FUANYIKIJA mudi Nowa olola mongo ne utandabaja miskele yende. Mudiye musombe pa mukamba wa dibaya muikishe utangila buatu bunene budiye muenze. Umona mudi mishi ya kabudimbu yende ibanda ne mitoyi ya biamu bivuaye wenza nabi mudimu yumvuika. Nowa uvua mua kumona kumbukila pa muaba udiye musombe mudi bana bende benza mudimu mukole mu dienza dia buatu ebu. Bana bende ne bakaji babu ne mukajende bakenza nende mudimu eu pamue bidimu bia bungi. Bakavua benze tshitupa tshia mudimu, kadi kuvua kushale tshitupa tshinene tshia kujikija.

Bantu ba mu buloba abu bavua bela meji ne: Nowa ne bena mu dîku diende bavua bajimije lungenyi. Pavua mudimu wa buatu wenda uya kumpala, bantu bavua babaseka bua lungenyi lua ne: mvula wa kabutu neikale mua kuloka pa buloba bujima. Bantu bavua bamona kabutu kavua Nowa ubambila bu bualu buvua kabuyi mua kuenzeka to. Bavua bamona mudimu mukole uvua Nowa ne bena mu dîku diende benza bu mudimu wa tshianana. Kadi Yehowa, Nzambi wa Nowa kavua umona mudimu uvuabu benza mu mudimu wa tshianana to.

Dîyi dia Nzambi didi diamba ne: ‘Nowa wakenda ne Nzambi mulelela.’ (Genese 6:9) Bidi bisua kumvuija tshinyi? Kabiena bisua kumvuija ne: Nzambi uvua wenda ne Nowa pa buloba apa, anyi ne: Nowa uvua muye mu diulu bua kuenda ne Nzambi to. Kadi Nowa uvua mutumikile Nzambi wende mu malu onso ne mushindu uvuaye mumunange bikole bivua bienze anu bu ne: yeye ne Yehowa bavua bendakana pamue bu balunda. Bidimu bia bungi pashishe, Bible wakamba bua Nowa ne: “Ku diambuluisha dia ditabuja [diende] wakapisha ba pa buloba.” (Ebelu 11:7) Mmunyi muvuaye mupishe ba pa buloba? Ntshinyi tshitudi mua kulongela ku ditabuja diende lelu?

Nowa uvua mukole mu buloba buvua malu mabi enda avulangana ne lukasa. Malu mabi avuaku kabidi mu tshikondo tshia kakuende Henoka, muntu muakane mukuabu uvua muende ne Nzambi. Henoka uvua mumanyishe ne: dituku dia dilumbuluisha divua ne bua kufikila bantu ba pa buloba bavua kabayi balamate Yehowa. Mu tshikondo tshia Nowa malu mabi avua mapite bungi. Nunku ku mêsu kua Yehowa buloba buvua bunyanguke bualu buvua buule tente ne malu mabi. (Genese 5:22; 6:11; Yuda 14, 15) Ntshinyi tshivua tshienze bua se: malu anyanguke bikole?

Banjelu bakuabu ba Nzambi bavua ne lungenyi lubi. Umue wa kudibu ukavua mutombokele Yehowa, kuluaye Satana Diabolo pavuaye mushiminyine Nzambi malu ne musake Adama ne Eva bua kuenza bubi. Mu tshikondo tshia Nowa, banjelu bakuabu bakatombokela bumfumu bua Yehowa. Bakalekela miaba yabu ya mu diulu, kuluabu pa buloba ne kuvualabu mibidi ya buntu ne kuangatabu bakaji bavua bimpe pa buloba bu bakaji babu. Banjelu batomboke aba bakasaka bantu ku dienza malu mabi.​—Genese 3:1-5; 6:1, 2; Yuda 6, 7.

Nunku, banjelu bakangata bakaji ba pa buloba, pabi Nzambi kavua mulongolole bua bikale nanku to, ne kulelabu nabu bana banene bale bavua ne bukole bupite bungi. Bible udi ubabikila ne: ba Nefilime dîna didi diumvuija ku muaku ku muaku ne: “Bashindishanganyi,” badi bakulula bakuabu. Bu muvua ba Nefilime ne tshikisu tshia bungi, bakuuja buloba ne malu mabi. Ke bualu kayi ku mêsu kua Mufuki, ‘mibi ya bantu  ivua idiundadiunda munkatshi mua ba pa buloba ne meji avuabu bela mu mitshima yabu avua mabi matuku onso.’ Yehowa wakangata dipangadika dia kubutula bantu babi pavua bidimu 120 bikumbana.​—Genese 6:3-5.

