NOA ne bena mu dîku diende bavua badikunguije pamue pavua mvula mukole uloka. Fuanyikijabi ubamona bateke bintu biabu panshi mu buatu mu bukenke bua muendu wa mafuta, benda bakema muvuabu bumvua mâyi a mvula atuta pa mutu pa buatu ne ku nseke yabu. Mitoyi ya mvula ivua ne bua kuikala mikole.

Padi Noa utangila bena mu dîku diende, mbuena kuamba ne: mukajende ne bana bende ba balume basatu ne bakaji babu, kakuyi mpata, udi umvua disanka dia bungi. Mu tshikondo tshikole atshi, wakapeta disanka pa kumona bena mu dîku diende bavuaye munange bikole mu buatu. Buonso buabu bavua bapande. Kakuyi mpata, wakaleja Nzambi dianyisha pavuaye musambile kumpala kua bena mu dîku diende ne dîyi dikole bua bumvue bu muvua mvula uloka bikole.

Noa uvua muntu wa ditabuja dikole. Ditabuja dia Noa divua disake Yehowa Nzambi wende bua kumukuba ne bena mu dîku diende. (Ebelu 11:7) Kadi dijinga diabu dia kuikala ne ditabuja divuaku dijike pavua mvula mutuadije kuloka anyi? Tòo, bavua dijinga ne ngikadilu eu bua ntatu ivua mibindile kumpala. Bidi mua kuikala bia muomumue buetu tuetu mu tshikondo etshi tshia ntatu mikole. Nunku tukonkononayi malongesha atudi mua kupetela ku ditabuja dia Noa.

Mvula wakatungunuka ne kuloka pambelu ‘munya ne butuku too matuku makumi anayi.’ (Genese 7:4, 11, 12) Mâyi akatungunuka ne kubanda, kubanda, kubandawu bikole. Pavua mâyi enda abanda, Noa uvua mumone muvua Yehowa Nzambi wende mukube bantu bakane ne munyoke benji ba malu mabi.

Mvula wa kabutu uvua mujikije butomboji buvua banjelu bajule. Bu muvua Satana ne lutambishi, wakasaka banjelu ba bungi bua kulekelabu “muaba wabu wa kusomba” mu diulu bua kusomba ne bakaji ba pa buloba, ne kulelabu bana bavuabu babikila ne: ba Nefilime. (Yuda 6; Genese 6:4) Kakuyi mpata, Satana uvua musanke bikole pavua buntomboji ebu bujuke, bualu buvua bunyanga bantu bavua Yehowa mufuke pa buloba.

Kadi pavua mâyi a mvula enda abanda, banjelu batomboke aba bavua benzejibue bua kulekela mibidi yabu ya buntu ne kupingana mu muaba wa mu nyuma, ne kabena mua kuangata kabidi mubidi wa buntu to. Bavua balekele bakaji babu ne bana babu bua kufuabu mu mvula wa kabutu pamue ne bantu babi ba tshikondo atshi.

Kumbukila mu matuku a Henoka, bidimu bitue ku nkama muanda mutekete kumpala, Yehowa uvua mudimuije bantu ne: neabutule benji ba malu mabi badi kabayi bamutshina. (Genese 5:24; Yuda 14, 15) Katshia ku tshikondo atshi, bantu bavua anu batukungunuke ne kuenza malu mabi matambe, banyanga buloba ne babuwuja ne malu a tshikisu. Nunku bakababutula. Noa ne dîku diende bavuaku basanke bua muvuabu babutule bantu abu anyi?

Tòo. Nansha Nzambi wa luse kavua musanke to. (Yehezekele 33:11) Yehowa uvua muenze tshivuaye mua kuenza bua kusungila bantu ba bungi. Uvua mubatumine Henoka bua kubadimuija, ne uvua muambile Noa bua kuenza buatu. Noa ne dîku diende bakaditua mu dienza dia mudimu eu mukole mu bidimu bia bungi, ku mêsu kua bantu bonso. Pashishe Yehowa uvua muambile kabidi Noa bua kuikalaye “muyishi wa buakane.” (2 Petelo 2:5) Anu bu Henoka uvua mudimuije bantu kumpala, Noa wakadimuija pende bantu bua kabutu kavua ne bua kulua pa buloba.  Ntshinyi tshivua bantu benze? Yezu uvua mumone malu muvuawu menzeke patshivuaye mu diulu, wakalua kuvuluija bantu bua matuku a Noa wamba ne: “Kabakateyaku ntema too ne pakalua Mvula kubakomba bonso.”​—Matayi 24:39.

