Jo-Israel nohero wer ahinya, kendo mano en gima ne gigeno ahinya e ngimagi. Muma wuoyo e wi joma nong’eyo tiyo gi gige thum mopogore opogore kendo ma nong’eyo wer maber. Moko kuom buge mag Muma gin wende kaka bug Zaburi, Wer Mamit Moloyo Wende Duto, kod Ywagruok. Buk moro miluongo ni Music in Biblical Life wacho kama: “Jo-Israel noheroga wer ahinya e ngimagi mapile.”

Kaka Jo-Israel ne tiyoga gi wer e ngimagi ma pile. Jo-Israel ne werga ka ginyiso kaka giwinjo e chunygi (Isa. 30:29) Mon ne goyoga oyieke ka giwer gi mor kinde ma ne isedho ne ng’ato osimbo mar ruoth, sama jolweny nolocho, kata e kinde nyasi mag lamo. (Bura 11:34; 1 Sa. 18:6, 7; 1 Ru. 1:39, 40) Jo-Israel ne werga ka gidengo ka ginyiso kaka ne giwinjo e chunygi sama ng’ato otho. (2 We. 35:25) Mana kaka buk moro mogo gi McClintock kod Strong wacho, Jo-Hibrania ne gin joma ohero wer.

Wer e od Ruoth. Ruodhi mag Israel nohero winjo thum ahinya, mano e momiyo Ruoth Saulo noluongo Daudi mondo obi odag e ode mondo ogone thum. (1 Sa. 16:18, 23) Bang’e, ka ne Daudi obedo Ruoth, noloso gige thum. Nondiko wende kendo noloso nyaka wende mag okestra ma niwero e hekalu mar Jehova. (2 We. 7:6; Amos 6:5) Ruoth Solomon ne nigi jower ma mon gi ma chwo.—Ekl. 2:8.

Tiyo gi wer e lamo. Gima duong’ie moloyo en ni Jo-Israel ne tiyo gi wer e lamo Jehova. Ne nitie jower 4,000 ma ne werga e hekalu ma ne ni Jerusalem. (1 We. 23:5) Ne gigoyoga thum ka gitiyo gi nyidwonge, gige thum molos gi tonde, nyatiti, kod turmbeta. (2 We. 5:12) Kata kamano, ok joma nolony e goyo thum kende e ma ne tiyo gi wer e lamo Jehova. Ng’eny Jo-Israel ne werga sama ne gin e wuoth ka gidhi e nyasi ma nitimoga Jerusalem. Wende ma ne giweroga niluongo ni Wend Joma Idho. (Zab. 120-134) Ka luwore gi buge moko mag Jo-Yahudi, Jo-Israel ne weroga wende mag Zaburi a e kinde nyasi mag Pasaka.

Wer pod en gima duong’ ahinya e kind jo Nyasaye. (Jak. 5:13) En achiel kuom yore ma walamogo Jehova. (Efe. 5:19) Kaka Jokristo, wer riwowaga kanyachiel. (Kol. 3:16) Bende, wende jiwowaga sama wakalo e tembe. (Tich 16:25) Wer en yo maber ma wanyisogo yie ma wan-go kuom Jehova kendo ma wanyisogo ni wahere.