Elabi meji muvuabi lutatu bua kukolesha bana mu buloba bua mushindu eu! Kadi Nowa wakakolesha bende bana mu buloba abu. Wakapeta mukaji muimpe. Pakakumbaja Nowa bidimu 500, mukajende wakamulelela bana ba balume basatu aba: Shema, Hama ne Yafete. * Nowa ne mukajende bavua ne bua kukuba bana babu ku malu mabi avua enzeka muaba uvuabu basombele. Bana batu bajinga bikole “bantu banene” ne “ba butumbi” pabi ke muvua ba Nefilime. Bivua mua kuikala bikolele Nowa ne mukajende bua kuambuluisha bana babu bua kabajingi malu a kukema avua bantu ba mpolondo abu benza, kadi bavua babalongesha bulelela budi butangila Yehowa Nzambi utu mukine malu mabi a mishindu yonso. Bavua ne bua kuambuluisha bana babu bua kumona ne: Yehowa mmukine malu mabi a tshikisu ne a buntomboji avua pa buloba.​—Genese 6:6.

Baledi ba lelu badi mua kuditeka pa muaba wa Nowa ne mukajende. Buloba buetu ebu mbuule tente ne malu a tshikisu ne a butomboji. Nansha mushindu udi bana bajikija lutetuku udi pawu mua kuikala munyanga ne malu a mushindu eu. Baledi ba meji badi benza muabu muonso bua kuambuluisha bana babu bua kabaponyi mu malu a mushindu eu padibu babalongesha malu a Yehowa, Nzambi wa ditalala, wikala ne bua kujikija malu onso a tshikisu. (Musambu 11:5; 37:10, 11) Kudi mushindu wa bana kumanya mua kuenza malu mimpe. Nowa ne mukajende bavua bambuluishe bana babu bimpe. Bana babu ba balume aba bakakola kuluabu bantu bimpe, ne kuselabu bakaji bavua pabu basue kuenza disua dia Yehowa, Nzambi mulelela mu nsombelu wabu.

Dikuabu dituku, nsombelu wa Nowa wakashintuluka kashidi. Yehowa wakambila musadidi wende uvuaye munange bikole dijinga Diende dia kubutula bantu babi ba mu tshikondo atshi. Nzambi wakambila Nowa ne: “Enza biebe buatu ne mutshi wa gopher.”​—Genese 6:14.

Buatu ebu kabuvua bu mazuwa a mâyi bu mudi bamue bela meji. Kabuvua ne ku mutu anyi ne kuinshi, kubuvua mua kuela tshibenda bu buatu buetu bua tshianana ebu to. Buvua bu mushete munene anyi tshizubuzubu. Yehowa uvua muleje Nowa bunene buvua buatu ebu ne bua kuikala, amue malu avua atangila mushindu uvuaye mua kulaba kabudimbu munda ne pambelu pa buatu. Wakambila Nowa tshivuaye musue kuenzela nanku, wamba ne: ‘Nendokeshe mâyi a bungi pa buloba. Tshintu tshionso tshidi ne muoyo pa buloba netshifue.’ Kadi Yehowa wakaleja Nowa bualu ebu: ‘Wewe neubuele mu buatu ne bana bebe balume ne mukajebe ne bakaji ba bana bebe.’ Nowa uvua kabidi ne bua kubueja mu buatu ebu mishindu yonso ya nyama. Anu nyama ivua mu buatu ke ivua mua kupanduka ku Mvula wa kabutu!​—Genese 6:17-20.

Nowa uvua mudimone ne mudimu wa bungi wa kuenza. Buatu ebu buvua bunene bikole, buvua bule bua metre 133, bunene bua metre 22 ne butumbuke buvua metre 13. Buvua bunene bikole bupite ne matu manene a mitshi a mu tshikondo tshietu etshi. Nowa uvuaku mutshine mudimu uvuabu bamupeshe eu anyi mudiabakene bua bukole bua mudimu peshi mujinge bua kuenza buatu muvuaye musue anyi?  Bible udi wamba ne: ‘Nowa wakenza nunku; wakenza mianda yonso yakamuambila Nzambi.’​—Genese 6:22.

