ELIYA uvua wendela mu tshibanda tshia Yadene. Uvua muenze luendu lua mbingu ya bungi muye mutangile ku Nord ku mukuna wa Holeba. Mpindieu padiye upingana mu Isalele, udi umona malu mashintuluke mu buloba buabu. Mushipu mukole uvuamu ukavua mutuadije kukepa. Tuvula tukavua tutuadije kuloka ndambu, ne babidime bakavua bipilila madimi abu bua kukuna bintu. Bivua mua kuikala bisankishe muprofete eu bua kumona muvua buloba buenda bulongoloka, kadi tshivua tshitambe kumutonda mmalanda avua nawu bantu ne Nzambi. Kabavua mu malanda mimpe ne Nzambi to. Ntendelelu wa Bâla uvua mutangalake munkatshi muabu, ne Eliya uvua ne mudimu wa bungi wa kuenza bua bualu ebu. *

Eliya wakamona pabuipi ne tshimenga tshia Abele-mehola, balongolola miaba minene ya kumuna bimuna. Kuvua bikokedi bia ngombe 24, ne ngombe 24 ivua mu madimi yenda ikoka nkasu ya kudima nayi pamue. Muntu uvua ulombola tshikokedi tshia ngombe ibidi ya ndekelu, uvua muntu uvua Eliya ukeba. Muntu au uvua Elisha, uvua Yehowa musungule bua kupingana Eliya. Bu muvua Eliya udimona nkayende bu muntu uvua ne lulamatu kudi Nzambi, kakuyi mpata, uvua ne dijinga dikole dia kutuilangana ne muntu eu.​—1 Bakelenge 18:22; 19:14-19.

Eliya uvuaku muelakane bua muvuaye mua kupesha muntu mukuabu uvua ne bua kumupingana majitu avuaye nawu anyi? Katuena mua kuamba ne: kavua mua kuikala ne meji a nunku to. Bualu uvua anu “muntu bu tuetu.” (Yakobo 5:17) Kadi nansha nanku, Bible udi wamba ne: ‘Eliya wakafika kudiye, wakela tshikowelu tshiende pambidi pende.’ (1 Bakelenge 19:19) Tshikowelu tshia muprofete Eliya tshivuaye uvuala, tshivua tshileja muvua Yehowa mumupeshe mudimu wa pa buawu; imue misangu tshivua tshienza ne biseba bia mikoko anyi bia mbuji. Kutshivuadika Elisha pa makaya ende kuvua ne diumvuija dikole. Eliya uvua muanyishe bua kutumikila dîyi dia Yehowa dia kuteka Elisha bu mumupinganyi. Eliya wakeyemena Nzambi ne kumutumikila.

Nsonga eu Elisha uvua ne disanka dia kuambuluisha muprofete Eliya ukavua mukulakaje. Elisha kakapingana pa muaba wa Eliya diakamue to. Kadi bidimu bitue ku bisambombo, wakenza mudimu ne budipuekeshi buonso ku luseke lua muprofete mukulakaje eu, ke bualu kayi pashishe wakalua kumanyika bu muntu ‘uvua wela mâyi pa bianza bia Eliya.’ (2 Bakelenge 3:11) Ndisankapu kayi divua nadi Eliya bua mushindu uvua nsongalume eu umuambuluisha! Bantu babidi aba bakalua balunda banene. Kakuyi mpata dikankamijangana diabu diakabambuluisha bua kutantamena ntatu nansha muvuabu bamona malu mabi avua mavulangane mu buloba. Bualu malu mabi a mukalenge Ahaba avua enda avulangana bikole.

Ukadiku pebe mutuilangane ne buluishi anyi? Ba bungi ba kutudi badi batuilangana nabu mu bulongolodi bubi ebu. Kupeta mulunda muimpe udi munange Nzambi kudi mua kukuambuluisha bua kutantamena buluishi. Udi kabidi mua kulongela malu a bungi ku ditabuja dia Eliya bua muvuaye mutantamene buluishi.

Eliya ne Elisha bavua benze mudimu bikole bua kukolesha bantu mu malu a Nzambi. Mu kupita kua matuku  bavua balongesha baprofete bakuabu mu bulongame. Pashishe, Eliya wakapeta mudimu mukuabu wa kudi Yehowa; wakamuambila ne: ‘Juka, uye kumonangana ne Ahaba, mfumu wa bena Isalele.’ (1 Bakelenge 21:18) Ntshinyi tshivua Ahaba wenza?

