Bura Matayo en grup matin mar Jokristo motegno ma tayo Joneno mag Jehova e piny mangima. Opog tijgi e kidienje ariyo:

•   Gitayo kaka iiko puonj mag Muma mindiko e bugewa, mitiyogo e chokruogewa, kod mitiyogo e skunde mag Joneno mag Jehova.​—Luka 12:42.

•   Gichung’ ne tije Joneno mag Jehova e piny mangima kuom tayo tij lendo kod kaka itiyo gi chiwo ma ji golo.

 Bura Matayo luwo ranyisi ma ne oket gi ‘joote kod jodongo ma ne ni Jerusalem’ e kinde Jokristo mokwongo, ma ne ng’adoga paro e wi weche madongo e lo kanyakla mar Jokristo duto. (Tich Joote 15:2) Mana kaka owetego, jokanyo mag Bura Matayo ok gin jotend riwruogwa. Gigeno Muma mondo otagi ka ging’eyo ni Jehova Nyasaye oketo Yesu Kristo mondo obed Wi kanyakla.​—1 Jo-Korintho 11:3; Jo-Efeso 5:23.

 Joma nie Bura Matayo gin Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, kod Jeffrey Winder. Gitiyo e ofiswa maduong’ man Warwick, New York, e piny Amerka.

 Bura Matayo oketo komiti auchiel mondo ota tije mopogore opogore ma watimo, kendo moro ka moro kuomgi tiyo e komiti achiel kata mokalo kanyo.

•   Komiti mar Jocheno: Komitini tayo weche mag chike, kendo gikonyo e kinde masiche, sama isando Joneno mag Jehova nikech yiegi, kod gik mamoko ma yudoga Joneno mag Jehova ma dwarore ni olos mapiyo.

•   Komiti mar Jotich: Komitini e ma tayo weche duto motudore gi joma tiyo e Bethel.

•   Komiti mar Gocho: Komitini tayo tij goyo buge ma lero Muma kendo kowogi kuonde mopogore opogore e piny mangima. Bende, gitayo tij gero utewa mag chokruok, ofise mag loko dhok, kod ofise mamoko mag riwruogwa.

•   Komiti Mochung’ ne Tij Lendo: Komitini tayo tijwa mar lando “wach maber mar Pinyruoth.”​—Mathayo 24:14.

•   Komiti mar Puonjo: Komitini e ma iko weche mipuonjo e chokruogewa, skundewa, kaachiel gi vidio kod dwol momaki mitiyogo e puonjo.

•   Komiti mar Ndiko: Komitini tayo chenro mar iko chiemb chuny migoyo e bugewa kod miketo e websaitwa, kendo otayo tij loko dhok.

 Mopogore gi tije ma Bura Matayo timoga kokalo kuom komitigo, giromoga juma ka juma mondo ginon dwaro mag riwruogwa. Sama giromo, ginono gima Muma wacho, kae to giweyo mondo roho maler mar Nyasaye e ma otagi, kendo gitemo matek mondo ging’ad paro achiel​—Tich Joote 15:25.

 Magi gin Jokristo mogen ahinya ma konyo e komiti mag Bura Matayo. (1 Jo-Korintho 4:2) Gin gi rieko kod lony mar tayo tije e komiti ma gitiye, kendo gidhiga e romo ma komitigo timoga juma ka juma. Kata obedo ni gin ok ging’ad paro mogik, gichiwoga weche momedore ma nyalo konyo e ng’ado parogo, gineno ni otim gik ma komiti ong’ado, kendo kinde ka kinde ginono kaka tijego dhi nyime. Seche moko, Bura Matayo nyalo miyogi migawo mar limo owete kuonde mopogore opogore e piny mangima kata golo twege e romo mitimoga higa ka higa kata e nyasi mag tieko skul mar Gilead.