Mudimu eu uvua muangate bidimu bia bungi, pamuapa bidimu 40 anyi 50. Kuvua mitshi ya kukosa, kukosolola, kuyenza mabaya ne kuyikuatakaja bimpe. Buatu ebu buvua ne bisasa bisatu, bukosolola munda ne tshiibi ku luseke. Buvua ne madidishi ku nseke yonso ya muulu, pa mutu pabu pavua pasongoloke ndambu bua mâyi ikale apueka lubilu.​—Genese 6:14-16.

Pavua bidimu bienda bipita ne buatu buenda bujika, Nowa uvua mua kuikala ne disanka bua muvua bena mu dîku diende bamuambuluishe. Kuvua mudimu mukuabu uvua ne lutatu lukole kupita kuenza kua buatu. Bible udi utuambila ne: Nowa uvua “muyishi wa buakane.” (2 Petelo 2:5) Wakadimuija ne dikima dionso bantu babi bavua kabayi banemeka mikenji ya Nzambi bua kabutu kavua ne bua kubafikila. Bantu bakitabuja didimuija edi anyi? Yezu Kristo wakavuluka malu a tshikondo atshi e kuamba ne: bantu “kabakateyaku ntema.” Wakamba ne: bavua badifila bikole ku malu a mu nsombelu wa dituku dionso bu mudi: kudia, kunua ne kusela anyi kusedibua kabayi bateya ntema ku bivua Nowa ubambila to. (Matayi 24:37-39) Kakuyi mpata bantu ba bungi bavua bamuseka yeye ne bena mu dîku diende; bamue bavua bamukengesha ne babenga bivuaye wamba ne tshikisu tshionso.

Kadi Nowa ne bena mu dîku diende kabakapingana tshianyima to. Nansha muvuabu mu buloba muvua bantu baditue mu dikeba bintu bia ku mubidi, Nowa ne bena mu dîku diende bavua bobu batungunuke ne kuibaka buatu nansha muvua bantu bavua babanyunguluke baumona bu mudimu wa lukutukutu wa bantu batatakane. Lelu mêku a bena Kristo adi pawu mua kulonga mua kupita ne ntatu ku diambuluisha dia ditabuja dia Nowa ne bena mu dîku diende. Tudi bamanye ne: tudi mu tshikondo tshidi Bible ubikila ne: “matuku a ku nshikidilu” kua bulongolodi ebu. (2 Timote 3:1) Yezu wakamba ne: tshikondo tshietu etshi netshikale anu bu tshikondo tshivua Nowa wibaka buatu. Padi bantu ba mu bulongolodi ebu batupetula, batuseka anyi batukengesha bua lumu luimpe lua Bukalenge bua Nzambi, tudi ne bua kuvuluka Nowa. Bena Kristo ki mba kumpala ba kutuilangana ne ntatu eyi to.

Pavua bidimu bienda bipita, buatu buvua buenda bujika ndambu ndambu. Pavua Nowa pabuipi ne tshidimu tshiende tshia 600, wakafuisha bantu bavuaye munange bikole. Tshilejilu, tatuende Lemeke wakafua. * Bidimu bitanu pashishe, Metushela tatuende wa Lemeke, kakuende wa Nowa wakafua ne bidimu 969; yeye ke uvua mulale bidimu bia bungi bilondeshile miyuki ya mu Bible. (Genese 5:27) Metushela ne Lemeke bavua ba mu tshikondo tshia Adama muntu wa kumpala.

Anu mu tshidimu atshi, Yehowa Nzambi wakambila Nowa ne: ‘Buela biebe mu buatu ne bantu bonso ba mu nzubu muebe.’ Anu dîba adi, Nzambi wakambila Nowa bua kubuela ne mishindu yonso ya nyama mu buatu. Uvua ne bua kubueja nyama muanda mutekete mimpe milume ne mikaji; ivua mikumbane bua kulambula Nzambi, ne ivua mishale ivua kayiyi mimpe uvua uyibueja ibidi ibidi mulume ne mukaji.​—Genese 7:1-3.

Tshivua ne bua kuikala mudimu mukole mutambe. Nyama ivua ulua bisumbu bisumbu; kuvua ivua yenda, mikuabu ibuka, mikuabu ilamba panshi, mikuabu yela tu bidia lubilu lubilu ne mikuabu yenda bitekete; ivua mishilangane ku bunene, ku tshimuenekelu tshiayi ne mikuabu ivua yenza buôwa ku mêsu. Elabi meji mudimu uvua nawu Nowa wa kusangisha nyama eyi, wenda ubembeleja nyama ya tshisuku ivua ne luonji bua ibuele mu buatu ne isombe bimpe muaba umue. Bible udi wamba ne: ‘Biakabuela ne Nowa mu buatu.’​—Genese 7:9.

