JOZEFE uvua mua kuikala wenda utangila ku Est ne dijinga dia kumbuka mu tshisumbu tshia bena luendu bua kunyema. Kuabu mu Hebelone kuvua pabuipi ne muaba au dia muamua dia tumikuna. Tatuende Yakoba uvua mua kuikala musombe dilolo adi kayi mumanye tshidi tshifikile muanende uvuaye munange bikole. Kadi Jozefe kavua mua kupingana kuabu ne mu matuku ende onso a bunsonga kavua mua kumona mpala wa tatuende mukulakaje uvuaye munange. Bangenda mushinga bavua bamutangila pavuabu balombola tumelu tuabu mu njila batangile ku Sud. Bu mukavua Jozefe muena mudimu wabu, kabavua mua kumulekela ubajimina ku mêsu. Buabu bobu, nsongalume eu uvua bu dibuki dia mafuta a mushinga mukole divuabu mua kuya kupana kule mu Ejipitu.

Jozefe kavua mua kuikala ne bidimu bipite pa 17 to. Fuanyikijabi muvuaye mua kuikala utangila muulu ku Ouest kuvua dîba dibuela lua ku Mbuu munene, uteta mua kujingulula tshivua tshimufikile. Bivua bimupitshila bua muvua bana babu bajinge kumushipa, kadi balue kumupana bu mupika. Bivua mua kuikala bikolele Jozefe bua kubengaye kupuekesha binsonji. Kavua mumanye tshivua tshimuindile mu matuku atshilualua.

Mmunyi muvua Jozefe mufike mu nsombelu wa lutatu eu? Ntshinyi tshitudi mua kulongela ku ditabuja dia nsongalume uvuabu bakine ne babenge kudi bena mu dîku diabu?

Jozefe uvua muledibue mu dîku dia bantu ba bungi, divua kadiyi ne disanka ne kadiyi mu buobumue. Bible udi uleja nsombelu mubi wa mu dîku dia Yakoba ne bipeta bibi bia disela bakaji ba bungi. Ntshilele tshivua Nzambi mulekele munkatshi mua bantu bende too ne pavua Muanende mulue kuelulula mukenji wa ku ntuadijilu wa disela mukaji umue. (Matayi 19:4-6) Yakoba uvua mulele bana 14 ne bakaji banayi aba: bakaji bende babidi Lea ne Lakele; Zilepa ne Bileha bakaji bapika ba bakaji bende. Ku ntuadijilu, Yakoba uvua munange Lakele mukaji muimpe kumona. Kavua munange Lea yayende wa Lakele uvuabu bamuseleshe ku bukole mushindu eu to. Bakaji babidi aba bavua bakinangane, ne lukinu luabu elu luakakuata too ne bana babu.​—Genese 29:16-35; 30:1, 8, 19, 20; 37:35.

Lakele uvua mushale kayi ulela bidimu bia bungi. Kadi pavuaye mulue kulela Jozefe, Yakoba uvua wangata muanende wa ku bukulakaje eu bu muana wa pa buende. Tshilejilu, pavua dîku dia Yakoba  mu njila bua kutuilangana ne muanabu Esau uvuabu kabayi bapetangana nende, Yakoba wakenza bua ne: Lakele ne Jozefe bikale mu bukubi panyima pa bena mudimu ba mu nzubu muende. Dituku edi dinene divua mua kuikala ne buenzeji kudi Jozefe. Elabi meji muvuaye mua kuikala mudiumvue mu dinda pavuaye mumone tatuende ukavua mukulakaje muikale ne makanda wenda utebuka. Bivua mua kumukemesha pavuaye umanya ne: tatuende uvua muluangane butuku bushale ne muanjelu wa bukole! Bua tshinyi? Bualu Yakoba uvua musue ne: Yehowa Nzambi amubeneshe. Wakabenesha Yakoba pakashintululaye dîna diende yeye kulua Isalele. Tshisamba tshijima tshivua ne bua kubikidibua ku dîna diende! (Genese 32:22-31) Mu kupita kua bidimu, Jozefe wakalua kumanya ne: bana ba Isalele bavua ne bua kulua batatu ba bisa bia tshisamba etshi!

Pashishe, nsonga Jozefe uvua mutuilangane ne lutatu bua musangu wende wa kumpala pavua muntu uvuaye munange bikole mushiyangane ne buloba yeye utshidi muana. Mamuende wakafua pavuaye mulele Benyamina muakunyende wa balume. Tatuende uvua mubungame bikole bua lufu lua mukajende elu. Fuanyikijabi Yakoba ukupula Jozefe binsonji ku mêsu umukolesha ne ditekemena dia muomumue ne divua dikoleshe kakuende Abalahama. Bivua mua kuikala bikoleshe Jozefe ku muoyo pavuaye mulue kumanya ne: dimue dituku, Yehowa neajule mamuende ku lufu! Pamuapa Jozefe uvua mulue kunanga kabidi bikole “Nzambi wa badi ne muoyo.” (Luka 20:38; Ebelu 11:17-19) Panyima pa lufu lua mukajende Lakele, Yakoba uvua anu mutungunuke ne kunanga bana ba balume babidi bavuaye mulele nende aba.​—Genese 35:18-20; 37:3; 44:27-29.

