1, 2. Mmushindu kayi uvua malu mashintuluke pa buloba kubangila mu tshikondo tshia Noa? Abalama uvua umvua bishi?

ABALAMA uvua mushale mutangile ntempelo uvua mu tshimenga tshiabu tshia Ula. * Kuvua mitoyi ivua yumvuikamu ne mishi ipatukamu. Bakuidi ba nzambi ngondo bavua balambulamu milambu. Fuanyikijabi mudi Abalama ukudimuka, wenda ukupa mutu, mubipishe kuîsu. Padiye wenza luendu upitshila munkatshi mua bisumbu bia bantu bidi mu njila, pamuapa udi wela meji bua ditendelela mpingu didi ditue ntanga tshibua mu tshimenga tshia Ula. Abalama uvua umvua bibi menemene bua muvua ntendelelu wa dishima mutangalake bikole kubangila ku matuku a Noa.

² Noa wakafua bidimu bibidi patupu kumpala kua Abalama kuledibuaye. Pavua Noa ne dîku diende bapatuke mu buatu panyima pa Mvula wa kabutu, wakalambula Yehowa mulambu ne Yehowa pende wakapatula muanza-nkongolo. (Gen. 8:20; 9:12-14) Tshikondo atshi, kakuvua ntendelelu wa dishima to. Kadi pavua bantu ba mu tshipungu tshia dikumi kutuadijila ku Noa benda batangalaka pa buloba, bikavua bilue bikole bua kupeta bantu bavua batendelela Nzambi mulelela. Miaba yonso bantu bavua batendelela nzambi ya dishima. Nansha Tela, tatuende wa Abalama, uvua pende utendelela mpingu, pamuapa uvua kabidi uyenza.—Yosh. 24:2.

3. Abalama uvua ne ngikadilu kayi? Bualu ebu budi butulongesha tshinyi?

³ Abalama uvua mushilangane bikole ne bantu ba mu tshikondo tshiende bualu uvua ne ditabuja dikole kudi Nzambi. Ke bualu kayi ku diambuluisha dia nyuma wa Nzambi, mupostolo Paulo wakalua kumubikila ne: “Tatu wa bantu bonso badi ne ditabuja.” (Bala Lomo 4:11.) Tumonayi tshiakambuluisha Abalama bua kukolesha ditabuja diende. Ku diambuluisha dia tshilejilu tshiende, netulonge malu a bungi bua mushindu utudi mua kukolesha ditabuja dietu.

4, 5. Nnganyi uvua mua kuikala mulongeshe Abalama malu a Yehowa? Bua tshinyi tudi tuamba nanku?

⁴ Mmunyi muvua Abalama mufike ku dimanya Yehowa Nzambi? Tudi bamanye ne: kuvua bantu ba lulamatu bavua balamate Yehowa tshikondo atshi. Tudi mua kutela bu mudi Sheme. Nansha muvuaye kayi muana wa kumpala mu bana basatu ba Noa, Bible udi utamba kumutela kumpala kua bakuabu. Pamuapa bualu Sheme uvua ne ditabuja dikole. * Musangu mukuabu panyima pa Mvula wa kabutu, Noa uvua mubikile Yehowa ne: “Nzambi wa Sheme.” (Gen. 9:26) Sheme uvua unemeka Yehowa ne ntendelelu mulelela.

⁵ Abalama uvuaku mumanye Sheme anyi? Bidi bimueneka ne: uvua mumumanye. Fuanyikijabi patshivua Abalama nsonga. Uvua mua kuikala musanke pavuabu bamuambile ne: uvua ne nkambua wende uvua mulale bidimu bipite pa 400. Sheme uvua mumone muvua malu mabi enzeka kumpala kua Mvula wa kabutu, muvua mvula mujikije bubi pa buloba, muvua bisamba bia kumpala bituadije pavua bantu benda bavulangana pa buloba ne mumone matuku mabi a buntomboji bua Nimeloda ku tshibumba tshia Babela. Bu muvua Sheme mulamate Nzambi, kavua mubuelakane mu buntomboji abu to, nanku pavua Yehowa Nzambi mutompakaje muakulu wa bibaki ba tshibumba, Sheme ne bena mu dîku diende bakatungunuka ne kuakula muakulu uvua bantu bakula ku ntuadijilu, ke muakulu uvua Noa wakula. Abalama uvua umue wa ku bena mu dîku adi. Bidi bimueneka ne: Abalama uvua unemeka Sheme mu dikola diende. Bualu bukuabu, Sheme utshivua ne muoyo too ne pakavua Abalama ne bidimu bia bungi. Nunku Sheme ke uvua mua kuikala mulongeshe Abalama malu a Yehowa.