Mukalenge eu ukavua mutontolodi, ne yeye ke mukalenge wa kumpala uvua muenze bualu bubi ebu. Wakasela Izebele, uvua mumuangalaje ntendelelu wa Bâla mu buloba, mukalenge pende uvua mudifilamu. (1 Bakelenge 16:31-33) Ntendelelu wa Bâla uvua ukonga malu a lulelu, bundumba ne malu a dilambula bana. Pa kumbusha malu aa, Ahaba uvua ufuma ku dibenga kutumikila mukenji wa Yehowa wa kushipa Bene-hadada mukalenge mubi wa bena Sulia. Dibenga kutumikila dia Ahaba divua bua kupetaye makuta. (1 Bakelenge nshapita 20) Nunku, lukuka, dinanga dia bintu ne tshikisu bia Ahaba ne Izebele biakakola bikole.

Ahaba uvua ne nzubu munene mu Samaliya. Uvua kabidi ne nzubu mukuabu mu Yizelele mutantshi wa kilometre 37 ne muaba uvuaye. Mu lupangu lua nzubu muibidi muvua budimi bua tumuma tua mvinyo. Nansha muvuaye ne bintu bionso ebi, uvua ujinga anu kuangata budimi bua tumuma tua mvinyo bua Nabota. Ahaba wakakuatshisha Nabota buôwa, ne kumulomba bua kumupesha makuta bua angate budimi abu. Kadi Nabota wakamuambila ne: ‘Yehowa ampidishe bua meme kukupa bumpianyi bua batatu banyi.’ (1 Bakelenge 21:3) Nabota uvuaku ne mutu mukole anyi peshi kavua utshina? Bantu ba bungi badi bela meji mushindu awu. Mu bulelela, uvua mutumikile mukenji wa Yehowa, uvua ulomba bena Isalele bua kubenga kupangisha buloba bua bumpianyi bua dîku diabu. (Lewitiki 25:23-28) Nabota uvua mumone ne: kabivua bimpe bua kushipa Mukenji wa Nzambi. Uvua muntu uvua ne ditabuja ne dikima, ne uvua mumanye ne: kubenga kutumikila Ahaba kuvua kumukebela njiwu.

Kadi mu bulelela, Ahaba kavua unemeka Mikenji ya Yehowa to. Wakaya ku nzubu kuende ‘mubungame ne mutshima muneme bujitu’ bua muvuaye kayi mupete tshivuaye ukeba. Bible udi wamba ne: ‘Wakalala pa bulalu buende, wakatangidija mpala wende ku tshimanu, kakadia tshintu.’ (1 Bakelenge 21:4) Pavua Izebele mumone bayende mulale panshi bu muana, wakapangadija tshia kuenza bua kumusankisha, wakalongolola kabidi bua kubutula dîku dia bantu bakane aba.

Tshitungu tshiende etshi tshidi tshileja muvuaye muntu mubi mutambe. Mukalenge mukaji Izebele uvua mumanye ne: Mukenji wa Nzambi uvua ulomba bujadiki bua bantemu babidi bua kujadika dibanda muntu ne bualu. (Dutelonome 19:15) Nunku wakafunda mikanda mu dîna dia Ahaba ne kusungula bantu balume ba mu Yizelele bua kukeba bantu babidi badi mua kushiminyina Nabota bualu budi buleja mudiye mupende Nzambi budi mua kumufikisha ku tshibawu tshia lufu. Dilongolola diende edi diakakumbana. “Bena lukinu” babidi bakajadikila Nabota bualu bua dishima, ne kumukumabu mabue yeye kufua. Bakashipa too ne bana ba balume ba Nabota! * (1 Bakelenge 21:5-14; Lewitiki 24:16; 2 Bakelenge 9:26) Ahaba uvua mulekele muaba wende wa bumfumu ne mulekeele  mukajende bua kukumbajaye dijinga dibi dia kushipa bantu bavua kabayi beenze bualu.

Elabi meji muvua Eliya mua kuikala mu diumvue pavua Yehowa mumuleje tshivua mukalenge ne mukajende benze. Bidi bitonda bua kumona mudi bantu babi bamueneka bu badi batshimuna bantu badi kabayi ne bualu. (Musambu 73:3-5, 12, 13) Lelu eu misangu ya bungi, tudi tumona mudi malu a kansungansunga enzeka, imue misangu baenza kudi bantu badi ne bukokeshi badi badiamba mudibu baleji mpala ba Nzambi. Kadi muyuki eu udi mua kutukolesha. Bible udi utuvuluija ne: kakuena bualu budi busokome ku mêsu kua Yehowa to, udi umona malu onso. (Ebelu 4:13) Ntshinyi tshidiye wenza bua malu mabi adiye umona enzeka?

