Kuom higni mang’eny, onge ng’at ma ne ong’eyo dwoko mar penjono, to mano nomiyo tuoche ma landore onego ji tara gi tara. Bang’e josayans nofwenyo adiera mar wachno ma ging’eyo dwoko mar penjono. Ne gifwenyo ni tuoche ikelo gi kute moko matindo tindo ma ok nyal ne gi wang’ kaka bakteria kod virus. Ngeyo mana adiera achielno kende nokonyo e geng’o kendo thiedho tuoche mang’eny, kendo sani koro ji nyalo dak kuom kinde malach ma ok gituore sa ka sa.

To nade penjo mamoko madongo ma wan-go? Ng’eyo adiera e wi penjo madongo ma luwogi nyalo mulo ngimani e yo mane?

• Nyasaye en ng’a?

• Yesu Kristo en ng’a?

• Pinyruodh Nyasaye en ang’o?

• Ngima biro chalo nade e kinde mabiro?

Ji tara gi tara oseyudo dwoko mag penjogo, kendo mano osemiyo ngimagi obedo maber. In bende yudo dwoko mag penjogo nyalo konyi ahinya.

Samoro inyalo penjori ni, ‘Be en gima nyalore mondo ng’ato oyud adiera e wi gimoro amora?’ Yudo adiera e wi gik mang’eny medo mana bedo matek. Nikech ang’o?

Ji mang’eny ok oyie gi gik ma sirkal, jo ohala, kata jofwambo gi keyo nyisogi. Giyudo ka ok yotnegi pogo adiera gi pach dhano, adiera ma nus-nus, kod miriambo ma ji wacho ka gima gin adier. E piny mopong’ gi miriambo kod joma ok ogenoreni, ji ok nigi paro achiel e wi kaka ginyalo winjo tiend adiera kod kaka adierago nyalo konyogi.

Kata obedo ni yudo adiera tek kamano, pod wanyalo yudo adiera e wi penjo madongo e ngima. E yo mane? Kuom tiyo mana gi yore mijatiyogo e manyo adiera mamoko.

Be ing’eyo ni pile ka pile imanyoga adiera e wi weche moko? Ne ane ranyisi mar Jessica. Owacho kama: “Njugu kelonega nyara tuoche moko e dende, ma kochamo kata mana matin to nyalo kata nege.” Jessica nyaka tem ahinya mondo chiemo moro amora monyiewo kik bed gi njugu e iye kata matin. Omedo wacho kama: “Gima atimoga mokwongo en somo kalatas momwon e chiemo moro amora ma anyiewo mondo ane ka di po ni en gi njugu. Kae to atimo nonro momedore moriwo nyaka goyo simo ne joma oloso chiemono mondo apenjgi ka di po ni sama ne gilose, ne gi po ka njugu moko odonjo e iye. Bende, apenjoga jomamoko mong’eyo kambino maber mondo gikonya bedo gadier ni yo ma kambino losogo chiemo ber.”

Samoro adiera mimanyoga pile ka pile opogore gi ma Jessica manyoga, kata kamano, pod inyalo tiyo gi yore ma luwogi e manyo adiera e wi gik ma chandi:

• Puonjri.

• Tim nonro momedore.

• Many weche kuonde mowinjore.

Tiyo gi yoregi nyalo konyi bende e yudo dwoko mag penjo madongo e ngima. E yo mane?

Ka ne Jessica manyo adiera ma ni e Muma, notiyo gi yore ma chal achala gi ma otiyogago konono chiemo monego onyiew ne nyare. Owacho kama: “Somo matut kod timo nonro gi kinda nokonya yudo adiera ma ni e Muma.” Mana kaka Jessica, ji mang’eny oseyudo dwoko ma Muma chiwo e wi penjo ma luwogi:

• Ang’o momiyo wantie e piny?

• Jomotho ni kanye?

• Ang’o momiyo wachandore kama?

• Ere kaka Nyasaye biro tieko chandruok duto?

• Ang’o ma wanyalo timo mondo joodwa odag gi mor kod kue?

Kisomo Muma kendo itimo nonro momedore e websaitwa mar www.mt1130.com/luo, inyalo yudo dwoko makare mag penjogo kaachiel gi penjo mamoko ma samoro in-go.