Mu ngondo wa 7/2022, luapolo ivua mileje ne: luya luvua luvule bikole pa buloba bujima mutulu kaluyi luanji kuvula to. Monayi tshivuayi miambe:

•   “Bua musangu muibidi mu ngondo umue eu, bamfumu ba mu Chine badi badimuija bantu ne: mu bimenga bitue ku 70 bia mu ditunga edi, nemuikale luya lukole ludi mua kubakebela njiwu.”​—Mu dia 25/7/2022, CNN Wire Service.

•   “Bu mudi ku Mputu kujima kuikale dibanda dibi dia luya, mêtu a mu matunga a bungi adi enda akuata mudilu bibi menemene.”​—Mu dia 17/7/2022, The Guardian.

•   “Mu Dia lumingu, mu bimenga bia bungi bia mu États-Unis muvua luya lutu katshia kaluyi luanji kuikalamu, pavua eku muvu wa luya lukole wenda utangalaka mu bimenga bidi pabuipi ne Mbuu wa Atlantike ne mu bimue bimenga bia lua ku sud ne bia lua ku nord bidi munkatshi mua ditunga edi.”​—Mu dia 24/7/2022, The New York Times.

 Dibanda dibi dia luya edi didiku dileja ne: buloba kabuakuikala kabidi muaba muimpe wa kusombela anyi? Bible udi wamba tshinyi bua bualu abu?

 Eyowa. Dibanda dibi dia luya edi didi mu malu akavua Bible mulaye bua matuku etu aa. Tshilejilu, Yezu ukavua muambe ne: netumone “malu adi akuatshisha buôwa.” (Luka 21:11) Dibanda dibi dia luya pa buloba bujima ndifikishe bantu ku dikala ne buôwa bua ne: dimue edi bantu nebanyangakaje buloba.

 Nzambi wakafuka buloba bua buikale muaba wa bantu kusombela kashidi. (Misambu 115:16; Muambi 1:4) Nzambi kakulekela bantu babutula buloba to. Kadi mmulaye bua “kunyangakaja badi banyangakaja buloba.”​—Buakabuluibua 11:18.

 Tumonayi mêyi a buprofete abidi tshianana adi aleja tshintu tshikuabu tshidi Nzambi mulaye:

•   “Tshipela ne buloba bume nebisanke bikole, ne mpata wa tshipela neikale ne disanka ne neele bilongo bu bilongo bia safran.” (Yeshaya 35:1) Nzambi kakulekela bantu bavuija buloba tshipela tshitudi katuyi mua kusombela to, kadi neakaje bitupa biabu bionso bidi bantu banyangakaje.

•   “Udi utabalela buloba, ubumeneshisha bintu bipite bungi ne ubuvuija bubanji bikole.” (Misambu 65:9) Nzambi neavuije buloba mparadizu.

 Bua kumona mudi dibanda dia luya dikumbaja mêyi a buprofete a mu Bible, bala tshiena-bualu tshia ne: “Dinyanguka dia mivu ne malu mimpe adi matuindile: Tshidi Bible wamba.”

 Bua kumanya malu makuabu a mudi Bible ulaya ne: Nzambi neakaje bitupa bia buloba bidi bantu banyange, bala tshiena-bualu tshia ne: “Nnganyi wasungila buloba?”