DEBOLA uvua wenda unyunguluka munkatshi mua basalayi bavua badisangishe pa mukuna wa Tabô. Dikima diabu ne ditabuja dia mfumu wabu Balaka bivua bimukemeshe bikole pavuaye mubamone mu dindadinda muaba au. Nansha muvuabu 10 000, ditabuja ne dikima diabu bivua mu diteta dikole dituku adi. Bavua ne bua kuluangana ne tshiluilu tshia tshikisu tshivua tshibapite ku bungi pabu kabavua nansha ne bia mvita bia nsongo to. Kadi mu mishindu yonso bakafika anu muaba au nangananga bualu muntu mukaji umue au uvua mubakankamije.

Difuanyikijilabi Debola: nkanzu wende wenda upepuka ne kapepa padiye yeye ne Balaka batangila mu tshibandabanda tshinene. Mukuna wa Tabô kauvua musongoloke bikole pa mutu pawu to. Uvua ne butumbuke bua metre matue ku 400 ne wewe pa mutu pawu udi mua kumona bimpe mpata wa Esdrelon uvua ku luseke lua sud-ouest. Musulu wa Kishona uvua upuekela mu mpata uvua mutangile ku Mbuu munene, upitshila ku mukuna wa Kâmele. Mu dinda amu musulu uvua mua kuikala mûme, kadi tshintu kampanda tshivua tshikenka mu mpata munene au. Tshiluilu tshia Sisela tshivua tshienda tshisemena pabuipi menemene, bia mvita biabu bitua nsese idi yenza buôwa. Nsese eyi ivua ya tshiluilu tshipiluke tshia Sisela tshivua ne makalu a mvita matue ku 900 avua ne biamu bisongoloke biasa ku nkata yawu. Sisela uvua musue kubutula bipepele bena Isalele bavua kabayi ne bia mvita bia nsongo.

Debola uvua mumanye ne: Balaka ne bena diende bavua bindile bua abatudile dîyi. Anu yeye ke muntu mukaji umue uvua muaba au anyi? Uvua wela meji kayi bua bujitu bunene buvuaye nabu muaba au? Uvuaku udiebeja tshivuaye muye kuenza muaba au anyi? Nansha kakese! Yehowa Nzambi wende ukavua mumuambile bua kutuadijabu mvita, uvua mumumanyishe kabidi ne: muntu mukaji ke uvua ne bua kumana mvita ayi. (Balumbuluishi 4:9) Tshilejilu tshia Debola ne basalayi ba dikima abu tshidi tshitulongesha tshinyi bua ditabuja?

Padi Bible wakula bua Debola, udi wamba ne: uvua “muprofete mukaji.” Dîna edi didi dileja Debola bu muntu wa pa buende, kadi kavua nkayende to. * Debola uvua ne mudimu mukuabu kabidi. Pavua bantu ne bilumbu uvua ubikosa pa kufila diandamuna dia kudi Yehowa.​—Balumbuluishi 4:4, 5.

Debola uvua musombele mu mikuna ya Efelayima, pankatshi pa tshimenga tshia Betele ne tshia Lama. Uvua usomba muinshi mua dibue wenzela bantu mudimu anu muvua Yehowa umulomba. Mudimu wende uvua bushuwa ne ntatu, kadi kayivua mitekeshe Debola mu maboko to. Bantu bavua nende dijinga bikole. Wakalua umue wa ku bafundi ba musambu mufundisha ku nyuma muimpe udi ne mêyi adi atangila tshisamba tshiabu tshipange lulamatu aa: ‘Bobu bakasungula nzambi mipiamipia, ne pashishe mvita yakadi ku biibi bia musoko.’ (Balumbuluishi 5:8) Bu muvua bena Isalele balekele Yehowa bua kuenzela nzambi mikuabu mudimu, Yehowa wakabafila mu bianza bia baluishi babu. Yabine mukalenge wa bena Kanana wakabakokesha ku diambuluisha dia Sisela mfumu wa basalayi wa bukole bua bungi.

