SULA MAR 03

Be Inyalo Geno Weche Manie Muma?

TUGE

Muma oting’o singo kod puonj mang’eny. Samoro igombo ng’eyo gik ma Muma puonjo, kata kamano, pod in gi luoro moko. Be inyalo geno singo kod puonj ma yudore e buk ma nondik chon? Be inyalo yie gi gima Muma wacho e wi dak e ngima maber sani kod kinde ma biro? Ji mang’eny oyie gi wachno. Wakwayi mondo in bende inon wachno.

1. Be weche manie Muma gin adier?

Muma owuon wacho ni oting’o “weche madier.” (Eklesiastes 12:10) Owuoyo e wi joma ne nitie adier kod weche ma notimore gadier. (Som Luka 1:3; 3:1, 2.) Jo histori kod joma kunyo gik machon osefwenyo ni tarige, ji, kuonde, kod gik ma Muma wuoye gin adier.

2. Ang’o momiyo wanyalo wacho ni weche manie Muma pod konyo kata obedo ni nondikgi chon?

Kinde mang’eny, Muma wuoyoga kuom gik ma ji ne ok ong’eyo tiendgi e kinde ma ne indike. Kuom ranyisi, owuoyo kuom weche mag sayans. Ng’eny ji ok noyie gi weche ma Muma nowacho e wi sayans e kinde ma nindiko Muma. Kata kamano, nonro mosetim e wi sayans nyiso ni weche ma nondik e Mumago gin adier. Muma en buk ma ‘inyalo gen kinde duto nyaka chieng’.’—Zaburi 111:8.

3. Ang’o momiyo onego wayie gi gik ma Muma wacho e wi kinde ma biro?

Muma oting’o weche mokor ma nyiso “gik ma pok otimore.” (Isaya 46:10) Muma ne okoro gik mang’eny ma noduogo otimore bang’e. Bende, nolero adimba gik ma timore e piny sani. E sulani, wabiro nono moko kuom gik ma Muma nokoro. Kaka wechego nochopo e wang’e kak, morowa ndi!

TIM NONRO

Non ane ka be gik ma josayans ma sani wacho winjore gi gik manie Muma, kae to inon moko kuom weche mokor e Muma.

4. Weche sayans winjore gi gik manie Muma

E ndalo machon, ng’eny ji ne paroga ni nitie gima osiro pinywani kata ni pinywani otenore kuom gimoro. Tug VIDIO.

VIDIO: Piny Ok Ong’aw e Gimoro Amora (1:13)

Ne ane gima nondik e bug Ayub higni 3,500 mokalo. Som Ayub 26:7, kae to uwuo e wi penjo ma luwoni:

Ang’o momiyo gima iwacho e ndikono ni “piny liero ma onge gima osire” en gimiwuoro?

Nofweny yo ma pi lwororego chiegni higni mia ariyo mokalo. Kata kamano, ne ane gima nondik e bug Ayub, chiegni higni 3,500 mokalo. Som Ayub 36:27, 28, kae to uwuo e wi penjo ma luwogi:

En ang’o ma mori kuom yo mayot molergo kaka pi lworore?
Be ndiko ma isomoni miyo imedo geno weche manie Muma?

5. Muma nokoro gik madongo ma ne dhi timore

Som Isaya 44:27–45:2, kae to uwuo e wi penjo ma luwoni:

Gin weche mage ma Muma nokoro higni 200 ka ne pok oketh Babulon?

Tug VIDIO.

VIDIO: Muma Nokoro ni Ne Idhi Keth Babulon (0:58)

Weche mag histori nyiso ni Kuros ma ne en ruodh Persia kod jolweny mage noloyo Babulon mi gikethe e higa mar 539 K.K.P. * Ne gibaro pi aora ma nolworo dalano. Nikech ne giyudo ka rangeye mag dalano oyawore, jolweny ne odonjo ma giloyo dalano ma ok gikedo. Sani higni 2,500 osekalo nyaka ne keth Babulon to pod dalano en gunda. Ne ane kaka Muma nokoro wachno.

Som Isaya 13:19, 20, kae to uwuo e wi penjo ma luwoni:

Ere kaka wach ma nokorno nochopo?

Gunda mar Babulon manie piny Iraq

6. Muma nokoro gik ma timore e kindewagi

Muma nyisowa ni wadak e “ndalo mag giko.” (2 Timotheo 3:1) Ne ane weche ma Muma nokoro e wi ndalo mag giko.

Som Mathayo 24:6, 7, kae to uwuo e wi penjo ma luwoni:

Gin gik mage ma Muma wacho ni ne dhi timore e ndalo mag giko?

Som 2 Timotheo 3:1-5, kae to uwuo e wi penjo ma luwogi:

Muma lero ni ji ne dhi bedo gi kido ma chalo nade e ndalo mag giko?
Gin kido mage ma ndikono wuoye ma iseneno ka ji nigo?

PARO MA JOMOKO NIGO: “Muma en buk mondik mana gi dhano.”

En ang’o ma miyo ibedo gadier ni Muma en buk ma inyalo gen?

PUONJ MADUONG’

Weche histori, sayans, kod weche mokor nyiso ni inyalo geno weche manie Muma.

Ang’o ma ipuonjori?

Be weche manie Muma gin adier?
Gin weche mage ma sayans wacho ma winjore gi gik manie Muma?
Be iparo ni Muma koro gik ma biro timore e kinde ma biro? Ang’o momiyo iwacho kamano?

Tarik ma atieke sulani:

Gima inyalo timo

Mondo imed geno weche manie Muma, som kata ine achiel kuom gik ma yudore kama wacho ni Med Timo Nonro.

Gik mamoko ma inyalo timo:

Your other goal