Tshia kuenza bua kujikija bilumbu bitu bijuka mu mabaka

BIBLE katu wamba ne: kusomba mu dibaka mbualu butekete to. Nyuma wa Nzambi wakambuluisha mupostolo Paulo bua kufunda ne: badi mu mabaka nebapete ‘ntatu ya matuku onso.’ (1 Kolinto 7:28, MMV) Kadi bena mu mabaka badi mua kuditatshisha bikole bua kukepesha ntatu itubu bapeta ne kuenzelangana malu adi abasankisha. Konkonona ntatu isambombo idi ilonda eyi idibu baleje kudi badi mu mabaka ne mona mudi mibelu ya mu Bible mua kukuambuluisha.

1

LUTATU:

“Meme ne mukajanyi anyi bayanyi katutu kabidi tupetangana to.”

TSHIDI BIBLE WAMBA:

“Numanye mua kujadika malu adi makane.”​—FILIPOI 1:10.

Dibaka ntshimue tshia ku bintu bia mushinga mukole biudi nabi. Diangata ne mushinga. Nunku utangile bikale programe yebe mua kuikala ikebesha lutatu elu. Kulekedi midimu yebe ikupangisha bua kuikala usomba ne muena diebe to. Mu bulelela, mudimu wa bianza ne malu makuabu atudi katuyi mua kuepuka bidi mua kunupangisha bua kusomba pamue bimue bikondo. Nansha nanku, udi mua kukepesha amue malu adi ku bukokeshi buebe bu mudi: kupitshisha  dîba mu dijikija lutetuku anyi mu balunda.

Nansha mudi bamue batuadija kutapuluka ne bena mabaka nabu ku kakese ku kakese kabayi bamanye, bakuabu pabu badi babanyema ku bukole padibu baditua mu dienza malu adi kaayi ne mushinga. Badi banyema malu. Biwikale wewe anyi muena diebe ne tshibidilu etshi, nudi ne bua kutangila tshilumbu atshi ne kutshijikija. Mulume yeye usomba pamue ne mukajende, badi bashemeja malanda abu ne mu kuamba kuimpe, badi balua “mubidi umue.”​—Genese 2:24.

Mudi bamue batumikile mubelu eu: Andrew * ne mukajende Tanji ba mu Australie, mbaselangane kukadi bidimu dikumi. Andrew udi wamba ne: “Ndi mumone ne: kupitshisha dîba dia bungi ku mudimu anyi mu balunda kudi mua kunyanga dibaka. Nunku meme ne mukajanyi tutu tuditekela dîba dia kuyukila ne kulejangana malu etu.”

Dave ne mukajende Jane ba mu États-Unis; mbaselangane kukadi bidimu 22. Dilolo dionso batu bayukila mu minite 30 bua kuambilangana malu adibu bapete ne kupeshangana ngenyi. Jane udi wamba ne: “Katuena mua kulekela bua bualu kampanda butupangishe tshikondo tshimpe tshia nunku to.”

2

LUTATU:

“Katshitu kabidi ungenzela malu antu musue kumbelu eku to.”

TSHIDI BIBLE WAMBA:

‘Muntu kakebi mua kudisankisha, kadi akebe mua kusankisha mukuabu.’​—1 KOLINTO 10:24.

Muntu udi ujinga anu bua muena dibaka nende amuenzele tshidiye musue kumpala, kakupeta anu disanka dilelela to nansha yeye muselulule anyi musedibue njila ne njila. Dibaka didi dienda bimpe anu padi yonso wa kudibu uditatshisha bua kuenzela mukuende bimpe pamutu pa kuindila bua mukuabu amuenzela yeye. Ke tshiakaleja Yezu pakambaye ne: “Disanka dia kupa ndipite dia kupeta.”​—Bienzedi 20:35, MMM.

Mudi bamue batumikile mubelu eu: Maria ne  Martin ba mu Mexique, mbaselangane kukadi bidimu 39. Nansha nanku malu onso kaavua anu enda bimpe to. Badi bavuluka tshimue tshikondo tshivuabu ne lutatu kampanda. Maria udi wamba ne: “Dimue dituku patuvua tukokangana bikole, ngakamba Martin dîyi dibi. Kufikaye munda bikole. Ngakajinga kumumvuija ne: kavua mumvue tshimvua musue kuamba to, mvua muakule mu tshiji. Kadi kavua musue kunteleja to.” Martin pende udi wamba ne: “Mu matandu amu, ngakela meji ne: katuakusomba kabidi ne mukaji eu to ne tshiakuenza kabidi bualu nansha bumue bua kuakaja nsombelu wa mu dibaka to.”

Martin uvua ujinga bua mukajende amunemeke. Maria pende uvua ujinga bua bayende amuteleje. Kadi kakuvua uvua mupete tshivuaye musue to.