Bana ba bungi bavua mua kuikala banyanguke bua nsombelu wa pa buende eu, kadi Jozefe uvua mupetele ngikadilu ya bungi mimpe kudi baledi bende ne uvua mupete ditabuja dikole dia kumanya tshidi tshimpe ne tshidi tshibi. Pavuaye ne bidimu 17, uvua muenze mudimu bu mulami wa mikoko, ne uvua wambuluisha batutuende pavuaye ubamona benza malu mabi. Uvuaku ujibakaja malu abu bua bamuanyishe anyi? Mu malu onso uvua wenza tshidi tshimpe. Uvua wambila tatuende malu mabi a bana babu. (Genese 37:2) Pamuapa tshienzedi tshia dikima etshi tshivua tshileja mmuenenu wa Jozefe muana uvuabu banange bikole kudi Yakoba. Ntshilejilu tshimpe tshidi bansonga bena Kristo mua kuelela meji! Paudi mutetshibue bua kusokoka mpekatu wa muntu mukuabu anyi wa mulela webe peshi wa mulunda webe, mbimpe kuidikija tshilejilu tshia Jozefe kuya kuambila badi ne bukenji bua kuambuluisha muenji wa bubi.​—Lewitiki 5:1.

Tudi kabidi mua kupetela dilongesha ku nsombelu wa mu dîku dia ba Jozefe. Nansha mudi bena Kristo balelela kabayi mua kusela bakaji ba bungi, kudi mêku a bungi munkatshi muabu adi menzulula bu mudi: muledi muselangane ne muledi uvua ku dibaka dikuabu, ne bana ba ku dibaka  dikuabu. Bantu bonso aba badi mua kupeta dilongesha ku nsombelu wa mu dîku dia Yakoba bua kumona ne: ditapululangana ne kansungansunga kabiena bikolesha buobumue mu dîku to. Baledi badi ne meji badi benze mêku menzulula aa, badi ne bua kuenza muabu muonso bua kunanga bana babu ba ku dibaka dikuabu ne kubapesha bintu bia muomumue bua yonso wa kudibu enza bua disanka dikale mu dîku.​—Lomo 2:11.

Pamuapa bua dikima divua nadi Jozefe bua tshidi tshimpe, Yakoba uvua mueyemene bikole muanende eu. Uvua mene mumuenzele tshilamba tshia pa buatshi. (Genese 37:3) Tshivua mua kuikala tshizaku tshia mishonyi anyi tshia mekala a bungi, kadi kakuena bijadiki bia bungi bua bualu ebu to. Imue misangu, tshivua muzabi muimpe mule, pamuapa muikale utua ku maboko ne ku mikolo. Tshivua mua kuikala nkotshi muimpe uvua muntu munene anyi muana wa mfumu mua kuvuala.

Kakuyi mpata Yakoba uvua ne bua kuikala ne meji mimpe, ne Jozefe uvua ne bua kuikala mutuishibue bua muvua tatuende umutabalela ne dinanga. Kadi tshilamba etshi tshivua ne bua kumukebela ntatu. Tuikale bavuluke ne: nsongalume eu uvua muenze mudimu bu mulami wa mikoko. Uvua mudimu mukole. Fuanyikija nsongalume muvuale tshilamba tshia bukalenge wendela mu bisosa bile, ubanda pa mabue anyi ukeba mukoko udi mujimine mu tshisuku tshia mêba. Bualu bukuabu, mushindu uvua Yakoba wanyisha Jozefe bikole uvua ne buenzeji kayi mu malanda ende ne bana babu?

Bible udi wandamuna ne: ‘Bana babu bakamona ne: dinanga dia tatu wabu kudiye diakatamba dia kudi buonso buabu; bobu bakadi nende lukuna, kabakamanya mua kuyukila nende talalaa.’ * (Genese 37:4) Bana babu ne Jozefe bavua anu mua kumumvuila mukawu, kadi kabivua bimpe bua bobu kulekela mukawu ubapita bukole. (Nsumuinu 14:30; 27:4) Bikadiku bikufikile bua kumvua mukawu padibu batabalela muntu kampanda peshi bamupesha bunême buuvua ujinga anyi? Biobi nanku, vuluka bana babu ne Jozefe. Mukawu wabu wakabasaka bua kuenza malu avua malue kubatonda bikole pashishe. Tshilejilu tshiabu tshidi tshivuluija bena Kristo ne: mbimpe “kusanka ne badi basanka.”​—Lomo 12:15.

