Ndipa dia mushindu kayi didi dikusankisha? Kakuyi mpata, ba bungi ba kutudi batu basanka padi muntu ubapesha tshintu ne dinanga kayi muenzeja ku bukole. Mu tshilumbu tshia dipeshangana bintu, lungenyi lutudi tufila nalu ludi ne mushinga kuditu ne kudi Nzambi. Tukonkononayi mêyi a mupostolo Paulo mafundisha ku nyuma wa Nzambi adi mu 2 Kolinto 9:7.

Bua tshinyi Paulo uvua mufunde mêyi aa? Uvua musue kukankamija bena Kristo ba mu Kolinto bua kufila bintu bua kuambuluisha bena Kristo nabu bavua mu Yudaya bavua bakenga. Uvuaku wenzeja bena mu Kolinto bua kufila bintu ebi anyi? Tòo, ke bualu kayi wakafunda ne: “Muntu ne muntu enze bu mudiye mupangadije mu muoyo wende, kenji ne kanyinganyinga anyi bu muenzeja ku bukole, bualu Nzambi mmunange muntu udi ufila ne disanka.” Tukonkononayi bimpe mubelu eu.

“Bu mudiye mupangadije mu muoyo wende.” Paulo udi uleja ne: muena Kristo mulelela udi upesha bakuabu bintu bualu mmuangate dipangadika “mu muoyo wende” dia kuenza nunku. Muena Kristo eu udi kabidi wela meji bikole bua majinga a bena Kristo nende. Mumanyi kampanda udi wamba ne: muaku wa mu muakulu wa ku ntuadijilu udibu bakudimune ne: “mupangadije” “udi ne lungenyi lua kudianjila kulongolola.” Nunku muena Kristo udi wela meji bua majinga a bena Kristo nende ne ukeba tshidiye mua kuenza bua kubakumbajila majinga awu.​—1 Yone 3:17.

“Kenji ne kanyinganyinga anyi bu muenzeja ku bukole.” Paulo udi uleja mishindu ibidi ya dipeshangana bintu idi kayiyi mimpe bua bena Kristo balelela, mbuena kuamba ne: dielakana ne dienzeja ku bukole. Muaku wa mu tshiena Greke udibu bakudimune ne: “kanyinganyinga” udi umvuija ku muaku ku muaku ne: “dibungama.” Mukanda kampanda udi wamba ne: muntu udi ufila ne kanyinganyinga anyi ne dielakana udi ufila “ne muoyo unyingalala bua mudiye mufile makuta.” Kuenzeja muntu udi ufila nku musaka bua adiumvue muenzejibue bua kufila. Nnganyi wa kutudi utu musue bushuwa bua bamupeshe tshintu kudi muntu udi ufila ne kanyinganyinga anyi muenzeja ku bukole?

“Nzambi mmunange muntu udi ufila ne disanka.” Paulo udi wamba ne: padi muena Kristo wangata dipangadika dia kufila, udi ne bua kufila ne disanka dionso. Bushuwa, disanka didi difumina ku difila ne meji mimpe. (Bienzedi 20:35) Muntu udi ufila ne disanka kena mua kusokoka disanka diende. Nunku, muaku “disanka” udi mua kuleja mushindu udi muntu udi ufila udiumvua munda muende ne mudi tshimuenekelu tshiende. Muntu udi utupesha tshintu ne disanka dionso udi ulenga muoyo wetu. Udi kabidi usankisha Nzambi. Nkudimuinu mukuabu wa Bible udi wamba ne: “Nzambi mmunange bantu badi banange kufila.”​—Contemporary English Version.

Mêyi a mupostolo Paulo mafundisha ku nyuma wa Nzambi adi afila lungenyi ludi bena Kristo ne bua kulonda mu tshilumbu tshia dipeshangana bintu. Nansha patudi tufila dîba dietu, makanda etu ne bintu bitudi nabi, tubifile ne budisuile buonso ne bualu tudi ne disanka dilelela dia kuikala bapeshanganyi ba bintu, nangananga kudi aba badi nabi dijinga. Kupeshangana bintu mushindu eu nekutusankishe ne nekutuvuije balunda ba Nzambi bualu “mmunange muntu udi ufila ne disanka.”