Ng’at moro noringo a Eritrea piny ma nonyuolee modhi dak e piny mar Norway e higa mar 2011. Ka Joneno mag Jehova nolime, nowachonegi ni noseromo gi Joneno moko e pinygi. Nowacho ni e kinde ma ne en e tij lweny, noneno Joneno mang’eny ma notue nikech tamruok donjo e lweny kata bed ni seche moko ne isandogi malit.

 Weche ne olokore apoya ma ng’atno bende ne otue e jela. Kanyo noromo gi Joneno moko adek​—Paulos Eyasu, Negede Teklemariam, kod Isaac Mogos​—ma osebedo e jela chakre higa mar 1994.

 E jela kanyo, gima ne okwongo neno kuom Joneno mag Jehova en ni ne gidak ka luwore gi gik ma gipuonjo. Nofwenyo ni owetego ne gin joratiro kendo ne gipogo nyaka chiembgi ne mabuse wetegi. Noneno kaka Jonenogo ne puonjore Muma kanyakla kendo ne gigwelo jomoko mondo oriwre kodgi e puonjruok. Ka ne onyisgi ni ibiro gonygi ka giketo sei e fom ma nyiso ni gikwedo yie margi, ne gitamore.

 Wechegi nomulo chuny ng’atno ahinya ma ka nochopo Norway, to nogombo ng’eyo gimomiyo Joneno mag Jehova nigi yie motegno kamano. Omiyo, ka Joneno moko nolime, ne ochako puonjore kodgi Muma ma ok odigni, kendo nodhi nyaka e chokruoge.

 E Septemba 2018, nobatise kaka achiel kuom Joneno mag Jehova. Sani koro otiyo gi thuolo moro amora moneno mondo olend ne joma a Eritrea kod Sudan, kojiwogi mondo gipuonjre Muma kendo gibed gi yie motegno.