Muvua malongesha a Yezu Kristo mashintulule bantu

“Tshidi tshitamba kuleja ne: Yezu wa mu Kapênuma uvua muena meji ntshia ne: udi utungunuka ne kukolesha mioyo ya bantu ne meji abu.” *​—GREGG EASTERBROOK.

MÊYI adi ne bukole. Mêyi a meji makula bimpe adi mua kutuila muntu ku muoyo, kumupesha ditekemena ne kushintulula nsombelu wende. Kakutu muntu ukatu muakule mêyi adi akolesha bantu ku muoyo bu Yezu Kristo to. Muntu mukuabu uvua mumvue Muyuki wa pa Mukuna wa Yezu (muyuki udi muende lumu) wakafunda ne: ‘Pakajikija Yezu mêyi aa, diyisha diende diakakemesha bantu.’​—Matayo 7:28.

Matuku etu aa, bantu ba pa buloba bujima mbamanye malongesha a Yezu. Tumone bilejilu bikese bia malongesha ende mimpe aa.

“Kanuena bamanye mua kukuatshila Nzambi mudimu ne Mamona diakamue.”​—Matayo 6:24.

“Nuenzele bantu malu onso anudi basue banuenzele.”​—Matayo 7:12.

‘Nupe Kaisa bintu bia Kaisa, nupe Nzambi bintu bia Nzambi.’​—Matayo 22:21.

“Disanka dia kupa nditambe dia kuangata.”​—Bienzedi 20:35, Muanda Mulenga Lelu.

Kadi Yezu kavua anu muambe malu a kukuata ku muoyo to. Malu avuaye mulongeshe avua ne bukole bualu avua aleja bulelela pa bidi bitangila Nzambi, avua aleja bantu mushindu wa kuikala ne nsombelu muimpe ne aleja patoke mushindu wapeta bantu disulakana ku ntatu ne makenga abu ku diambuluisha dia Bukalenge bua Nzambi. Wewe mubale mabeji adi alonda, neumone bua tshinyi Yezu udi utungunuka ne kukolesha miliyo ya “mioyo ya bantu ne meji abu.”

[Mêyi adi kuinshi]