Malu mabi akatuadija pa buloba pavua Satana muambe dishima dia kumpala. Satana uvua muanjelu muimpe pakamufuka Nzambi, kavua ne kalema to, kadi “kakimana bikole mu bulelela” nansha. (Yone 8:44) Wakapeta dijinga dia kumutendelelabu kudi bantu; yeye kulekela dijinga edi dienda dikola munda muende. Ke yeye kushima Eva, kumusakaye bua amutumikile yeye, pamutu pa kutumikilaye Nzambi. Adama wakatua ku tshia mukajende, kutombokelaye pende Nzambi. Bualu buvua Adama muenze buakatukebela makenga ne lufu.​—Bala Genese 3:1-6, 19.

Pavua Satana musake Eva bua kutombokelaye Nzambi, wakatuadija kuluisha bumfumu bua Nzambi. Bantu ba bungi mbatue ku tshia Satana bualu badi babenga bua Nzambi kubalombolaye. Ke mudi Satana mulue “mukokeshi wa buloba ebu” nunku.​—Bala Yone 14:30; 1 Yone 5:19.

Bintu bionso bidi Nzambi mufuke kabiena ne kalema. Uvua mufuke bantu ne banjelu bakumbane bimpe menemene bua kutumikilabu mikenji yende. (Dutelonome 32:4, 5) Nzambi wakatupesha tshipedi tshia kudisunguila bua kuenza malu mimpe anyi malu mabi. Tshipedi etshi tshidi tshitupetesha mushindu wa kumuleja mutudi bamunange.​—Bala Yakobo 1:13-15; 1 Yone 5:3.

Yehowa mmuanji kulekela bantu batombokela bumfumu buende bua tshikondo kampanda. Bua tshinyi? Bua kuleja ne: padiye yeye kayi ulombola bantu, bionso bidibu benza, bidi tshianana. (Muambi 7:29; 8:9) Tshilumbu tshidi tshitangila bukokeshi ntshidikose nkayatshi munkatshi mua bidimu 6 000  bidi bantu badilombole nkayabu. Tshilejilu, mbulamatadi ya bantu mmipangile bua kujikija mvita, ne tshikisu, ne kansungasunga, ne masama.​—Bala Yelemiya 10:23; Lomo 9:17.

Bukokeshi bua Nzambi mbushilangane ne bua bantu, bualu Nzambi udi ufuta bantu badi bitaba bua ikale Mfumuabu. (Yeshaya 48:17, 18) Yehowa ukadi pa kubutula mbulamatadi ya bana ba bantu. Anu bantu badi basungula bua Nzambi kubalombolaye, ke basomba pa buloba.​—Yeshaya 11:9.​—Bala Danyele 2:44.

Tangila filme wa Nzambi mmulekele makenga bua tshinyi?

Satana wakamba ne: kakuena muntu udi mua kulamata Nzambi anu bualu mmumunange mu bulelela to. Kadi wewe udi mua kuleja ne: bualu ebu mbua dishima anyi? Eyowa! Lutulu lua Nzambi ludi lupetesha muntu yonso mushindu wa kuleja bikalaye musue bumfumu buende anyi bua bantu. Malu atudi tuenza ke adi aleja bumfumu butudi basue.​—Bala Yobo 1:8-12; Nsumuinu 27:11.

Tudi tusungula Nzambi bua ikale Mfumuetu patudi tulonga malu a ntendelelu udi ulonda tshidi Bible wamba menemene ne tuenza malu au. (Yone 4:23) Tudi tuleja ne: katuena basue bua Satana atulombole, patudi tubenga kubuelakana mu malu a tshididi ne mu mvita, anu bu Yezu.​—Bala Yone 17:14.

Satana udi wenza bua bantu bamone malu mabi ne tshiendenda bu malu mimpe. Patudi tubenga kuenza malu aa, bamue balunda betu ne balela betu badi mua kutuseka anyi kutuluisha. (1 Petelo 4:3, 4) Ke dîba ditudi ne bua kusungula tshia kuenza adi. Netulamate bantu badi banange Nzambi anyi? Netutumikile mikenji ya Nzambi idi ileja mudiye ne meji ne mudiye mutunange anyi? Tuetu benze nanku, netuleje ne: Satana uvua mushime pavuaye muambe ne: kakuena muntu udi mua kuenza disua dia Nzambi padiye mu ntatu nansha.​—Bala 1 Kolinto 6:9, 10; 15:33.

Mushindu udi Nzambi munange bantu udi uleja ne: ntatu ne malu mabi nebijike. Bantu badi baleja ne: badi bitabuja bualu ebu nebapete muoyo wa tshiendelele pa buloba.​—Bala Yone 3:16.