Jozefe uvua mumanye muvua bana babu bamukine. Uvuaku usokoka tshilamba tshiende tshimpe atshi pavua bana babu pabuipi anyi? Uvua mua kuikala muenze nanku. Kadi vuluka ne: Yakoba uvua mupeshe muende tshilamba atshi bua kuleja muvuaye mumunange. Jozefe uvua musue kuleja tatuende muvuaye umueyemena, ke bua tshinyi uvua uvuala tshilamba atshi. Tshilejilu tshiende tshidi tshituambuluisha. Nansha mudi Tatu wetu wa mu diulu kayi ne kansungansunga, kadi udi utabalela bikole basadidi bende ba lulamatu ne ubanyisha. Udi ubalomba bua bikale bashilangane ne bantu ba mu buloba ebu bubi ne bunyanguke.  Anu bu tshilamba tshia Jozefe, bikadilu bimpe bia bena Kristo bidi bibavuija bashilangane ne bantu badi babanyunguluke. Bikadilu bia nunku bitu imue misangu bijudija lukuna ne mukawu. (1 Petelo 4:4) Muena Kristo udiku mua kusokoka bumuntu buende bulelela bu musadidi wa Nzambi anyi? Tòo, udi ne bua kuenza anu bu Jozefe uvua kayi musokoke tshilamba tshiende.​—Luka 11:33.

Mu matuku makese Jozefe wakalota bilota bibidi bia dikema. Mu tshilota tshia kumpala, Jozefe wakadimona yeye ne bana babu basuika bisumbu bia blé. Kadi pashishe bisumbu bia bana babu biakanyunguluka tshiende tshivua tshimane ne biobi kutshinamina. Mu tshilota tshibidi, dîba, ngondo ne mitoto 11 bivua binamina Jozefe. (Genese 37:6, 7, 9) Ntshinyi tshidi Jozefe muenze bua bilota ebi bia dikema?

Bilota ebi bivua bifuma kudi Yehowa Nzambi. Bivua ne mêyi a buprofete, ne Nzambi uvua musue bua Jozefe umvuije malu avua mu bilota ebi. Mu mushindu kampanda, Jozefe uvua ne bua kuenza tshivua baprofete bonso balue kuenza pashishe pavuabu bumvuija mêyi a kudi Nzambi ne dilumbuluisha diende kudi bantu bende.

Jozefe wakambila bana babu ne bukalanga buonso ne: “Telejayi koku tshilota tshimvua mulote etshi.” Bana babu bakateleja tshilota, kadi kabavua basue tshilota etshi nansha kakese. Bakamuandamuna ne: “Udi usua kuamba ne: neuditeke mukalenge bua kutukokesha anyi?” Bible udi wamba ne: “Nunku bakapeta bualu bukuabu bua kumukinyina bualu bua bilota biende ne bua tshivuaye muambe.” Pavua Jozefe mulondele tatuende ne bana babu tshilota tshibidi, bakamuandamuna bibi. Tudi tubala mu Bible ne: “Tatuende wakamutandisha ne wakamuambila ne: ‘Tshilota tshiebe tshidi tshiumvuija tshinyi? Meme ne mamuebe ne bana benu netulue kuudi bua kukuinamina too ne panshi anyi?’” Kadi, Yakoba wakatungunuka ne kuela meji bikole bua bualu ebu. Yehowa uvuaku mutungunuke ne kuyukila ne nsongalume anyi?​—Genese 37:6, 8, 10, 11, NWT.

Jozefe kavua muntu wa kumpala anyi wa ndekelu mu basadidi ba Yehowa bavuaye mulombe bua kumanyisha mêyi a buprofete avua mua kubakebela buluishi anyi dikengeshibua. Yezu uvua mumanyishi munene wa mukenji wa mushindu eu, ne wakambila bayidi bende ne: “Bikalabu bankengeshe nebanukengeshe penu.” (Yone 15:20) Ditabuja ne dikima bia nsonga Jozefe bidi mua kulongesha bena Kristo bonso malu a bungi.

Matuku makese pashishe, Yakoba wakatuma Jozefe ku luendu. Bana babu bakulumpe bavua ne tshibidilu tshia kulama mikoko lua ku Nord pabuipi ne Shekeme, muaba uvuabu ne baluishi matuku makese kumpala. Kakuyi mpata, Yakoba uvua uditatshisha bua bana bende, nunku wakatuma Jozefe bua kumanya muvuabu. Udiku mua kufuanyikija muvua Jozefe udiumvua anyi? Uvua mumanye bimpe ne: bana babu bavua bamukine bikole! Ntshinyi tshivuabu mua kuenza pavuabu bamumona ulua bu muleji-mpala wa tatuabu? Nansha nanku, Jozefe wakatumikila tatuende.​—Genese 34:25-30; 37:12-14.