6. a) Mmunyi muvua Abalama muleje ne: Mvula wa kabutu uvua mumupeshe dilongesha dinene? b) Abalama ne Salai bavua ne nsombelu wa mushindu kayi?

⁶ Mu malu onso au, Mvula wa kabutu uvua mupeshe Abalama dilongesha dinene. Wakadienzeja bua kuenda ne Nzambi anu bu Noa. Ke bualu kayi Abalama wakabenga ditendelela dia mpingu, kushalaye mushilangane ne bantu bakuabu ba mu tshimenga tshia Ula, pamuapa too ne bena mu dîku diabu. Kadi, wakapeta mukaji muimpe be! Wakasela Salai mukaji wa pa buende bualu uvua muimpe kumona ne  uvua kabidi ne ditabuja dikole kudi Yehowa. * Nansha muvuabu kabayi balele, bidi bimueneka ne: bavua ne disanka dia bungi bua muvuabu benzela Yehowa mudimu pamue. Bakakolesha kabidi Lota, muana wa muanabu ne Abalama uvua muana wa nshiya.

7. Leja mudi bayidi ba Yezu mua kuidikija Abalama.

⁷ Abalama kakalekela musangu nansha umue Yehowa bua kutendelela mpingu ya mu tshimenga tshia Ula to. Yeye ne Salai bavua basue kuikala bashilangane ne batendeledi ba mpingu abu. Tuetu basue kukolesha ditabuja dietu, tudi ne bua kubidikija. Tudi petu ne bua kuikala bashilangane ne bantu bakuabu. Yezu wakamba ne: bayidi bende kabavua ne bua kuikala “ba pa buloba” to, ne ba pa buloba bavua ne bua kubakina. (Bala Yone 15:19.) Wewe ne kanyinganyinga bualu bena mu dîku dienu anyi bualu bantu ba muaba uudi musombele mbakubenge bua dipangadika diebe dia kuenzela Yehowa mudimu, uvuluke ne: kuena nkayebe to. Udi widikija tshilejilu tshimpe tshia Abalama ne Salai bavua benzele Nzambi mudimu ne lulamatu.

8, 9. a) Mbualu kayi buvua buenzekele Abalama buvuaye kayi mua kupua muoyo? b) Yehowa wakambila Abalama tshinyi?

⁸ Dituku dikuabu, bualu kampanda buakenzeka buvua Abalama kayi mua kupua muoyo. Wakapeta mukenji wa kudi Yehowa Nzambi. Bible kena utuambila malu a bungi adi atangila bualu ebu to, kadi udi wamba ne: “Nzambi wa butumbi” wakamumuenekela. (Bala Bienzedi 7:2, 3.) Abalama kumonaye kadiosha ka butumbi bua dikema bua Mukalenge Mutambe Bunene wa diulu ne buloba, pamuapa ku diambuluisha dia muanjelu uvuabu bamutumine. Tutetabi kufuanyikija disanka divua nadi Abalama pakamonaye muvua Nzambi wa muoyo mushilangane ne mpingu ya patupu ivua bantu ba mu tshikondo tshiende batendelela.

⁹ Mukenji wa kudi Yehowa uvuabu bambile Abalama uvua bishi? Uvua ne: “Umbuka mu ditunga dienu ne munkatshi mua balela bebe, ulue mu ditunga dingakuleja.” Yehowa kavua mutele ditunga divua Abalama ne bua kuya to, wakamba amu ne: neamulejadi. Tshia kumpala, Abalama uvua ne bua kushiya ditunga diabu ne balela bende. Bilondeshile bilele bivua mu Asia wa pankatshi kale, bantu bavua bangata bena mu dîku diabu ne mushinga wa bungi. Bavua bamona kushiyangana ne balela babu bu bualu bubi menemene, bua bamue bivua bitonda kupita ne lufu.

