Lumu luimpe lufunda kudi Luka 1:1-80

TELEJA MU

Mukanda mutumina Teofilo (1-4)
Gabaliele udi umanyisha diledibua dia Yone Mubatiji (5-25)
Gabaliele udi umanyisha diledibua dia Yezu (26-38)
Mariya udi uya kutangila Elizabeta (39-45)
Mariya udi utumbisha Yehowa (46-56)
Diledibua ne dinyika dia Yone dîna (57-66)
Mulayi wa buprofete wa Zekâya (67-80)

1 Pakutangila mudi bantu ba bungi badienzeje bua kusangisha ne kufunda muyuki wa malu adibu bitabuja* bikole munkatshi muetu,+ ² anu muvuabu batulondelawu kudi bavua katshia ku tshibangidilu bamonyi+ ne bena mudimu ba mukenji,+ ³ wa kunemekibua bikole Teofilo,+ meme panyi mvua mudisuike bua kukufundilawu malondangane, bualu ndi mulondolole malu onso kubangila ku ntuadijilu ne bujalame buonso, ⁴ bua umanye bimpe bulelela bua malu adibu bakulongeshe ne mêyi a mukana.+ ⁵ Mu matuku a Helode,*+ mukalenge wa Yudaya, kuvua muakuidi mukuabu diende Zekâya wa mu tshisumbu tshia Abiya.+ Mukajende uvua wa mu bana ba bakaji ba Alona, diende uvua Elizabeta. ⁶ Bubidi buabu bavua bantu bakane kumpala kua Nzambi, benda kabayi kalema bilondeshile mêyi onso ne malu onso adi mikenji ya Yehowa* ilomba. ⁷ Kadi kabavua ne muana to, bualu Elizabeta uvua nkumba ne bubidi buabu bakavua ne bidimu bia bungi menemene. ⁸ Kadi pavuaye wenza mudimu wa buakuidi uvuabu bapeshe tshisumbu tshiabu+ kumpala kua Nzambi, ⁹ bilondeshile tshilele* tshimana kujadika tshia buakuidi, dîba diende dia kulambula musenga wa manananshi diakakumbana,+ pakabuelaye mu muaba munsantu wa Yehowa.*+ ¹⁰ Nunku, tshisumbu tshionso tshia bantu tshivua tshisambila pambelu dîba dia kulambula musenga wa manananshi. ¹¹ Muanjelu wa Yehowa* wakamumuenekela, muimane ku luseke lua dia balume dia tshioshelu tshia musenga wa manananshi. ¹² Kadi Zekâya wakapampakana pakamumonaye, buôwa buakamukuata. ¹³ Kadi muanjelu wakamuambila ne: “Zekâya, kutshinyi to, bualu mbumvue kusengelela kuebe bimpe, mukajebe Elizabeta neakulelele muana wa balume, neumuinyike dîna ne: Yone.+ ¹⁴ Newikale ne disanka ne musangelu wa bungi, ne bantu ba bungi nebasanke bua diledibua diende,+ ¹⁵ bualu yeye neikale munene ku mêsu kua Yehowa.*+ Kadi kena ne bua kunua mvinyo anyi maluvu makole nansha kakese,+ neuwujibue tente ne nyuma muimpe* anu kumpala kua diledibua* diende mene,+ ¹⁶ neapingaje ba bungi ba ku bana ba Isalele kudi Yehowa* Nzambi wabu.+ ¹⁷ Kabidi, neaye kumpala kuende ne nyuma ne bukole bia Eliya,+ bua kupingaja mioyo ya batatu kudi bana,+ ne kupingaja badi kabayi batumikila ku meji adi ambuluisha a bantu bakane, bua kulongoluela Yehowa* bantu bamana kulongolola.”+ ¹⁸ Zekâya wakambila muanjelu ne: “Mmunyi mungajadika bualu ebu? Bualu nkadi mukulakaje ne mukajanyi ukadi ne bidimu bia bungi menemene.” ¹⁹ Muanjelu wakamuandamuna ne: “Meme ndi Gabaliele,+ utu wimana pabuipi kumpala kua Nzambi,+ bavua bantume bua kuyukila nebe ne bua kukumanyisha lumu luimpe elu. ²⁰ Kadi tangila! neupuwe, kuyi mua kuakula, too ne dituku dienzeka malu aa, bualu kuena muitabuje mêyi anyi ikala mua kukumbana mu tshikondo tshiawu tshisungula to.” ²¹ Dîba adi, bantu bavua batungunuka ne kuindila Zekâya, ne bakakema bua muvuaye munenge bikole mu muaba