Pa tshibidilu kumpala kua kuenza bualu kampanda utu wanji kudiebeja ne: ‘nebungambuluishe ku tshinyi?’ Mbibi bua kudiebeja kabidi nanku bua disambila anyi? Tòo. Tutu anu basue kumanya ni didi dituambuluisha. Nansha Yobo muntu muakane wakadiebeja umue musangu ne: “Meme mumubikile, neangitabe anyi?”​—Yobo 9:16, NWT.

Mu biena-bualu bishale tuvua bamone bijadiki bia ne: disambila ndipite mukiya kampanda wa mu malu a ntendelelu anyi mushindu kampanda wa luondapu lua mu lungenyi kule ne kule. Nzambi mulelela utu bushuwa uteleja masambila. Tuetu tusambila mu mushindu muimpe ne bua malu adi mimpe, neatuteleje. Udi utukankamija bua kusemena pabuipi nende. (Yakobo 4:8) Nunku, disambila diodi ne muaba munene mu nsombelu wetu, ntshinyi tshituapeta? Tumonayi amue masanka atudi mua kupeta.

Patu ntatu ne malu makole bikufikila mu nsombelu webe, utuku udiumvua mutekeshibue ne kanyinganyinga anyi? Mu bikondo bia nunku, Bible udi utukankamija bua ‘kusambila misangu yonso’ ne ‘kumanyisha Nzambi milombu yetu.’ (1 Tesalonike 5:17; Filipoyi 4:6) Bible udi utujadikila ne: tuetu basambile Nzambi, “ditalala dia Nzambi didi dipite dijingulula dionso dia malu nedilame mioyo [yetu] ne lungenyi [luetu].” (Filipoyi 4:7) Tuetu bambile Tatu wetu wa mu diulu malu adi matutonde, tudi mua kupeta ndambu wa ditalala. Udi utukankamija bua kuenza nanku. Musambu wa 55:22 udi wamba ne: ‘Teka bujitu buebe pambidi pa Yehowa, ne yeye neakukoleshe.’

Pa buloba bujima, bantu bapite bungi bakadi bapete ditalala edi. Hee Ran wa mu ditunga dia Corée  du Sud udi wamba ne: “Nansha mundi ne ntatu mikole, pandi nsambila ndi ndiumvua musulakane ku bujitu buayi ne ndi ndiumvua ne bukole bua kuyitantamena.” Cecillia wa mu Philippines udi wamba ne: “Bu mundi mamu, ntu nditatshisha bikole bua bana banyi ne mamu wanyi ukadi katshiyi kabidi mua kummanya. Kadi disambila ndingambuluishe bua kukepesha tunyinganyinga tuanyi tua dituku dionso. Ndi mujadike ne: Yehowa neangambuluishe bua kubatabalela.”

Udiku mutuilangane ne ntatu, pamuapa muoyo webe udi mu njiwu peshi malu makole mmakufikile anyi? Kusambila “Nzambi wa busambi buonso” kudi mua kukuambuluisha. Bible udi wamba ne: udi “utusamba mu makenga etu onso.” (2 Kolinto 1:3, 4) Tshilejilu, umue musangu pavua Yezu ne dibungama dikole “wakatua binu, kutuadijaye kusambila.” Tshiakenzeka ntshinyi? “Muanjelu mufume mu diulu  wakamumuenekela, kumukoleshaye.” (Luka 22:41, 43) Nehemiya muntu mukuabu wa lulamatu, uvua ne buôwa bua bantu babi bavua bajinga kumupangisha bua kuenza mudimu wa Nzambi. Wakasambila wamba ne: “Kadi, Nzambi wanyi, ukoleshe maboko anyi.” Malu akalonda pashishe adi aleja ne: Nzambi wakamuambuluisha bua kumbusha buôwa ne kuenza mudimu wende bimpe. (Nehemiya 6:9-16) Reginald wa mu Ghana udi wamba bua masambila ende ne: “Pantu nsambila nangananga mu bikondo bindi mutshiokesha kudi ntatu, ntu ngumvua ne: ndi muyikuatshile muntu udi mukumbane bua kungambuluisha ne udi unjadikila ne: kakuena bualu bua meme kutshina nansha bumue.” Bushuwa, tuetu balombe Nzambi mu disambila, udi mua kutukolesha.

Amue mapangadika atutu tuangata atu ashala ne buenzeji kampanda kutudi anyi kudi bantu batudi banange. Mmunyi mutudi mua kuangata mapangadika a meji? Bible udi wamba ne: “Bikala umue wa kunudi mupangile meji, atungunuke ne kualomba kudi Nzambi, bualu yeye udi upesha bantu bonso ne muoyo mujima, kayi ubatobolola; nebamupeshawu.” (Yakobo 1:5) Tuetu balombe Nzambi meji, nyuma muimpe wende neatulombole bua kuangata mapangadika a meji. Bushuwa, tudi mua kumulomba nyuma muimpe bualu Yezu udi utujadikila ne: ‘Tatu wa mu diulu neapeshe badi bamulomba nyuma muimpe.’​—Luka 11:13.

Nansha pavua Yezu usua kuangata mapangadika manene, wakumvua dijinga dia kulomba Tatuende diambuluisha. Bible udi utuambila ne: pavua Yezu usua kusungula bantu 12 bua balue bapostolo bende, “wakapitshisha butuku bujima usambila Nzambi.”​—Luka 6:12.

Anu bu Yezu, bantu ba bungi lelu bakadi batuishibue padibu bamone mudi Nzambi wandamuna masambila abu a dilomba diambuluisha bua kuangata mapangadika a meji. Regina wa mu Philippines udi ulonda ntatu mishilashilangane idiye mutuilangane nayi bu mudi: kudikumbajila majinga ende ne a bena mu dîku diende panyima pa lufu lua bayende, kujimija mudimu ne kupeta ntatu mu dikolesha dia bana. Ntshinyi tshidi tshimuambuluishe bua kuangata mapangadika a meji? Udi wamba ne: “Ndi mulombe Yehowa diambuluisha mu disambila.” Kwabena wa mu Ghana udi wamba tshivua tshimusake bua kulomba Nzambi diambuluisha ne: “Mvua mujimije mudimu wanyi wa luibaku uvua umpetesha makuta a bungi.” Udi wamba bua mapangadika avuaye ne bua kuangata ne: “Ngakalomba bikole buludiki bua Yehowa bua kuangata dipangadika dimpe. Meme kumona ne: Yehowa uvua mungambuluishe bua kusungula mudimu udi ungambuluisha bua kukumbaja majinga anyi a ku mubidi ne a mu nyuma.” Wewe musambile pebe bua malu adi mua kunyanga malanda ebe ne Nzambi, udi mua kupeta buludiki buende.

Tudi batele anu malu makese patupu adi disambila mua kukuenzela. (Bua kupeta bilejilu bia bungi, tangila kazubu ka ne: “ Masanka atudi tupeta patudi tusambila.”) Kadi, bua wewe kupeta masanka aa, udi ne bua kuanji kulonga mua kumanya Nzambi ne malu adiye musue. Biwikala musue kuenza nanku, tudi tukulomba bua kuambila Bantemu ba Yehowa bua bakuambuluishe bua kulonga Bible. * Ebu ke bualu bua kumpala buakuambuluisha bua kusemena pabuipi ne ‘Muteleji wa disambila.’​—Musambu 65:2.