10. Bua tshinyi bivua mua kuikala bikolele Abalama ne Salai bua kumbukabu mu Ula?

¹⁰ Bidi bimueneka ne: bivua bikole bua Abalama kushiya nsombelu muimpe uvua mu tshimenga tshia Ula, tshivua ne bubanji ne bantu ba bungi. (Bala kazubu ka ne:  “Tshimenga tshivua Abalama ne Salai bashiye.”) Bintu bidibu bangule muinshi mua buloba bidi bileja  ne: mu tshimenga tshia Ula muvua nzubu mimpe, mikuabu mikale ne nzubu ya munda 12 anyi kupita apu bua bena mu dîku ne bena mudimu, bavua bele kabidi mabue panshi malongolola bimpe mu lubanza lujima. Muvua milonda ya mâyi ku mbelu, ne nkumba ne miaba milongolola ivua ipuekesha butshiafu. Vuluka kabidi ne: Abalama ne Salai bakavua bantu bakole, Abalama uvua mua kuikala ne bidimu 70 ne bia mu njila, Salai uvua yeye ne bidimu 60 ne bia mu njila. Bidi bimueneka ne: anu bu mulume yonso muimpe, Abalama uvua musue bua Salai ikale bimpe ne kikadi bu mukaji mulekelela to. Elabi meji muvuabu bayukila bua luendu elu, nkonko ivuabu badiela ne muvua bualu ebu bubasamisha mutu. Abalama uvua mua kuikala musanke bikole pavua Salai muitabe bua kuenza luendu alu. Anu bu Abalama, Salai wakanyisha bua kushiya bintu bionso bia mushinga mukole bia mu nzubu.

11, 12. a) Leja malu avuabu ne bua kuenza ne mapangadika avuabu ne bua kuangata kumpala kua kumbuka mu Ula. b) Mmunyi muudi mua kumvuija tshivua mua kuikala tshienzeke dituku dia luendu luabu?

¹¹ Bu muvua Abalama ne Salai bangate dipangadika dia kuya, bavua ne bia bungi bia kuenza. Bivua bikengela badilongolole ne basuike mabuki. Bivuabu ne bua kuya nabi anyi kushiya mbinganyi kabamanyi kuyayabu? Bavua kabidi ne bua kukeba tshia kuenza ne bena mu dîku diabu ne bena mudimu babu ne nangananga Tela, tatuende wa Abalama. Bakangata dipangadika dia kuya ne Tela ne kumulama too ne pavuaye mua kufua. Tela uvua mua kuikala muitabe bua kuya kayi muenzeja, bualu Bible udi wamba ne: wakamuangala ne dîku diende mu tshimenga tshia Ula. Bidi bimueneka ne: Tela wakalekela kutendelela mpingu. Lota, muana wa muanabu ne Abalama uvua pende ne bua kuya nabu.—Gen. 11:31.

¹² Ndekelu wa bionso, dîba dia luendu diakakumbana. Fuanyikijabi bena ngendu badisangisha pambelu pa tshimenga ne ku muelelu wa bina bivua bipuekesha mâyi. Bintu bisuika panyima pa nyama ya mpunda ne tumelo, tshisumbu tshia mikoko eku tshimane, bena mu dîku ne bena mudimu basombe muntu ne muntu pa muaba wende, bonso ne mioyo kuulu kuulu bua kuya. * Pamuapa bonso mbatangile Abalama, bindile bua abambile bua kuasabu luendu. Mpindieu tshikondo tshiakumbanyi, kudituabu mu njila, kushiyabu Ula bua kashidi.

13. Mmunyi mudi batendeledi ba Yehowa lelu baleja lungenyi lua buena lua Abalama ne Salai?

¹³ Lelu, batendeledi ba Yehowa ba bungi mbangate dipangadika dia kuya muaba udibu dijinga ne bamanyishi ba bungi. Bakuabu mbangate pabu dipangadika dia kulonga muakulu mupiamupia bua kuvudijabu mudimu wabu wa buambi. Anyi mbangate dipangadika dia kukeba mishindu mikuabu ya kuyisha ivuabu kabayi banji kuteta. Malu onso aa adi alomba kudipangisha amue malu, mbuena kuamba ne:  kuanyisha bua kushiya bimue bintu bia ku mubidi. Batendeledi ba Yehowa badi bitabe bua kuidikija Abalama ne Salai mushindu eu mbakumbanyine kalumbandi. Tuetu bikale ne ditabuja dia nunku, tuikale bashindike ne: Yehowa neatupeshe bintu bia bungi kupita ne bitudi tufila. Katu upanga kufuta bantu badi ne ditabuja to. (Eb. 6:10; 11:6) Wakafuta Abalama anyi?