munsantu. ²² Pakapatukaye, kavua mua kuakula nabu to, bakajingulula ne: uvua ufuma ku dimona tshikena kumona mu muaba munsantu. Wakatungunuka ne kubakuisha ne bianza, kadi wakashala kamama. ²³ Pakajika matuku a mudimu wende wa tshijila,* wakaya kuende. ²⁴ Panyima pa matuku, mukajende Elizabeta wakimita difu, kushalaye musombe pa nkayende ngondo itanu, wamba ne: ²⁵ “Eu ke mushindu udi Yehowa* mungenzele malu matuku aa. Mmutume ntema yende kundi bua kumbusha bundu buanyi munkatshi mua bantu.”+ ²⁶ Mu ngondo wende muisambombo, muanjelu Gabaliele+ wakatumibua kudi Nzambi mu tshimenga tshia mu Galela tshivuabu babikila ne: Nazaleta, ²⁷ kudi nsongakaji kampanda utshivua kamama+ uvuabu babangile* kudi mulume mukuabu, diende Jozefe, wa mu nzubu mua Davidi, ne dîna dia nsongakaji utshivua kamama au divua Mariya.+ ²⁸ Pakabuela muanjelu, wakamuambila ne: “Muoyo au, wewe udi muanyishibue bikole, Yehowa* udi nebe.” ²⁹ Kadi yeye wakapampakana bikole bua mêyi ende ne kutetaye bua kujingulula tshivua muoyo eu umvuija. ³⁰ Ke muanjelu kumuambila ne: “Mariya, kutshinyi to, bualu udi muanyishibue kudi Nzambi. ³¹ Tangila! newimite difu,* neulele muana wa balume,+ udi ne bua kumuinyika ne: Yezu.+ ³² Yeye eu neikale munene,+ nebamubikile ne: Muana wa Mutambe Bunene,+ ne Yehowa* Nzambi neamupeshe nkuasa wa bukalenge wa tatuende Davidi,+ ³³ ne neakokeshe bu Mukalenge ku mutu kua nzubu wa Yakoba bua kashidi, Bukalenge buende kabuakuikala ne ndekelu to.”+ ³⁴ Kadi Mariya wakakonka muanjelu ne: “Bualu ebu nebuenzeke mushindu kayi bualu meme tshiena muanji kusangila ne mulume?”+ ³⁵ Muanjelu wakamuandamuna ne: “Nyuma muimpe* nealue kuudi,+ bukole bua Mutambe Bunene nebukubuikile. Bua bualu abu, eu waledibua nebamubikile ne: wa tshijila,+ Muana wa Nzambi.+ ³⁶ Tangila! Mulela webe Elizabeta mmuimite pende muana wa balume mu bukulakaja buende, ne ngondo eu nguende muisambombo, mukaji uvuabu bamba ne: nkumba; ³⁷ bualu kakuena dîyi dikala* Nzambi kayi mua kukumbaja to.”+ ³⁸ Pashishe Mariya wakamba ne: “Mona! meme nsongakaji mupika wa Yehowa!* Bingenzekele anu muudi muambe.” Nunku muanjelu wakamushiya. ³⁹ Ke Mariya kuasa luendu mu matuku au, kuyaye ne lukasa mu buloba bua mikuna, mu tshimenga kampanda tshia Yuda, ⁴⁰ kubuelaye mu nzubu mua Zekâya, kuelaye Elizabeta muoyo. ⁴¹ Nunku, pakumvua Elizabeta muoyo wa Mariya, muana uvua munda muende wakatumpika, Elizabeta wakuwujibua tente ne nyuma muimpe,* ⁴² kuelaye dîyi dikole ne: “Wewe udi mubeneshibue munkatshi mua bakaji, ne dimuma dia munda muebe ndibeneshibue! ⁴³ Nunku, mmunyi mundi mupete diakalenga edi: dia mamuende wa Mukalenge wanyi kulua kundi? ⁴⁴ Bualu mona! pavua dîyi dia muoyo uuvua mungele difike ku matshi anyi, muana udi munda muanyi uvua mutumpike bua disanka. ⁴⁵ Kabidi mukaji udi muitabuje ngua diakalenga, bualu malu avuabu bamuambile a kudi Yehowa* neakumbane onso.” ⁴⁶ Nunku Mariya wakamba ne: “Anyima wanyi* udi utumbisha Yehowa,*+ ⁴⁷ ne lungenyi luanyi kaluena mua kudikanda bua kuikala ne disanka dipite bungi bua Nzambi Musungidi wanyi,+ ⁴⁸ bualu mmutangile muaba mushadile wa mupika wende mukaji.