Yehowa wakatuma Eliya kudi Ahaba. Nzambi wakaleja Eliya ne: “Yeye udi mu bidimi bua Nabota.” (1 Bakelenge 21:18) Pavua Izebele muambile Ahaba ne: mpindieu budimi mbuebe, wakajuka diakamue bua kusanka bua mudibu bulue buende. Kavua wela meji nansha kakese ne: Yehowa uvua umona malu onso au to. Elabi meji pavuaye mu budimi ebu, wenda wenza makumi bua muvuaye mua kubudiundisha ne kubulengeja. Kadi diakamue, Eliya ufikamu! Disanka dia Ahaba kujika, kupetaye tshiji ne lukuna ne kuambaye mêyi aa: “Wewe, muena lukuna wanyi, wakunsangana.”​—1 Bakelenge 21:20.

Ahaba uvua muleje butatakane buende mu malu abidi mu mêyi ende avuaye muambe aa. Bualu bua kumpala, padiye wambila Eliya ne: “Wakunsangana,” Ahaba uvua uleja ne: uvua mpofu mu malu a Nzambi. Yehowa ukavua “mumusangane” konso aku. Uvua mumone muvua Ahaba muenze mudimu bibi ne budikadidi bua kudisunguila malu ne muanyishe tshienzedi tshibi tshia tshitungu tshia Izebele. Nzambi uvua mumone mu mutshima wa Ahaba ne muvuaye munange bintu bia ku mudibi bikole bimupangishe bua kuikala ne luse, buakane ne diumvuila bakuabu. Bualu buibidi, pavuaye muambile Eliya ne: “Wewe, muena lukuna wanyi!” Ahaba uvua muleje lukuna luvuaye nalu kudi muntu uvua mulunda wa Yehowa Nzambi, muntu uvua mua kuambuluisha Ahaba bua kulekelaye malu ende mabi.

Tudi mua kupeta malongesha a bungi bua butatakane bua Ahaba. Katuena ne bua kupua muoyo ne: Yehowa Nzambi udi umona malu onso. Bu muledi wa dinanga, udi umona dîba dionso ditudi tupambuka mu njila wa buakane, ne udi usanka padiye umona mushindu utudi tushintuluka. Bua kutuambuluisha, misangu ya bungi utu ukuata mudimu ne balunda bende bena lulamatu badi bu Eliya, badi bambila bantu  nabu mêyi a Nzambi. Katuenji tshilema bua kumona balunda ba Nzambi bu bena lukuna betu to!​—Musambu 141:5.

Ela meji bua diandamuna didi Eliya upesha Ahaba edi: ‘Ngakukusangana.’ Uvua musangane Ahaba tshivuaye menemene, mbuena kuamba ne: muivi, mushipianganyi ne mutombokedi wa Yehowa Nzambi. Bua kuimana kumpala kua Ahaba muntu mubi eu bivua bikengela kuikala ne dikima! Eliya wakaya bua kuambila Ahaba dinyoka divua Nzambi mumulongoluele. Yehowa wakamona malu onso, muvua malu mabi matampakane mu dîku dia Ahaba ne bantu bakuabu. Nunku Eliya wakambila Ahaba ne: Nzambi mmuangate dipangadika dia ‘kumubutula,’ kubutula bukalenge buende buonso. Izebele pende uvua ne bua kubutudibua.​—1 Bakelenge 21:20-26.

Eliya kavua mufuanyikije patupu ne: bantu mbaye kule ne dienza dia malu mabi to. Bualu lelu eu mbipepele bua bantu kushiminyina bakuabu malu. Muyuki wa mu Bible kawena anu utuvuluija ne: Yehowa Nzambi udi umona malu mabi onso adi enzeka to, kadi neaalongolole mu tshikondo tshiakane tshidiye musungule. Dîyi diende didi ditujadikila ne: nekuikale dituku diajikijaye malu mabi onso nkong! (Musambu 37:10, 11) Udi mua kudiebeja ne: ‘Dilumbuluisha dia Nzambi didi anu bua kunyoka bantu anyi? Peshi didiku kabidi bua kufuila bantu luse?’