Sisela ndina divua ditamba kuenza bena Isalele buôwa. Ntendelelu wa bena Kanana ne bilele biabu bivua ne malu a tshikisu a bungi bu mudi dilambula dia bana ne tshiendenda tshia masandi. Mmunyi muvua malu enzeka pavua mfumu wa tshiluilu tshia bena Kanana ne bantu bende bakokesha musoko?  Musambu wa Debola udi uleja ne: bivua bikole bua kuenza ngendu ne bantu kabatshivua basomba mu musoko to. (Balumbuluishi 5:6, 7) Tudi mua kufuanyikija muvua bantu mua kuikala basokoma mu mitshi ne mu mikuna batshina bua kudima anyi kusomba mu misoko kayiyi ngumbu ne batshina bua kuendela mu njila minene bua kabalu kubaluisha, kubanyenga bana anyi kutombola bakaji babu. *

Malu avua enza buôwa aa akenza bidimu 20 too ne pakamona Yehowa ne: bantu bende ba mutu mukole aba bavua bitabe bua kushintuluka anu mudi musambu wa Debola ne Balaka mufundisha ku nyuma muimpe eu wamba ne: ‘too ne panakabika, meme Debola mene; nakabika bu muledi wa bana ba Isalele.’ Katuena bamanye bikala Debola mukaji wa Lapidota ni uvua mamu wa bana muena dîna eu to, kadi tshiambilu etshi ntshifunda mu ngakuilu wa mu tshimfuanyi. Mu bulelela, Yehowa uvua mupeshe Debola mudimu wa kupetesha tshisamba tshia Isalele bukubi bua mamu muledi. Uvua mumuambile bua kubikidisha Balaka mulumbuluishi uvua ne ditabuja dikole ne kumuambile bua aye kuluangana ne Sisela.​—Balumbuluishi 4:3, 6, 7; 5:7.

Yehowa wakatuma dîyi ku butuangaji bua Debola ne: “Uye biebe ku luseke lua mukuna wa Tabô.” Balaka uvua ne bua kulombola bantu balume 10 000 bangata mu bisa bibidi bia Isalele. Debola wakamanyisha mulayi wa kudi Yehowa wa ne: bavua ne bua kutshimuna Sisela muntu wa bukole au ne makalu ende a mvita 900. Mulayi eu uvua ne bua kuikala mukemeshe Balaka. Bena Isalele kabavua ne tshiluilu, kabavua nansha ne bia mvita to. Nansha nanku, Balaka wakitaba bua kuya mu mvita, kadi anu bikala Debola muye pende ku mukuna wa Tabô.​—Balumbuluishi 4:6-8; 5:6-8.

Bamue bantu badi bela meji ne: bu muvua Balaka mulombe bua Debola aye nende mu mvita uvua mupangile ditabuja, kadi kabiena nanku to. Kavua mulombe Nzambi bia mvita bia bungi to. Kadi, bu muvua Balaka muntu wa ditabuja dikole, wakamona ne: bivua ne mushinga bua kuikala ne muleji mpala wa Yehowa bua abakoleshe yeye ne bantu bende. (Ebelu 11:32, 33) Yehowa wakitaba bua Debola aye nabu anu muvua Balaka mulombe. Nansha nanku, ku diambuluisha dia nyuma wende, Yehowa wakasaka Debola bua kuambaye mêyi a buprofete a ne: butumbi bua ditshimuna dia mvita eyi kabuvua ne bua kuya kudi muntu mulume to. (Balumbuluishi 4:9) Nzambi uvua mupangadije bua muntu mukaji ashipe Sisela.

Matuku etu aa, badi bateka bujitu bua malu mabi a mishindu yonso pa makaya a bantu bakaji. Anu mu malu makese ke mudibu babapesha bunême budi Nzambi musue bua bikale nabu. Kadi, Nzambi udi wangata bantu balume ne bantu bakaji anu mu mushindu wa muomumue. (Lomo 2:11; Galatiya 3:28)  Tshilejilu tshia Debola tshidi tshituleja ne: Nzambi udi kabidi upesha bantu bakaji diakalenga dia kuenza imue midimu idi ileja mudiye ubeyemena ne ubanyisha. Katuena ne bua kuikala ne mmuenenu mubi udi nende bantu lelu eu to.

Balaka wakaya bua kulombola tshiluilu tshiende. Wakasangisha bantu 10 000 bavua ne dikima dia kuya kuluangana ne tshiluilu tshia Sisela tshivua tshienza buôwa. Pavua Balaka wenda ulombola bantu bende ku mukuna wa Tabô, uvua ne disanka dia muvuaye ne mushindu wa kukolesha dikima diabu. Bible udi wamba ne: ‘Debola wakaya nende.’ (Balumbuluishi 4:10) Elabi meji muvuabi mua kuikala bikankamije basalayi abu pavuabu bamone muntu mukaji wa dikima eu wenda uya nabu ku mukuna wa Tabô muele mutu mu mashi bua ditabuja divuaye nadi kudi Yehowa Nzambi!