Bamue bena mpata badi mua kuebeja ne: ‘Mmunyi mudi bualu bua mushindu eu mua kuenzeka? Mmunyi mudi nyama yonso eyi mua kusomba kaba kakese  mu ditalala?’ Tuanji tuelabi meji bua bualu ebu: bidiku mua kukolela Mufuki wa diulu ne buloba bua kulama nyama idiye mufuke, anyi kuyivuija nyama ya ditalala padibi bikengedibua anyi? Tuvuluke ne: Yehowa ke n’Nzambi uvua mukosolole mâyi a Mbuu Mukunze ne muimanyike dîba. Kavuaku mua kukumbaja bualu buonso budi mu muyuki wa Nowa anyi? Bushuwa, mmukumbane bua kuenza nanku ne ke muvuaye muenze!

Nzambi uvua kabidi mua kusungila nyama ivuaye mufuke mu mushindu mukuabu. Kadi wakasungula mushindu muimpe udi utujadikila ne: uvua mupeshe bantu bukokeshi katshia ku ntuadijilu bua kukuba bintu bionso bidi ne muoyo pa buloba ebu. (Genese 1:28) Baledi ba bungi lelu badi bakuata mudimu ne muyuki wa Nowa bua kulongesha bana babu mushindu udi Yehowa wangata bantu ne nyama bidiye mufuke ne mushinga wa bungi.

Yehowa wakambila Nowa ne: kuvua kushale lumingu lumue bua Mvula wa kabutu kuloka. Tshivua tshikondo tshia pa buatshi bua dîku dia Nowa. Anji elabi meji bua mudimu uvua nawu Nowa wa kubueja mu buatu nyama yonso ne biakudia biayi bilondeshile mishindu yayi ne kubueja bintu bia bena mu dîku diende. Mukaji wa Nowa ne mukaji wa Shema ne wa Hama ne wa Yafete bavua mua kuikala badifile bikole bua kuakaja muaba uvuabu mua kusombela mu buatu.

Ntshinyi tshiakenza bantu ba muaba awu? “Kabakateyaku ntema” nansha muvuabu bamone bijadiki bionso bia ne: Yehowa uvua wenda ubenesha Nowa ne midimu yende. Nansha muvuabu kabayi bateya ntema, bavua bamona muvua nyama ibuela mu buatu. Mmuenenu wabu kena mua kutukemesha to. Lelu eu, bantu kabena bateya ntema patudi tubajadikila ne: tukadi lelu ku matuku a ku nshikidilu wa bulongolodi ebu. Anu muvua Petelo mudianjile kuamba, baseki nebalue ne tuseku tuabu bua kuseka aba badi bafila didimuija dia kudi Nzambi. (2 Petelo 3:3-6) Ke muvua kabidi bantu baseke Nowa ne bena mu dîku diende.

Tuseku etu tuakajika tshikondo kayi? Bible udi utuleja ne: dîba divua Nowa mubuele mu buatu ne bena mu dîku diende ne nyama yonso ‘Yehowa wakakanga tshiibi.’ Bualu buvua Yehowa muenze ebu buakapuwisha basekianganyi aba bikalabi bavua muaba au. Bikalabi kabiyi bienzeke nanku, mvula wakabapuwisha bualu wakaloka. Wakaloka, kuloka, kuloka bikole, mâyi kuula buloba tente anu muvua Yehowa muambe.​—Genese 7:16-21.

Yehowa uvuaku musanke bua lufu lua bantu babi anyi? Tòo! (Yehezekele 33:11) Bualu uvua mubashile mpunga bua kushintululabu nsombelu wabu. Bavuaku benze bualu ebu anyi? Nsombelu wa Nowa udi wandamuna lukonko elu. Bu muvua Nowa wenda ne Yehowa ne umutumikila mu malu onso, wakaleja ne: kuvua mushindu wa kushala ne muoyo. Mu mushindu eu, bua ditabuja diende wakapisha ba pa buloba ba mu tshikondo tshiende; nunku nsombelu mubi uvua nende bantu ba mu tshikondo tshiende aba, wakamueneka patoke. Ditabuja diende diakamupandisha yeye ne ba mu nzubu muende. Wewe muidikije ditabuja dia Nowa, udi pebe mua kudisungila ne kusungila bantu baudi munange. Anu bu Nowa, udi pebe mua kuenda ne Yehowa Nzambi bu mulunda webe. Ne bulunda buenu ebu budi mua kushala kashidi ne tshiendelele.