Mariya uvua ne difu dia ngondo inayi. Vuluka ne: uvua mupitshishile ngondo ya kumpala ya difu diende ku sud mu mikuna ya Yudaya pavuaye muye kutangila mulela wende Elizabeta. Kadi mpindieu Mariya mmupingane kumbelu ku Nazaleta. Mpindieu, difu diende dikadi pa kumanyika kudi bantu bonso. Elabi meji muvua nsombelu eu mua kuikala mumubungamije!

Tshivua tshitonda ntshia ne: bavua babangile Mariya kudi muena mabaya kampanda wa mu Nazaleta amu diende Jozefe. Mariya mmumanye ne: bilondeshile mikenji ivua Nzambi mupeshe Isalele, bobu babangile mukaji kudi mulume, kadi yeye muitabe bua kusangila ne mulume mukuabu, bavua ne bua kumushipa ne mabue. (Dutelonome 22:23, 24) Nunku, nansha muvua Mariya kayi muena tshiendenda, bivua mua kuikala bimutonde bua mushindu wa kumvuija Jozefe bua difu divuaye nadi ne bua tshivua mua kuenzeka.

Mariya uvua mumbuke kukavua ngondo isatu, nunku Jozefe uvua pamuapa ujinga bikole bua kumumona. Padibu bamonangana, Mariya udi pamuapa umuambila tshikavuaye, uditatshisha ne muende muonso bua kumumvuija muvua difu diende dikale dia kudi nyuma muimpe wa Nzambi. Kadi anu bu muudi pebe mua kumona, ebu bualu mbukole bua dikema bua Jozefe kubumvua ne kubuitaba.

Jozefe mmumanye ne: Mariya mmukaji muimpe ne kabidi ne: batu bamukosela katshi. Kabidi mmumunange bikole. Kadi nansha yeye mumuambile tshinyi, Jozefe uvua umona yeye anu ne: difu didiye nadi ndia mulume mukuabu. Jozefe ki mmusue bua bashipe Mariya ne mabue anyi afuishibue bundu kumpala kua bantu to; nanku wakangata dipangadika dia kushipa nende dibaka mu musokoko. Tshikondo atshi, bavua bangata bantu bavua babangilangane bu bakavua baselangane ne bivua  bilomba kushipa dibaka bua kushisha kulekelangana.

Pashishe, patshivua Jozefe ukeba tshia kuenza apu, wakaya kulala. Muanjelu wa Yehowa udi umumuenekela mu tshilota wamba ne: “Kutshinyi bua kuya ne mukajebe Mariya kuebe, bualu tshidi tshimitshibue munda muende ntshia ku nyuma muimpe. Yeye nealele muana wa balume ne udi ne bua kumuinyika ne: Yezu, bualu yeye neapandishe bantu bende ku mpekatu yabu.”​—Matayi 1:20, 21.

Pakajuka Jozefe ku tulu, uvua ne dianyisha dia katshia bua muvua tshilumbu atshi tshitokeshibue bimpe! Kavua mujingakane bua kuenza tshivua muanjelu mumuambile to. Wakateka Mariya kumbelu. Mu bulelela, ebu ke bualu buvua buleje bantu bonso ne: dibaka ndienzeke, bileja ne: Jozefe ne Mariya basedianganyi mpindieu. Nansha nanku, Jozefe kakasangila ne Mariya patshivuaye ne difu dia Yezu to.

Ngondo mimane kupita, Jozefe ne Mariya uvua ne mukundululu wa difu, bavua ne bua kudilongolola bua kuenza luendu kumbuka ku nzubu kuabu mu Nazaleta. Bavua ne bua kuya penyi pavua eku Mariya wamba kulela?