14, 15. Umvuija muvua luendu kumbukila mu Ula too ne ku Halana. Abalama uvua mua kuikala muangate dipangadika dia kutula mu Halana bua tshinyi?

¹⁴ Ku kakese ku kakese bena ngendu aba bakatuadija kuibidilangana ne luendu luabu. Fuanyikijabi muvua Abalama ne Salai benda bimue bitupa bia njila pa mpunda ne bikuabu ku makasa; muvua miyuki yabu yumvuika ne mitoyi ya ngonga idi mu nshingu mua nyama iyijibakaja. Ku kakese ku kakese, too ne bantu bavua kabayi banji kuenza ngendu bakamanya pabu mua kuasa ntenta ne kuyumbusha, kumanyabu kabidi mua kuambuluisha Tela ukavua mukulakaje bua kusomba bimpe pa mpunda anyi pa kamelo. Bakaya batangile ku Nord-Ouest, bendela ku muelelu wa musulu wa Efelata. Matuku avua enda apita, bobu pabu batungunuka ne luendu luabu.

¹⁵ Ndekelu wa bionso, bobu bamane kuenza kilometre 960 mu njila, bakafika mu tuzubu tua mu Halana, tshimenga tshimpe tshidi mu njila udi ufumina ku Est mutangile ku Ouest uvua ba ngenda-mushinga bapitshila. Bakanji kutula, kusombabu mu Halana ndambu.  Pamuapa Tela ukavua mukulakaje bikole, kavua mua kuenda ntanta mule menemene to.

16, 17. a) Ntshipungidi kayi tshivua tshisankishe Abalama? b) Mmunyi muvua Yehowa mubeneshe Abalama mu matuku avuaye musombe mu Halana?

¹⁶ Pakapita matuku, Tela wakafua ne bidimu 205. (Gen. 11:32) Dîba adi, Abalama wakakola ku muoyo pavua Yehowa muyikile nende kabidi bua kumusamba. Wakambulula malu avuaye mumuambile pavuaye mu Ula, kumumvuijaye milayi yende mu bule ne butshiama. Abalama uvua ne bua kulua “tshisamba tshinene,” ne bavua ne bua kubenesha bantu bonso ba pa buloba bua bualu buende. (Bala Genese 12:2, 3.) Tshipungidi tshivua Abalama mudie ne Nzambi etshi tshiakamusaka bua kutungunuka ne luendu.

¹⁷ Mpindieu Abalama uvua kabidi ne bintu bia bungi bia kusuika, bualu Yehowa uvua mumubeneshe mu matuku avuaye musombe mu Halana. Bible udi wakula bua ‘bintu biabu bionso, ne bantu bonso bakapetabu mu Halana.’ (Gen. 12:5) Bua Abalama kuluaye tshisamba, bivua bikengela ikale ne bintu ne bena mudimu, mmumue ne: bena mu dîku ba bungi. Misangu yonso, Yehowa katu anu uvuija batendeledi bende babanji to, kadi utu ubapesha bionso bidibu nabi dijinga bua kuenzabu disua diende. Bu muvua Yehowa mumukoleshe, Abalama wakatungunuka ne luendu luende kamanyi kuvuaye uya.

18. a) Ndîba kayi divua bualu bua mushinga mukole mu malu adi Nzambi wenzela bantu bende buenzekele Abalama? b) Mmalu kayi makuabu a mushinga mukole akenzeka mu dia 14 Nisana mu bidimu biakalonda? (Bala kazubu ka ne: “Dituku dia mushinga mukole mu miyuki ya mu Bible.”)