Kadi bakajikija tshilumbu etshi bishi? Martin udi wamba ne: “Ngakatuyisha tshilunji, ne tuetu bonso kupangadija bua kutumikila mibelu ya mu Bible ivua itulomba bua kunemekangana ne kuenzelangana malu mimpe. Pakapita matuku, tuetu kumona ne: nansha tuetu bapete ntatu ya mushindu kayi, tudi mua kuyitantamena tuetu tulomba Nzambi bua atuambuluishe ne tutumikila mibelu idi mu Bible.”​—Yeshaya 48:17, 18; Efeso 4:31, 32.

3

LUTATU:

“Kena ukumbaja midimu yende to.”

TSHIDI BIBLE WAMBA:

‘Buonso buetu, muntu ne muntu, neabadile malu ende kudi Nzambi.’​—LOMO 14:12.

Kakuyi mpata, dibaka kadiakuenda bimpe padi anu muntu umue uditatshisha bua kuyadi kumpala to. Kadi malu adi mua kunyanguka bikole bikale bena dibaka bonso kabayi bakumbaja midimu yabu bimpe anyi belangana tshilumbu pambidi.

Wewe muimanyine anu pa tshidi muena dibaka nebe ne bua kukuenzela, kuakuikala ne disanka to. Bidi mua kuenzeka nanku nangananga wewe wimanyina pa bilema bia muena dibaka nebe bua kubenga kukumbaja majitu ebe. Kadi wewe uditatshisha bua kuikala mulume anyi mukaji muimpe, nsombelu wa mu dibaka dienu nealengele. (1 Petelo 3:1-3) Tshia mushinga ntshia ne: udi uleja Nzambi muudi unemeka mushindu udiye mulongolole dibaka ne malu audi wenza neamusankishe bikole.​—1 Petelo 2:19.

Mudi bamue batumikile mubelu eu: Kim ne bayende ba mu Corée, mbaselangane kukadi bidimu 38. Kim udi wamba ne: “Imue misangu bayanyi utu umfikila munda ne unjila, kadi tshitu mumanye ne: mbua tshinyi to. Meme kutuadija kuela meji ne: katshiena munnange bu kumpala to. Mvua imue misangu ndiebeja ne: Bua tshinyi mmusue meme ngikale mmumvuila padi yeye kayi uditatshisha bua kungumvuila?”

Kim uvua wimanyina anu pa bilema bia bayende ne pa malu avuaye kayi umuenzela. Kadi wakalua kushintuluka. Udi wamba ne: “Pamutu pa kulama tshiji, ngakamona ne: mbimpe meme ngikale wa kumpala bua kukeba ditalala. Mpindieu, tuetu bonso tudi bakumane bua kudikanda ne kuyukila mu ditalala.”​—Yakobo 3:18.

 4

LUTATU:

“Mukajanyi katu unkokela to.”

TSHIDI BIBLE WAMBA:

‘Mutu wa mulume yonso udi Kristo’​—1 KOLINTO 11:3.

Mulume udi umona ne: mukajende katu umukokela udi ne bua kuanji kukonkonona bikalaye yeye utu musue kukokela mfumuende Yezu Kristo. Udi mua kuleja mudiye ukokela padiye ulonda tshilejilu tshia Yezu.

Mupostolo Paulo wakafunda ne: ‘Balume, suayi bakaji benu bu muakasua Kristo ekeleziya kabidi, wakadifila bua bualu buende.’ (Efeso 5:25) Yezu kavua ‘utumine [bayidi bende] dîyi’ to. (Mâko 10:42-44, MMV) Uvua ubambila patoke tshia kuenza ne ubabela pavuabi bikengedibua. Kavua ne malu makole to. Uvua ubenzela malu mimpe ne kavua ubalomba malu avuabu kabayi mua kukumbaja to. (Matayo 11:29, 30; Mâko 6:30, 31; 14:37, 38) Misangu yonso uvua uteka disanka diabu kumpala kua diende.​—Matayo 20:25-28.

Mulume yonso adiebeje ne: ‘Ndiku mmona bumfumu buanyi ne bantu bakaji bonso bilondeshile bilele bia muaba undi musombele anyi bilondeshile mibelu ne bilejilu bidi mu Bible?’ Tshilejilu, udi wela meji kayi bua mukaji udi ubenga tshidi bayende wamba kadi umuleja luende lungenyi ne muoyo umue ne kanemu kuonso? Mu Bible badi baleja muvua Sala mukaji wa Abalahama muikale tshilejilu tshimpe bua dikokela. (1 Petelo 3:1, 6) Nansha nanku, wakaleja wende muenenu pavuabi bikengedibua pavua Abalahama kayi mumone njiwu kampanda ivua mua kukuata dîku diende.​—Genese 16:5; 21:9-12.

