Mvua muledibue mu Riga, tshimenga tshikulu tshia ditunga dia Lettonie. Maman ke uvua mutukoleshe meme ne yayanyi. Nansha muvua mamu muena Katolike, tuvua tuya mu mese anu mu matuku a mafesto. Mvua ngitaba misangu yonso ne: kudi bukole kampanda budi ku mutu kua makole onso, kadi bu muntshivua muana, kuvua malu bakuabu amvua munange bikole.

Pamvua ngenda nkola, mamu uvua mulue kumona ne: mvua ne tshipedi tshia kutulakaja bintu ne kubikuatakaja kabidi. Bu mutuvua ne bintu bia bungi mu nzubu bimvua mua kutulakaja, mamu uvua ne buôwa bua kunshiya nkayanyi mu nzubu. Nunku wakampesha tshiamu tshikuabu tshia luibaku, tshimvua munange bikole bua kukuatakaja ne pashishe kutshitulakaja. Tshipedi etshi tshiakansaka kabidi bua kudifila mu mbilu ya moto. Mamu wakamfundisha mu tulasa tuvuabu balongesha bantu mua kunyema ne moto tuvuabu babikila ne: Zelta Mopēds (The Golden Moped). Ngakatuadija kunyema mu mbilu ya mioto mikese, pashishe meme kulua kubuela mu mbilu ya mioto ya minene.

Bu mumvua nkuata malu avuabu bandongesha ne lukasa, ngakalua munyemi wa kalanda musenga wa mbilu ya mioto ya njiwu. Ngakapeta makopo asatu mu mbilu ya mu Lettonie ne makopo abidi mu mbilu ya mu matunga a Baltes.

Pamvua mulue munyemi munene, mulunda wanyi wa bakaji Evija (umvua mulue kusela pashishe) wakatuilangana ne Bantemu ba Yehowa. Uvua mupete imue mikanda yabu ivua ne adrese udi muntu mua kulomba dilonga dia Bible. Wakalomba dilonga dia Bible mu adrese eu. Matuku makese pashishe, Bantemu babidi bakalua kumutangila ne kutuadijabu kulonga nende Bible. Mvua munange dilonga edi, kadi mu tshikondo atshi tshivua ndifila bikole ku malu a Nzambi to.

Dimue dituku, Ntemu wa Yehowa wakandomba bua meme kusomba ku luseke lua Evija bua kuteleja malu avuabu bamulongesha. Ngakitaba malu amvua mumvue dituku adi, akansankisha.  Dilongesha divua ditambe kundenga ndilongesha dia mulayi wa mu Bible bua mparadizu wa pa buloba. Tshilejilu, bakandeja mêyi a mu Bible adi mu Musambu 37:10, 11, adi amba ne: ‘Tshitupa tshîpi katshiyi tshianji kulepa, muntu mubi kena wikalaku kabidi; e, neukebe kumona muaba wende ne disuminyina, kena wikalaku. Kadi badi ne mitshima mipuekele nebapiane buloba, mioyo yabu neyisanke mu ditalala dikumbane.’ Mulayi eu uvua mundenge bikole.

Dinanga dianyi dia malu a Nzambi diakatungunuka ne kukola. Meme kutuadija kujingulula malongesha a dishima a mu bitendelelu. Kadi malongesha a mu Bible akankemesha bikole bualu avua umvuika bimpe ne matoke.

Pamvua mutungunuke ne dilonga Bible, ngakajingulula mudi Yehowa wangata muoyo wa muntu ne mushinga. (Musambu 36:9) Bualu ebu buakangeleshesha meji bua mbilu yanyi ya mioto ne meme kuangata dipangadika dia kubenga kuteka muoyo wanyi mu njiwu. Nunku mvua musue bua muoyo wanyi utumbishe Yehowa. Ke bualu kayi lumu ne butumbi bivua bifumina ku mbilu ya mioto kabivua kabidi ne mushinga kundi to.

Mu 1996, ngakabuela mu tshisangilu tshinene tshia Bantemu ba Yehowa tshivua tshienzeke mu Tallinn mu ditunga dia Estonie, pabuipi ne muaba utuvua tunyemena mbilu ya mioto misangu ne misangu. Mu tshisangilu etshi, ngakamona bantu ba mu matunga a bungi basombe kaba kamue mu buobumue ne mu ditalala. Tshilejilu, pavua Ntemu mukuabu mujimije kabuta kende ka ku bianza, ngakela meji ne: kakukapeta kabidi to. Kadi mu mutantshi mukese, Ntemu mukuabu uvua muangule kabuta aku wakalua kukapingaja ne bintu bionso bivuamu. Biakankemesha bikole! Meme kumona ne: bushuwa, Bantemu ba Yehowa badi batumikila mikenji ya mu Bible. Meme ne mukajanyi Evija tuakatungunuka ne kulonga Bible, ne mu 1997 tuakatambula ne tuetu kulua Bantemu ba Yehowa.

Bamue ba ku balunda banyi bakafua mu mbilu ya mioto eyi. Dilonga dia Bible diakangambuluisha bua kumvua ne: mvua ne dibanza kudi Yehowa Mufidi wa muoyo. Lumvu elu ndungambuluishe bua kusungila muoyo wanyi.

Meme ne Evija tuvua bapete diakalenga dia kuenzela Yehowa mudimu wa ku dîba ne ku dîba mu bidimu binayi ku Betele wa Bantemu ba Yehowa wa mu Riga. Mpindieu tudi ne disanka dia kukolesha Alise muanetu wa bakaji ne kumuambuluisha bua anange Yehowa. Ndi kabidi ne diakalenga dia kuya kuenza mudimu wa dikudimuna dituku dimue ku lumingu ku biro bia dikudimuna anyi kulongolola mashinyi peshi bintu bikuabu bidi binyanguka. Ndi ne disanka dia kuenza mudimu ne dimanya dimvua nadi katshia ku buana mu mushindu muimpe! Eyowa, ntshidi anu ntulakaja bintu ne mbilamakaja kabidi.

Meme ne bena mu dîku dianyi tudi ne diakalenga dia kumanyisha bantu bakuabu malu a Nzambi umuepele mulelela, bionso ebi ku diambuluisha dia malu amvua mulonge mu Bible. Bulelela, mulayi wa mparadizu wa pa buloba mmushintulule nsombelu wanyi!