Imue misangu bivua mua kuikala bikemeshe Eliya bua kumona tshivua Ahaba muenze pavuaye mumvue dilumbuluisha dia Nzambi. Bible udi wamba ne: ‘Pakumvua Ahaba mêyi au, wakadipanda bilulu biende, wakaluata bilulu bikayabala pambidi pende, wakajila biakudia, wakalala mu bilulu bikayabala, wakenda bitulu bitulu.’ (1 Bakelenge 21:27) Ahaba uvuaku munyingalale bushuwa anyi?

Tudi mua kuamba ne: uvua munyingalale ndambu. Ahaba uvua mudipuekeshe, bualu butu bukolele muntu udi ne lutambishi ne didileja bua kuenza. Kadi uvuaku munyingalale ne muoyo mujima anyi? Tuanji kukonkonona pa kumufuanyikija ne Manashe mukalenge uvua muenze malu mabi kumupita. Pavua Yehowa munyoke Manashe, Manashe wakadipuekesha ne kulomba Yehowa bua amuambuluishe. Kadi kavua muimanyine anu apu to. Wakashintulula nsombelu wende, kumbushaye mpingu yonso ivuaye utendelela, ne kudienzeja bua kuenzela Yehowa mudimu ne kusaka bantu bende bua kuenzabu pabu bia muomumue. (2 Kulondolola 33:1-17) Ahaba uvuaku muenze malu aa anyi? Tòo.

Yehowa uvuaku mumone dibungama divua Ahaba muleje kumpala kua bantu edi anyi? Yehowa wakambila Eliya ne: ‘Wakutangila bu mudi Ahaba mudipuekeshe ku mêsu kuanyi, anyi? Bualu bua yeye wakudipuekesha nunku ku mêsu kuanyi, tshiena ngenza malu au makole onso mu matuku ende: kadi nentume malu au makole ku nzubu wende mu matuku a bana bende ba balume.’ (1 Bakelenge 21:29) Yehowa uvuaku mufuile Ahaba luse anyi? Tòo, Nzambi utu ufuila anu bantu badi banyingalala ne muoyo mujima luse. (Yehezekele 33:14-16) Kadi bu muvua Ahaba muleje ndambu wa dibungama, Yehowa pende uvua mumufuile luse ndambu. Bavua bepule Ahaba ku bipeta bibi bia kumona bena mu dîku diende bonso babutudibua.

Kadi dilumbuluisha dia Yehowa bua muntu mubi eu kadivua dishintuluke to. Yehowa wakalomba pashishe banjelu bende bua kukeba mushindu muimpe wa kudinga Ahaba bua aye mu mvita bua aye kufuilamu. Matuku makese pashishe, Yehowa wakakumbaja dinyoka diende bua Ahaba. Bakatapa Ahaba mputa mu mvita, yeye kufuila mu ditempu diende bua bungi bua mashi avua apatuka. Bible udi ukumbaja bualu bua mushinga ebu: Pavuabu basukula ditempu dia mukalenge edi, imue mbua yakalua kulaka mashi a mukalenge. Mu mushindu eu, mêyi a Yehowa avuaye muambile Eliya bua Ahaba aa akakumbana. Uvua mumuambile ne: “Mu muaba wakalakila mbua mashi a Nabota mbua neyilake mashi ebe mene mene.”​—1 Bakelenge 21:19; 22:19-22, 34-38.

Bua Eliya ne Elisha ne bena lulamatu bakuabu ba munkatshi mua bantu ba Nzambi, lufu lua Ahaba luvua lubajadikile ne: Yehowa kavua mupue muoyo dikima ne ditabuja bia Nabota. Nzambi wa buakane kena mua kulekela bua kunyoka benji ba malu mabi, nansha ku tototo nansha ku ndandanda, utu uleja luse mu dilumbuluisha diende padibi bikengela kuenza nanku. (Nomba 14:18) Eliya uvua mupete dilongesha dimpe ditambe bua ditantamena diende dia ntatu munkatshi mua bidimu bia bungi mu bukokeshi bua mukalenge eu mubi. Badiku bakuenzela malu ne kansungansunga anyi? Udiku muindile ne muoyo kuulu kuulu bua kumona muikala Nzambi mua kuakaja malu anyi? Nanku, idikija ditabuja dia Eliya. Yeye ne mulunda wende wa lulamatu Elisha, bakatungunuka ne kumanyisha mukenji wa Nzambi ne kutantamena buluishi!