E higa mar 1987, owadwa Lyman Swingle, ma ne en achiel kuom owete ma ne nie Bura Matayo Joneno mag Jehova e piny mangima, nogolo twak ne jowinjo maromo 63,580 ma ne ochokore e pap ma ne ong’ere ahinya gi tuke ma ipiemie gi ruedhi ma ne yudore e taon miluongo ni Valencia, e piny Venezuela. Ji mathoth nodhi gi bas otieno mangima mondo giwinj twak. Ka ne owadwa Swingle golo twage, nowacho niya: “Ok un oganda matin. Un oganda ma kwan gi duong’ moromo. To mos mos, machiegnini ubiro chopo oganda mar joma lando wach maber ma kwan gi chopo 100,000!”

E higa mar 1987, Venezuela ne nigi Joneno mag Jehova ma kwan gi okalo 38,000 ma ne lando wach maber mar Pinyruoth gi kinda. E kindego, pinje aboro kende e ma ne nigi kwan mar jolendo mokalo 100,000.

Kwan mosebedo ka medore mar Joneno mag Jehova e piny mangima en gima iwuoro ahinya. Bang’ Lweny  Mokwongo mar Piny, mana ji alufe moko manok kende e ma ne lando Pinyruodh Jehova e lela. Lokruok ne oduogo otimore bang’e. Yearbook of Jehovah’s Witnesses ma higa 1943 nowacho kama: “Kweno ma notim e higa mar 1942 ma bende ne ok oriw kwan mar jolendo duto nikech weche tudruok ne tek ahinya, nonyiso kaka gweth ng’eny ndi . . ., Kweno ma notimno nyiso ni kwan mamalo mar jolendo mokalo 106,000 ne lando wach maber.” Kata obedo ni Lweny mar  Ariyo mar Piny nomiyo tungni obedo mang’eny, ji mathoth norwako adiera mag Muma. E higa mar 1950, Amerka kende ne nigi jolendo mokalo 100,000.

E higa mar 1974, jolendo e piny Nigeria nochopo 100,000.

E higa ma ne luwo, jolendo e piny Brazil kod Germany nokalo 100,000. Medruok mowachnwa motelogo nyiso kaka adiera mag Muma ne mulo kit ngima ji mopogore opogore.

E piny mangima, kwan mag joma ne rwako adiera mar wach maber ne siko ka medore. Dongruokno luwore ahinya gi weche ma ne okor e Muma niya: “Ng’a matin nobed gana, kendo ng’a ma ok duong’ nobed oganda man gi teko: An Jehova anami wachni timore piyo, ka kare ogik.”​—Isaiah 60:22.

Kaluwore gi ripot mar tij lendo ma higa mar 2014, pinje 24 ne nigi joneno mokalo 100,000 e moro ka moro kuom pinjego. Mano oriwo piny Venezuela ma ne ochopo kwanno e higa mar 2007. E piny mangima, nitie kanyakla 115,416 mag Joneno mag Jehova kod ji 8,201,545 malando wach maber.