Elabi meji muvua nsombelu wa Noa ne dîku diende mua kuikala mu buatu mu matuku makumi 40 kunyima kua Yehowa mumane kukanga biibi bia buatu. Pavua mvula utungunuka ne kudituta bikole pa buatu ku dituku ne ku dituku, buonso buabu muanda mukulu bavua pamuapa batungunuka ne kuenza midimu bu mudi: kuambuluishangana, kulama buatu ne makenda, ne kutabalela nyama yonso ivua munda. Tshikondo kampanda buatu buakatuadija kunyungakana. Buatu buvua anu buenda pa mâyi. Pavua mâyi enda abanda, buatu buvua pabu buenda bubanda, bubanda, bubanda bikole too ne ‘muvuabu buleleme kuulu kule ne buloba.’ (Genese 7:17) Yehowa wakaleja mudiye Nzambi wa Bukole Buonso!

Noa uvua mua kuikala muele Nzambi tuasakidila ki nganu bua muvuaye mumupandishe yeye ne dîku diende, kadi kabidi bua muvua Yehowa muenze nende mudimu bua kudimuija bantu bavua bafua pambelu pa buatu. Mudimu mukole uvuaye mukuate mu bidimu abi uvua mua kuikala umueneka bu wa tshianana mu tshikondo atshi. Bantu kabavua bamuitaba to. Elabi meji, imue misangu kumpala kua Mvula wa kabutu, Noa uvua mua kuikala ne bana babu ba balume ne ba bakaji, ne bana ba ba tatuende mukuabu; kadi bonso buabu kabakamuteleja to, anu bena mu dîku diende. (Genese 5:30) Nunku, pavua bantu aba muanda mukulu mu buatu, bavua mua kuikala mu bulelela bavuluka tshikondo tshivuabu badimuija balela babu bua kupandukabu pabu.

Katshia ku tshikondo tshia Noa too ne mpindieu Yehowa ki mmushintuluke to. (Malaki 3:6) Yezu Kristo wakumvuija ne: matuku etu aa mmafuanangane ne ‘matuku a Noa.’ (Matayi 24:37) Matuku etu aa adi ne malu mabi a bungi ikala mua kukebesha kabutu ka ndongoluelu mubi wa malu eu. Lelu eu, anu bu Noa, bantu ba Nzambi badi badimuija bantu badi mua kuteleja. Newitabe didimuija edi anyi? Biwikala ukavua muitabe mukenji wa bulelela wa lupandu, kuenaku mua kuditua pebe mu didimuija bantu bakuabu anyi? Noa ne bena mu dîku diende mbashile yonso wa kutudi tshilejilu tshimpe.

Pavua buatu buleleme pamutu pa mâyi manene, bantu bavua munda bavua mua kuikala bumvua  mitoyi ya mudi mabaya a buatu enda âba. Noa uvuaku mumvue buôwa bua muvua mavuala atuta ku buatu mafuane mua kubunyanga anyi? Tòo. Meji a buena aa ngadi nawu bantu ba lelu badi ne mpata, kadi Noa kavua ne mpata to. Bible udi wamba ne: ‘Bua ditabuja, Noa wakenza buatu.’ (Ebelu 11:7) Uvua ne ditabuja mu tshinyi? Yehowa uvua mudie tshipungidi ne Noa bua kumupandisha yeye ne bantu bende bonso ku Mvula wa kabutu. (Genese 6:18, 19) Nzambi uvua mufuke diulu ne buloba ne bintu bionso bidipu ne muoyo kavuaku mua kulama buatu bunene ebu kabuyi bunyanguka anyi? Bidi nanku! Bushuwa, Noa uvua mueyemene Yehowa mutuishibue ne: neakumbaje mulayi wende. Eyowa, Noa ne bena mu dîku diende ‘bakasungidibua mu mâyi.’​—1 Petelo 3:20.