+ Bualu tangilayi! kutuadija ku mpindieu bipungu bionso bia bantu nebiambe mundi wa diakalenga,+ ⁴⁹ bualu Wa bukole mmungenzele malu manene, ne dîna diende ndia tshijila,+ ⁵⁰ ne bualu ku tshipungu ne ku tshipungu tshia bantu luse luende ludi kudi badi bamutshina.+ ⁵¹ Mmuenze malu ne bukole ne diboko diende; mmutangalaje badi badibandisha mu meji a mu mioyo yabu.+ ⁵² Mmutulule bantu badi ne bukokeshi mu nkuasa ya bukalenge,+ mmubandishe bapuekele;+ ⁵³ mmukutshishe bikole badi ne nzala ne bintu bimpe,+ ne mmupingaje bavua ne bubanji bianza bitupu. ⁵⁴ Mmuambuluishe Isalele muena mudimu wende, uvuluka luse luende+ ⁵⁵ bua kashidi, anu bu muvuaye muambile bankambua betu, muambile Abalahama ne bana* bende.”+ ⁵⁶ Mariya wakashala nende ngondo mitue ku isatu, pashishe wakapingana kuende. ⁵⁷ Mpindieu, tshikondo tshiakakumbana bua Elizabeta kulela, wakalela muana wa balume. ⁵⁸ Bena mutumba ne balela bende bakumvua ne: Yehowa* uvua mutumbishe luse luende kudiye, bakasanka nende.+ ⁵⁹ Mu dituku dia muanda mukulu bakalua bua kutengula muana,+ ne bavua basue kumuinyika dîna dia tatuende, Zekâya. ⁶⁰ Kadi mamuende wakandamuna ne: “Tòo, kadi nebamuinyike ne: Yone.” ⁶¹ Bua bualu ebu, bakamuambila ne: “Kakuena mulela webe nansha umue udibu binyike dîna edi to.” ⁶² Ke bobu kukonka tatuende ne bianza dîna divuaye musue bua bikale bamubikila. ⁶³ Nunku, wakalomba kabaya, yeye kufunda ne: “Yone ke dîna diende.”+ Bua bualu abu bonso bakakema. ⁶⁴ Diakamue, mukana muende muakabululuka, ludimi luende kusuluka ne kutuadijaye kuakula,+ utumbisha Nzambi. ⁶⁵ Buôwa buakakuata bena mutumba babu bonso, ne bakatuadija kuakula bua malu aa onso mu buloba buonso bua mikuna bua Yudaya. ⁶⁶ Nunku bonso bakumvua bualu ebu bakabulama mu mioyo yabu, badikonka ne: “Muana eu nealue nganyi?” Bualu tshianza tshia Yehowa* tshivua nende bushuwa. ⁶⁷ Pashishe, tatuende Zekâya wakuwula tente ne nyuma muimpe,* wakakula mêyi a buprofete, wamba ne: ⁶⁸ “Yehowa,* Nzambi wa Isalele,+ atumbishibue, bualu mmutume ntema yende kudi bantu bende ne mmubatuadile lupandu.+ ⁶⁹ Mmutujudile lusengu lua lupandu*+ mu nzubu mua Davidi muena mudimu wende,+ ⁷⁰ anu bu mudiye muakuile mukana mua baprofete bende ba tshijila ba kale,+ ⁷¹ bua kutupandisha kudi bena lukuna betu ne ku tshianza tshia bantu bonso badi batukine;+ ⁷² bua kuleja luse bua bualu bua bankambua betu ne bua kuvuluka tshipungidi tshiende tshia tshijila,+ ⁷³ mutshipu wakaditshipaye kudi Abalahama nkambua wetu,+ ⁷⁴ bua, tuetu bamane kupikudibua mu bianza bia bena lukuna, kutupesha diakalenga dia kumuenzela mudimu wa tshijila kakuyi buôwa ⁷⁵ ne lulamatu ne buakane kumpala kuende matuku etu onso. ⁷⁶ Kadi wewe, muana mutekete, nebakubikile ne: muprofete wa Mutambe Bunene, bualu neudianjile kumpala kua Yehowa* bua kulongolola njila yende,+ ⁷⁷ bua kupesha bantu bende dimanya dia lupandu ku dibuikidibua dia mpekatu yabu,+ ⁷⁸ bua luse lunene lua Nzambi wetu. Ku luse elu, butoke bua patshiatshia nebulue kutudi bufumina muulu, ⁷⁹ bua kutokesha badi basombe mu mîdima ne mu mundidimbi wa lufu+ ne bua kuludika makasa etu mu njila wa ditalala.” ⁸⁰ Nunku muana eu wakakola, wakalua ne lungenyi lukole, wakashala mu tshipela too ne dituku diakadilejaye patoke kudi Isalele.