¹⁸ Bakenza matuku ndambu bua kumbuka mu Halana ne kufika mu Kâkemisha, muaba uvua tshisumbu tshia bena luendu aba tshisabuke musulu wa Efelata. Pamuapa dîba adi ke divua bualu bua mushinga mukole mu malu adi Nzambi wenzela bantu bende buenzekele Abalama. Bidi bimueneka ne: Abalama uvua musabuke musulu ne bantu bavuaye nabu mu 1943 kumpala kua Yezu, mu dia 14 dia ngondo wakaluabu kubikila pashishe ne: Nisana. (Ekes. 12:40-43) Lua ku Sud ke kuvua ditunga divua Yehowa mulaye bua kuleja Abalama. Dituku adi, ke diakatuadija tshipungidi tshivua Nzambi mudie ne Abalama kuenza mudimu.

19. Mu mulayi uvua Yehowa muambile Abalama, uvua muakule bua bualu kayi? Bualu ebu buvua mua kuikala buvuluije Abalama tshinyi?

¹⁹ Abalama wakaya lua ku Sud kua ditunga adi, bantu bende bakatula pabuipi ne mitshi  minene ya mu Mole, pabuipi ne Shekeme. Kuine aku Yehowa wakayukila kabidi ne Abalama. Nzambi wakakula dîba adi bua mulayi uvua utangila ndelanganyi ya Abalama ivua ne bua kusomba mu buloba abu. Abalama uvuaku mua kuikala muvuluke mulayi wa buprofete uvua Yehowa muambe mu Edene uvua wakula bua “muana” anyi kankanunuina kavua mua kulua kusungila bantu anyi? (Gen. 3:15; 12:7) Bidi mua kuikala nanku. Abalama uvua mua kuikala mutuadije kumvua ne: uvua ne mudimu mu dilongolola dinene dia Nzambi.

20. Mmushindu kayi uvua Abalama muleje dianyisha bua diakalenga divua Yehowa mumupeshe?

²⁰ Abalama wakanyisha bikole diakalenga divua Yehowa mumupeshe. Pavua Abalama unyunguluka mu buloba abu, wakimana, kuashilaye Yehowa tshioshelu, musangu wa kumpala ku Mole pashishe pabuipi ne Betele, bidi bimueneka ne: bu muvua bena Kanana basombelamu, wakenza bualu ebu ne budimu. Wakatuadija kubila dîna dia Yehowa, pamuapa bua kuela Nzambi wende tuasakidila ne muoyo mujima pavuaye utangila malu avua ndelanganyi yende ne bua kupeta. Uvua mua kuikala kabidi muyishe bena mutumba bende ba mu Kanana. (Bala Genese 12:7, 8.) Bushuwa, Abalama uvua ne bua kupeta ntatu ya bungi. Kadi, kavua kabidi utangila nzubu wende ne bubanji buvuaye mushiye mu Ula to. Uvua mutume meji ende anu ku malu avua Yehowa mumulaye. Ebelu 11:10 udi wamba ne: Abalama “uvua muindile tshimenga tshidi ne bishimikidi bilelela, tshidi Nzambi muikale muenji ne muibaki.”

21. Leja mudi dimanya ditudi nadi dipite dia Abalama bua Bukalenge bua Nzambi. Bualu ebu budi bukusaka bua kuenza tshinyi?

²¹ Tuetu badi benzela Yehowa mudimu lelu tudi bamanye malu a bungi a tshimenga tshia mu tshimfuanyi etshi, mbuena kuamba ne: Bukalenge bua Nzambi, kupita Abalama. Tudi bamanye ne: Bukalenge ebu budi bukokesha mu diulu ne bukadi pa kubutula bulongolodi bubi ebu; tudi bamanye kabidi ne: kankanunuina (kavuabu balaye Abalama munkatshi mua bidimu bia bungi) anyi Yezu Kristo udi mpindieu ukokesha Bukalenge ebu. Netuikale ne diakalenga dinene dia kumona Abalama pabikaye ku lufu, ne dîba adi Abalama neumvue bimpe muvua Yehowa mukumbaje disua diende. Udiku musue kumona muikala Yehowa mua kukumbaja milayi yende yonso anyi? Nanku, mbimpe utungunuke ne kuenza tshivua Abalama muenze. Wikale ne lungenyi lua kudipangisha amue masanka, lua ditumikila ne wikale ne dianyisha dia bungi bua diakalenga didi Yehowa mukupeshe. Wewe widikija ditabuja dia Abalama, “tatu wa bantu bonso badi ne ditabuja,” nealue tatu webe pebe mu ngumvuilu kampanda.