Kunyima kua matuku 40 a munya ne butuku mamane kupita, mvula wakakama. Bilondeshile kalandriye ketu ka lelu, uvua mua kuikala mukame mu ngondo wa 12 mu 2370 kumpala kua bikondo bietu ebi. Kadi Noa ne dîku diende bakashala anu mu buatu. Buatu ebu buvua buule ne bifukibua bia muoyo buakashala buleleme pa mâyi manene, pa mutu pa mikuna. (Genese 7:19, 20) Tudi mua kufuanyikija mu lungenyi muvua Noa ne bana bende ba balume Shema, Hama ne Yafete benza mudimu mukole wa kutungunuka ne kudisha nyama, kuyilama ne makenda ne makanda a mubidi. Bushuwa, Nzambi uvua muenze bua nyama yonso ya luonji ikale ne lutulu bua kubuelayi mu buatu, uvua ne bukole bua kuyilama bimpe mu tshikondo tshionso tshivua Mvula wa kabutu * muloke.

Noa wakalonda ne bujalame bonso mushindu uvua malu menzeke. Muyuki wende udi utuambila tshikondo tshivua mvula mutuadije ne tshikondo tshivuaye mukame. Udi uleja kabidi ne: mâyi a mvula avua mabuikile buloba matuku 150. Pashishe, mâyi akatuadija kukepela. Dimue dituku, buatu buakaya kuimanyina pa “mikuna ya Alalata,” muaba udi ditunga dia Turquie lelu elu. Bualu buvua mua kuikala buenzeke mu ngondo muinayi mu 2369 kumpala kua bikondo bietu ebi. Matuku 73 pashishe, mu ngondo muisambombo, nsongo ya mikuna yakatuadija kumueneka. Ngondo isatu pashishe, mu ngondo wa tshitema, Noa wakangata dipangadika dia kumbusha bimue bibuikilu bia pa mutu pa buatu. Nansha muvua mudimu eu mukole, butoke ne kapepele kimpe biakabuela mu buatu. Noa wakatuadija kuteta bua kumona ni kuvua mushindu wa kupatuka mu buatu ne kusomba pa buloba. Wakatuma nyunyi wa tshikololo, uvua muye kayi mualukile, imue misangu uvua mua kuikala mushale mulamate ku mutu wa buatu; pashishe Noa wakatuma nyunyi wa nkutshi uvua uya walukila, uya walukila kudiye too ne muvuaye mulue kuya bua kashidi pavuaye mupete muaba wa kuikila.​—Genese 7:24–8:13.

Kakuyi mpata, Noa uvua utamba kudifila mu malu a mu nyuma. Tudi mua kufuanyikija muvua Noa udisangisha ne bena mu dîku diende misangu ne misangu bua kusambila pamue ne bua kuakula malu adi atangila Tatu wabu wa mu diulu udi ubakuba. Noa uvua weyemena Yehowa bua kuangata dipangadika dia mushinga mukole. Nansha dîba divua Noa mumone ne: “buloba bua kûma”, panyima pa bobu bamane kuenza tshidimu tshijima ne matuku mu buatu, kavua mukangule diakamue tshiibi bua kupatuka mu buatu ebu to. (Genese 8:14) Kadi wakindila dîyi dia Yehowa!

Bamfumu ba mêku lelu badi mua kupeta dilongesha ku tshilejilu tshia muntu wa ditabuja eu. Noa uvua ne bulongame, muenji wa mudimu, uvua ne lutulu ne uvua ukuba bantu bonso bavuaye utangila. Uvua kabidi wangata kuenza disua dia Yehowa Nzambi ne mushinga kumpala kua malu onso. Tuetu bidikije ditabuja dia Noa mu malu aa, Nzambi neabeneshe bantu bonso batudi banange.

Ndekelu wa bionso, Yehowa wakambila Noa ne: ‘Patuka mu buatu, wewe ne mukajebe ne bana bebe balume ne bakaji babu.’ Bena mu dîku dia Noa bonso bakatumikila dîyi edi, ne nyama yonso yakalonda. Mushindu kayi? Mu lukutukutu anyi? Tòo. Bible udi wamba ne: nyama yonso yakapatuka mu ‘mishindu yayi, yakalopoka mu buatu.’ (Genese 8:15-19) Bobu bamane kupatuka mu buatu, kapepa kimpe ka pa mukuna kabatuta ne batangila misoko idi kule ya Alalata, Noa ne mukajende bakamona muvua Nzambi musukule buloba. Ba Nefilime kabatshiyiku kabidi, malu a tshikisu, banjelu bavua batomboke ne benji ba malu mabi bonso bamane kujimina. * Bantu  bavua ne diakalenga dia kutuadija nsombelu mupiamupia.