Mu bulelela Abalahama kavua umuzakeja bua kumupangisha bua kuakulaye to. Kavua muena malu makole to. Bia muomumue, mulume udi utumikila mibelu ya mu Bible kakuenzeja mukajende malu ku bukole anyi kumuenzeja bua amukokele ne mu tumalu tukese to. Mukajende neamunemeke yeye ulombola dîku bimpe ne uditeke pa muaba wa mukajende ne umumvuila.

Mudi bamue batumikile mubelu eu: James, wa mu Angleterre udi musela kukadi bidimu muanda mukulu udi wamba ne: “Ndi mulonge bua kuanji kuyukila ne mukajanyi kumpala kua kuangata mapangadika manene. Tshitu nkeba kuenza anu malu adi ansankisha meme to. Kadi ntu musue kuteka majinga ende kumpala kua anyi.”

Georges wa mu États-Unis, mmusele kukadi bidimu 59. Udi wamba ne: “Ntu nditatshisha bua kumona mukajanyi bu muena dianyi wa lungenyi kadi ki bu muntu mushadile to.”​—Nsumuinu 31:10.

 5

LUTATU:

“Bayanyi katu ulombola dîku bimpe to.”

TSHIDI BIBLE WAMBA:

“Mukaji wa meji udi wakaja nzubu wende, kadi mutatakane udi upula wende nzubu yeye muine ne bianza biende.”​—NSUMUINU 14:1, MMM.

Bikala bayebe kayi wangata mapangadika peshi kayi ulombola dîku bimpe, neudimone kumpala kua malu asatu aa: (1) Kumutalula bilema misangu yonso (2) kuangata muaba wende bua kulombola dîku peshi (3) kuikala umuela tuasakidila bua bionso bidiye wenza. Wewe musungule bua kuenza malu abidi a kumpala aa, neupule nzubu webe wewe nkayebe. Kadi wewe musungule bua kuenza bualu buisatu, newibake ne neukoleshe dibaka diebe.

Balume ba bungi batu basue bakaji babu babanemeke bikole kupite ne mudibu babanange. Nunku wewe wenza bua bayebe amone ne: udi umunemeka, tuamba ne: wenza bua amone ne: malu adiye wenza bua kulombola dîku mmimpe ne uanyisha, neambule bujitu buende bimpe. Bulelela, udi mua kupangakana ku mêyi ne bayebe pa malu kampanda imue misangu. Bubidi buenu nudi ne bua kuyukila bua malu aa. (Nsumuinu 18:13) Kadi mêyi anudi nuakula nawu ne mushindu unudi nuakula ke bianuambuluishe bua kupula anyi kuibaka dibaka dienu. (Nsumuinu 21:9; 27:15) Wewe wambila bayebe malu ne kanemu, neupete tshiuvua natshi dijinga, mbuena kuamba ne: kuikala ne mulume udi ulombola dîku bimpe.

Mudi bamue batumikile mubelu eu: Michele wa mu États-Unis mmusedibue kukadi bidimu 30. Udi wamba ne: “Bu muvua maman wanyi mutukoleshe meme ne bakunyi banyi ba bakaji babidi nkayende, uvua mukaji wa dikanda ne uvua udiangatshila mapangadika. Mvua musue kuikala kumuidikija. Nanku mvua ne bua kuikala nditatshisha bua kukokela. Tshilejilu, ndi mulonge bua kuanji kuyukila ne bayanyi pamutu pa meme kudiangatshila mapangadika.”

Rachel wa mu Australie mmusedibue kukadi bidimu 21 ne uvua pende wenza malu bilondeshile nkoleshilu wa kuabu. Udi wamba ne: “Maman wanyi kavua ukokela papa to, kabavua bamona dikokangana ne dipanga kunemekangana bu bualu to. Patshivuabu banselelaku, mvua ngenza malu anu bu maman. Kadi pakapita bidimu, ngakamona ne: kutumikila mibelu ya mu Bible idi ilomba bua kunemekangana kudi ne mushinga. Mpindieu, meme ne Mark tudi ne disanka dia bungi mu dibaka dietu.”

6

LUTATU:

“Malu atuye ungenzela kumbelu eku akadi mantonde.”

TSHIDI BIBLE WAMBA:

‘Nulejangane lutulu, nulekelelangane mibi yenu, bikala muntu ne mukuabu tshilumbu.’​—KOLOSAI 3:13.

Panutshivua nutantshilangana, uvua pamuapa wimanyina anu pa ngikadilu mimpe ya mubangila webe nansha muuvua mumone bimpe bilema biende. Kuenaku mua kuenza kabidi nanku mpindieu anyi? Mu kuamba kuimpe,  bayebe anyi mukajebe utu ukuenzela malu atu akubungamija. Nunku, diebeja ne: ‘Nengimanyine pa ngikadilu kayi ya muena dibaka nanyi; ya mimpe peshi ya mibi?’