Pakamanya Sisela ne: bena Isalele bavua benze tshiluilu bua kuluangana nende, wakenza malu ne lukasa. Bakalenge ba bungi ba bena kanana bakasangisha biluilu biabu ku tshia Mukalenge Yabine, muntu uvua mua kuikala ne bukole bupite buabu bonso. Pashishe bisumbu binene bia makalu a mvita bia Sisela kuzakejabi buloba pavuabi bienda bipueka mu mpata. Bena Kanana bavua batuishibue ne: bavua ne bua kutshimuna bena Isalele mu minite mikese patupu.​—Balumbuluishi 4:12, 13; 5:19.

Balaka ne Debola bavua mua kuenza tshinyi bu mukavua muluishi eu pabuipi nabu? Bu bobu bashale bimane pa nseke ya mukuna wa Tabô, bavua ne mushindu wa kutshimuna bena Kanana bavua benda balua, bualu makalu a mvita avua dijinga ne muaba mulandakane bua kuluangana bimpe. Kadi Balaka uvua ne bua kuluangana anu muvua Yehowa mumuambile, nunku uvua muindile anu dîyi dia kudi Debola. Pakakumbana tshikondo, Debola wakamuambila ne: “Bika biebe, bualu bua Yehowa wakafila Sisela mu bianza biebe lelu; Yehowa kena mudianjile kumpala kuebe, anyi?” Tudi tubala kabidi ne: ‘Balaka wakapueka mufume ku mukuna wa Tabô, ne bantu binunu dikumi bakamulonda ku nyima.’​—Balumbuluishi 4:14. *

Tshiluilu tshia bena Isalele tshiakatuluka ku mukuna, kuimanatshi pa muaba mulandakane anu kumpala kua makalu a mvita avua enza buôwa au. Yehowa uvuaku mudianjile kumpala kuabu bu muvua Debola mulaye anyi? Diandamuna kadivua dinenge to. Bible udi wamba ne: ‘buloba buakazakala, ne diulu diakamba kupona.’ Biluilu bia Sisela bivua ne lutambishi abi biakapanga tshia kuenza. Mvula kutuadija kuloka! Bidi bimueneka ne: uvua mvula wa bungi bualu buloba buvua buule ne mâyi ne lukasa luonso. Makalu a mvita avua ne biamu ku nkata aa avua manême bujitu ne kaatshivua kabidi ne dikuatshisha to. Akajama mu bitotshi kakuyi kabidi mushindu wa kuendawu nansha.​—Balumbuluishi 4:14, 15; 5:4.

Balaka ne bena diende kabavua ne buôwa bua tshipepele tshikole atshi to. Bavua bamanye kuvuatshi tshifumina. Bakaya bua kusambakena ne tshiluilu tshia bena Kanana. Bu muvuabu bafidi ba dinyoka dia kudi Nzambi, kabakashiya muena dia Sisela nansha umue ne muoyo to. Musulu wa Kishona wakuula, kusapalalawu, kupuekeshawu bitalu biabu mutangile nabi ku Mbuu Munene.​—Balumbuluishi 4:16; 5:21.

Lelu eu Yehowa katshitu utuma kabidi bantu bende bua kuluangana mvita to. Kadi udi ubalomba bua kuluangana mvita ya mu nyuma. (Matayi 26:52; 2 Kolinto 10:4) Tudi tuenza muetu muonso bua kutumikila dîyi dia Yehowa patudi tuditua petu mu mvita eyi. Tudi ne bua kuikala ne dikima bualu bonso badi balamate Nzambi lelu eu badi mua kutuilangana ne buluishi bukole. Kadi Yehowa ki mmushintuluke to. Utshidi anu usungila bantu badi bamueyemena ne bamuleja ditabuja bu muvua Debola, Balaka ne basalayi ba dikima ba mu Isalele wa kale benze.

Muluishi umue muena Kanana uvua mubi ku bonso wakanyema! Sisela mukengeshi munene wa bantu ba Nzambi wakanyema mu mvita ayi ku makasa. Wakashiya bantu bende bafua mu bitotshi, yeye kudiapuka bena Isalele kunyemenaye kuvua buloba bûme mutangile kua muntu wa pabuipi uvuaye upetangana nende bikole. Wakanyema ntanta wa kilometre ya bungi wenda utshina bua basalayi ba bena Isalele kabalu kumukuata, kuyaye ku ntenta ya Hebê muena Kena uvua munyeme tshisamba tshiabu tshivua katshiyi tshisomba kaba kamue, muye kusombela ku sud ne mudie tshipungidi kampanda ne mukalenge Yabine.​—Balumbuluishi 4:11, 17.