Noa uvua mumanye tshia kuenza. Wakatuadija kutendelela Nzambi. Wakasa tshioshelu ne kuangataye umue wa ku nyama uvua Nzambi umona ne: mmukezuke, munkatshi mua nyama “muanda mutekete” ivuabu babueje mu buatu, ne kumulambulaye Yehowa bu mulambu wa kuosha. (Genese 7:2; 8:20) Yehowa uvuaku muanyishe ntendelelu eu anyi?

Bible udi wandamuna mu mêyi malenga aa: ‘Yehowa wakanunkila dipembu dimpe.’ Bisama bivua Yehowa mumvue bua muvua buloba buulu tente ne tshikisu biakajika, wakapeta disanka pavuaye umona muvua dîku dia batendeledi ba lulamatu ba pa buloba badisuike bua kuenza disua diende. Yehowa kavua mutekemene bua bikale bapuangane to. Mvese eu udi utungunuka wamba ne: ‘Bantu badi ne meji mabi mu mitshima yabu patshidibu bitende.’ (Genese 8:21) Tukonkononayi muvua Yehowa muleje bantu lutulu ne luse.

Nzambi wakumbusha mulawu uvuaye muele buloba. Pavua Adama ne Eva batomboke, Nzambi wakela buloba mulawu, bua kupatulabu biakudia bivua bualu bukole. Lameke, tatuende wa Noa uvua muinyike muanende dîna Noa, didi diumvuija pamuapa “Dikisha” anyi “Busambi,” ne uvua muambe ne: muanende uvua ne bua kulombola bantu bua bafike ku dikisha ku mulawu eu. Noa uvua ne bua kuikala mupete disanka pakamonaye ne: uvua ne bua kumona dikumbana dia mulayi eu ne buloba buvua ne bua kulua buimpe bua bantu kumonabu mua kubudima. Ke bualu kayi Noa wakatuadija diakamue kudima buloba.​—Genese 3:17, 18; 5:28, 29; 9:20.

Anu mu tshikondo atshi, Yehowa wakapesha ndelanganyi yonso ya Noa mikenji mipepele ivua mua kubalombola mu nsombelu, kubapeshaye kabidi mukenji wa kubenga kushipangana ne wa kubenga kuenza mudimu bibi ne mashi. Nzambi wakadia kabidi tshipungidi ne bantu ubalaya ne: kakubutula kabidi bantu pa buloba ku mvula to. Bua kuleja muvuaye ne bua kukumbaja mêyi ende aa, Yehowa wakapesha bantu tshimanyinu tshia muanza-nkongolo. Katshia ku tshikondo atshi, muanza-nkongolo wonso utudi tumona, udi utuvuluija mulayi wa dinanga uvua Yehowa mutulaye.​—Genese 9:1-17.

Bu muyuki wa Noa muikale wa dishima, muanza-nkongolo kauvua mua kuikala upatuka to. Kadi Noa uvua muntu uvua ne muoyo pa buloba apa, ne nsombelu wende kavua mupepele to. Mu bikondo abi, bu muvua bantu balala matuku a bungi pa buloba, muntu wa lulamatu eu uvua mutuilangane ne ntatu bidimu 350, ne uvua mukenge bikole mu bidimu ebi bionso. Wakenza tshilema tshinene pavuaye mukuatshike maluvu, ne tshilema etshi tshiakafikisha muanende Kanâna ku dienza mpekatu munene, mpekatu uvua mutuadile bena mu dîku dia Kanâna ntatu ya bungi. Noa uvua mulale matuku a bungi pa buloba ne kumona muvua ndelanganyi yende mikuluke mu mpekatu ya ditendelela mpingu ne mu malu a tshikisu mu tshikondo tshia Nimerode. Kadi Noa uvua mumone muvua muanende Sheme mufile tshilejilu tshimpe tshia ditabuja bua dîku diende.​—Genese 9:21-28; 10:8-11; 11:1-11.

Anu bu Noa, tudi ne bua kunanukila mu ditabuja. Padi bakuabu batusaka bua kulekela Nzambi mulelela anyi balekela kumuenzela mudimu, tudi ne bua kunanukila anu bu Noa. Yehowa utu wangata dinanukila dia mushindu eu ne mushinga wa bungi. Anu muvua Yezu Kristo muambe ne: “Udi unanukila too ne ku nshikidilu neasungidibue.”​—Matayi 24:13.