Yezu wakafila tshilejilu tshidi tshilenga ku muoyo tshidi tshileja mushinga wa kubuikidila bakuabu bilema biabu. Wakakonka ne: ‘Udi utangidila kasonsa kadi mu dîsu dia muanenu tshinyi, kuyi utangila mutshi munene udi mu dîsu diebe?’ (Matayo 7:3) Kasonsa kadi mua kuikala katupa ka dishinda. Kadi mutshi munene udi mua kuikala mukamba udibu bimanyika nawu musaka wa nzubu. Ke kuambaye ne: ‘Diambedi umushe mutshi munene udi mu dîsu diebe, nunku neumone bimpe mua kumusha kasonsa kadi mu dîsu dia muanenu.’​—Matayo 7:5.

Yezu udi utuadija tshilejilu tshiende ne didimuija dia mushinga mukole. Wakamba ne: ‘Kanulumbuludi malu adi munda mua bantu bakuabu, nunku bobu kabena balumbulula malu adi munda muenu. Nebalumbulule malu adi munda muenu bu munudi nulumbulula malu adi munda muabu.’ (Matayo 7:1, 2) Wewe musue bua Nzambi akubuikidile bilema biebe anyi mutshi munene udi mu dîsu diebe, mbimpe wanji kubuikidila muena dibaka nebe biende bilema.​—Matayo 6:14, 15.

Mudi bamue batumikile mubelu eu: Jenny wa mu Angleterre mbaselangane ne Simon kukadi mpindieu bidimu tshitema. Udi wamba ne: “Bumue bualu butu butamba kumfikisha munda mbua ne: bayanyi katu ulongolola malu kumpala kua dîba to, utu uenza anu mu minite ya ndekelu. Bidi binsekesha, bualu patuvua tutantshilangana, mvua musue pavuaye ungenzela malu amvua mmulombe diakamue. Nunku ndi mulue kumona ne: meme panyi ndi ne bilema. Tshilejilu, ntu musue bua bakuabu benze anu tshindi meme musue. Meme ne Simon tudi balonge bua kubuikidilangana tubilema tuetu.”

Curt bayende wa Michele utukadi batele udi wamba ne: “Wewe wimanyina anu pa bilema bia muena dibaka nebe, neumone bilema abi bu bidi anu bienda bidiunda. Ntu musue kuimanyina pa ngikadilu ivua minsake bua kunanga Michele.”

Tshinudi mua kuenza

Bilejilu bikese ebi bidi bileja ne: bilumbu bidi mua kujuka mu dibaka kadi kudi anu mushindu wa kubijikija. Tshia kuenza ntshinyi? Nanga Nzambi bikole ne ikala utumikila mibelu idi mu Bible Dîyi dia Nzambi ne disanka.

Mubelu eu ke uvua Alex ne Itohan badi mu Nigeria ne baselangane kukadi bidimu bipite pa 20 batumikile. Alex udi wamba ne: “Ndi mufike ku dimona ne: mulume ne mukajende bobu batumikila mibelu ya mu Bible badi mua kujikija bilumbu bia mu dibaka pamue ne bionso.” Mukajende udi wamba pende ne: “Tudi bamone mushinga wa kusambila pamue pa tshibidilu ne wa kutumikila mibelu ya mu Bible idi yakula bua kunangangana bikole ne kulejangana lutulu. Mpindieu tudi ne bilumbu bikese kupita bituvua nabi patutshivua tuselelanganaku.”

Udiku musue kumanya malu makuabu adi aleja mudi kutumikila mibelu ya mu Dîyi dia Nzambi mua kuambuluisha dîku diebe anyi? Nanku, lomba Bantemu ba Yehowa bua nuyukile nabu malu adi mu nshapita wa 14 wa mukanda wa Bible utu ulongesha tshinyi menemene? *

[Mêyi adi kuinshi]

[Tshimfuanyi mu dibeji 4]

Tutu tukebaku dîba dia kusomba pamue anyi?

[Tshimfuanyi mu dibeji 5]

Ntu ntambaku kuenzela bakuabu bimpe anyi?

[Tshimfuanyi mu dibeji 6]

Ndiku wa kumpala ku dijikija bilumbu anyi?

[Tshimfuanyi mu dibeji 7]

Ntu nyikilaku ne mukajanyi kumpala kua kuangata dipangadika kampanda anyi?

[Tshimfuanyi mu dibeji 9]

Ntu ngimanyinaku pa ngikadilu mimpe ya muena dibaka nanyi anyi?