Luvua luendu lukole, pamuapa muaba wa matuku anayi anyi atanu. Shekeme uvua mu mutantshi wa kilometre 80 lua ku Nord ku Hebelone. Kadi pakafika Jozefe mu Shekeme wakajingulula ne: bana babu bavua baye ku Dotana muaba uvua mutantshi wa kilometre 22 ku Nord menemene. Pakafika Jozefe pabuipi ne Dotana, bana babu bakamumona ulua ku bule. Diakamue mukawu wabu wakajuka. Bible udi wamba ne: “Ke bobu kuambilangana ne: ‘Monayi, muena ndota nyeye au ulua. Nunku luayi, tumushipayi tumuimanshe mu tshimue tshia ku bina bia mâyi, netuambe ne: nyama wa tshisuku wa luonji mmumudie. Nunku netumone tshialua bilota biende.’” Kadi Lubena wakasengelela bana babu bua bimanshe Jozefe mu tshina ne muoyo, ne lungenyi lua ne: neamupandishe pashishe.​—Genese 37:19-22.

Bu muvua Jozefe kayi mumanye bualu, wakasemena kudibu ne meji a kuyukila nabu mu ditalala. Kadi bana babu bakamubunda! Bakamupatula muzabi wende wa pa buawu, kumusakilabu mu tshina tshivua katshiyi ne mâyi ne bobu kumuelamu. Jozefe kukulukamu! Yeye mumane kupetulula lungenyi, wakatata ne makasa ende bua kupatukamu, kadi kakakokesha to. Uvua umona anu tshijengu tshia diulu ne mêyi a bana babu kaatshiyi umvuika kabidi to. Wakela mbila, udila ubasengelela, kadi kabakamumvuila. Bavua baye kudia biakudia pabuipi apu kabayi luse. Bu muvua Lubena kayiku, bakumvuangana kabidi bua kushipa nsongalume,  kadi Yuda wakabalomba bua bamupangishe kudi bangenda mushinga bavua bapita muaba au. Musoko wa Dotana uvua pabuipi ne njila wa bangenda mushinga bavua baya mu Ejipitu. Mu mutantshi mukese, bangenda mushinga ba bena Yishimaele ne ba bena Midiyana bakafika muaba au. Kumpala kua Lubena kuluaye, bakapana muanabu. Bakapana muanabu bu mupika ku bitupa 20 bia arjan. *​—Genese 37:23-28; 42:21.

Nunku tuvuluke ntuadijilu wa mu muyuki wetu eu. Bu muvuabu bakuate Jozefe ku Sud mu njila udi muye mu Ejipitu, uvua mumueneke mujimije bionso. Uvua muye kule ne dîku diabu! Munkatshi mua bidimu bia bungi, kavua mua kumanya bualu nansha bumue bua mu dîku diabu, nansha bua kanyinganyinga kavua Lubena mupete pavuaye mupingane kayi mumusangane. Nansha bua kanyinganyinga kavua Yakoba mumvue pavuabu bamushime ne: Jozefe webe uuvua munange uvua mufue; nansha bualu bua kakuende Izaka ukavua mukulakaje utshivua ne muoyo anyi bua muakunyende Benyamina uvuaye munange uvuabu kabayi bamonangana nende kabidi. Kadi bavuaku bashiye Jozefe kayi ne tshintu nansha tshimue anyi?​—Genese 37:29-35.

Jozefe uvua mushale ne tshintu tshivua bana babu kabayi mua kuangata, mbuena kuamba ne: ditabuja diende. Uvua mumanye malu a bungi bua Nzambi wende Yehowa, ne kakuvua tshivua mua kumumbusha dimanya edi. Nansha diumbuka dia ku nzubu kuabu anyi lutatu lua mu njila bu mupika batangile mu Ejipitu peshi dipuekeshibua milongo bua dimupanyisha bu mupika kudi Potifâ mubanji wa mu Ejipitu, kabivua mua kumbusha dimanya divuaye nadi to. (Genese 37:36) Ditabuja dia Jozefe ne didisuika diende bua kushala mulamate Nzambi wende biakakoleshibua mu nsombelu mikole eyi. Mu biena-bualu bialonda, netumone muvua ditabuja dia Jozefe dimuvuije muntu wa nsongo ku mêsu kua Yehowa Nzambi wende, ne kudi bena mu dîku diabu mu tshikondo tshia dikenga. Mbimpe bua tuetu kuidikija ditabuja dia Jozefe!