijike. Kadi mu tshikondo atshi, tuakapeta mukanda ufuma ku Betele muvuabu batulombe bua kutungunuka ne mudimu wetu mu tshisumbu tshituvua. Tuvua badisuike bua kuvudija mudimu wetu wa Bukalenge.

Pakapita matuku, ngakapeta mudimu mu tshimenga tshia Texas. Tuakamona ne: bivua bimpe bua tuetu kushala mu Texas bualu muvua luya, ne ke muvuabi. Tukadi ne bidimu bitue ku 25 munu mu Texas ne tudi banyunguluka kudi bena Kristo netu balume ne bakaji batudi badie nabu bulunda bukole.

Grace uvua musame kansere ka mu muongo ne ka mu diminu bua tshikondo kampanda, ne matuku mashale aa mmupete kansere ka ku dibele. Kadi katu muanji kudiabakena ujinga kufua anyi ubenga kukokela bumfumu nansha ujinga kudienzela malu to. Misangu ya bungi bavua bamuebeja ne: “Ntshinyi tshidi tshinuambuluishe bua kuikala bena dibaka bimpe ne bua kuikala ne disanka?” Udi uleja malu manene anayi aa: “Tudi balunda ba pa muoyo. Tutu ne tshibidilu tshia kuyukila dituku dionso. Tutu basue kuya kutangila bantu pamue dituku dionso. Katutu tuya kulala dituku nansha dimue bafikilangana munda to.” Kadi, misangu yonso itutu tuenzelangana malu adi abungamija, tutu tufuilangana luse ne tupue muoyo diakamue, kuenza nunku kutu bushuwa kutuambuluisha.

Nansha mutudi bapete ntatu mu nsombelu wetu, tudi bapete malongesha mimpe aa:

1.  Mbimpe kueyemena Yehowa misangu yonso, ne kuitaba nsombelu udiye ulekela utufikila. Kubenga kueyemena dijingulula dietu dia mianda.​—Nsu. 3:5, 6; Yel. 17:7.

2.  Kulonda buludiki bua mu Dîyi dia Yehowa nansha mu nsombelu kayi. Kutumikila Yehowa ne mikenji yende kudi ne mushinga. Kakuena mushindu wa kuikala pankatshi to, udi ne bua kutumikila anyi kubenga kubenga kutumikila.​—Lomo 6:16; Eb. 4:12.

3.  Kudi bualu bumue mu nsombelu budi ne mushinga wa bungi, kuikala ne dîna dimpe ku mêsu kua Yehowa. Kuteka malu a Nzambi pa muaba wa kumpala pamutu pa kukeba bintu bia ku mubidi.​—Nsu. 28:20; Muam. 7:1; Mat. 6:33, 34.

4.  Kusambila bua kupatula bipeta bimpe mu mudimu wa Yehowa ne bua kuwenza ne muoyo mujima. Kutuishila mêsu pa malu audi mua kuenza, ki mpa audi kuyi mua kuenza to.​—Mat. 22:37; 2 Tim. 4:2.

5.  Kumanya ne: kakuena bulongolodi bukuabu budi Yehowa wanyisha ne ubenesha to.​—Yone 6:68.

Meme ne Grace tudi benzele Yehowa mudimu bidimu bipite pa 75 ne tudi bamuenzele mudimu mu dibaka bidimu bipatshila ku 65. Tuvua bushuwa bapete bikondo bimpe patuvua tuenzela Yehowa mudimu pamue munkatshi mua bidimu bionso ebi. Tudi batekemene ne tudi tusambila bua bana betu balume ne bakaji bonso bamone pabu mudi kueyemena Yehowa kupetesha nsombelu wa disanka.