Sisela wakafika mu tshitudilu tshia Hebê mutshioke  yonso. Kusanganaye Hebê kayi kumbelu to, anu mukajende Yaele ke uvuaku. Sisela wakela meji ne: Yaele uvua ne bua kunemeka tshipungidi tshivua bayende mudie ne mukalenge Yabine. Pamuapa uvua wela meji ne: mukaji kena mua kuela meji anyi kuenza malu bishilangane ne muvua bayende mua kuenza to. Sisela kavua mumanye Yaele bimpe to! Yaele uvua mudimuene patoka muvua bena Kanana bakengesha bantu ne tshikisu tshionso muaba au; pamuapa uvua mumone kabidi ne: uvua mua kuenza bualu kampanda. Uvua mua kuambuluisha muntu mubi au anyi kutua ku tshia Yehowa ne kushipa muluishi wa tshisamba tshiende eu. Kadi uvua ne bua kuenza tshinyi? Mmunyi muvua muntu mukaji mua kutshimuna muluanganyi wa mvita mupiluke wa mushindu eu uvua ne bukole bua bungi?

Yaele uvua ne bua kuelangana meji ne lukasa luonso. Wakapesha Sisela muaba wa kuikishila. Sisela kumuambilaye bua kambidi muntu nansha umue uvua mua kulua kumukeba ne: uvuaku to. Yaele wakamubuikila pakalalaye ne pakamulomba Sisela mâyi, Yaele wakamupesha mabele. Sisela kudituaye mu tulu tukole. Ke Yaele kuangata biamu bibidi bivua bakaji badi basombele mu ntenta bamanye mua kuenza nabi mudimu bimpe, mmumue ne: mpopo ne marto. Yaele uvua kumpala kua diteta dikole pakazonzamaye pabuipi ne mutu wa Sisela, bualu uvua ne bua kufila dinyoka dia kudi Yehowa. Bu yeye mua kuelakana nansha katupa kakese patupu, bivua mua kufikisha ku kabutu. Uvua mua kuikala muele meji bua muvua muntu eu mukengeshe bantu ba Nzambi munkatshi mua makumi a bidimu anyi? Peshi uvua muele meji bua diakalenga divuaye nadi dia kuikala ku luseke lua Yehowa? Muyuki eu kawena uleja patoke bualu ebu to. Tshitudi bamanye ntshia se: bualu ebu buakenzeka diakamue. Sisela wakafua!​—Balumbuluishi 4:18-21; 5:24-27.

Pashishe Balaka wakalua kukeba muntu uvuaye wenda wipata. Pakamuleja Yaele tshitalu tshia Sisela ne mpopo uvuaye mumupopele ku luseke lua mutu, Balaka wakamanya ne: mulayi wa buprofete wa Debola uvua mukumbane. Muntu mukaji wakashipa Sisela tshilobo tshia mvita! Lelu eu bena mpata ne bena biambamba badi bamona Yaele mu mushindu mubi, kadi Balaka ne Debola bavua bamumumona bobu mu mushindu muimpe. Nzambi wakabasaka bua kutumbishabu Yaele mu musambu wabu bu “mukaji udi mutambe kubeneshibua” bua bualu bua dikima buvuaye muenze abu. (Balumbuluishi 4:22; 5:24) Debola uvua ne meji mimpe. Kavua mumvue mukawu bua muvuabu batumbishe Yaele to, kadi uvua musanke bua muvua dîyi dia Yehowa dikumbane.

Pakafua Sisela, mukalenge Yabine kavua kabidi ne bukole bua kukengesha bena Isalele to. Bena Kanana bakalekela kukengesha bena Isalele. Ditalala diakabuela mu Isalele bidimu 40. (Balumbuluishi 4:24; 5:31) Debola, Balaka ne Yaele bakabeneshibua bikole bua ditabuja diabu kudi Yehowa! Tuetu balonde ditabuja dia Debola, tulamata ku luseke lua Yehowa ne dikima dionso ne tukankamija bakuabu bua kuenza bia muomumue, Yehowa neatupeteshe ditshimuna ne ditalala dia matuku a bungi.