• Nyasaye e ma ne dhi yiere. ‘An awuon aseketo ruoth. Abiro miye ogendni duto obed mage, kendo piny ngima obed mwandune.’​—Zaburi 2:6, 8.

• Ne odhi bet e kom-loch mar Daudi. “Osenyuolnwa nyathi, osemiwa wuoyi . . . Lochne biro medore ameda, kuwe mobiro kelo kolocho e kom-loch Daudi kod e pinyruodhe nobed ma onge giko.”​—Isaya 9:6, 7.

• Ne idhi nyuole Bethlehem. “In Bethlehem . . . , kuomi e ma ng’at ma noloch . . . nowuogie, . . . duong’ne biro chopo e tung’ piny duto.”​—Mika 5:2, 4.

• Ji ne dhi chaye kendo nege. “Ne ochaye, kendo ne wakwane ka ng’at ma nono. . . . Ne ochuoye nikech richowa; ne ogoye malit nikech kethowa.”​—Isaya 53:3, 5.

• Ne idhi chiere ma miye duong’. “Ok iniweya e Liel. Ok iniwe ng’at momakore kodi odhi e bur. . . . Lweti ma korachwich e ma mor mosiko nitieree.”​—Zaburi 16:10, 11.

Kuom ji duto mosegadak e pinyni, ng’ato achiel kende e ma wechego duto nochopo kuome; ng’atno en Yesu. Malaika moro nonyiso Maria min-gi niya: “Nyasaye biro miye kom-loch mar Daudi wuon mare, . . . kendo Pinyruodhe ok norum.”​—Luka 1:31-33.

Yesu ne ok obedo ruoth e kinde ma ne en piny ka. Kar mano, obiro locho e wi dhano ka en e polo ka koro en Ruodh Pinyruodh Nyasaye. Ang’o momiyo en e Ruoth mowinjore locho e wi dhano? Ne ane moko kuom gik ma notimo ka ne en e piny.

•   Yesu ne dewo ji. Nokonyo chwo kod mon, joma dongo kod joma tindo, ma ok obuonogi e yo moro amora. (Mathayo 9:36; Mariko 10:16) Ka ne jadhoho moro osaye ni, “Kidwaro, to mi abed maler,” nokeche mi ochange.​—Mariko 1:40-42.

• Yesu nopuonjo ji kaka ginyalo moro Nyasaye. Nowacho niya: “Ok unyal bedo wasumbni mag Nyasaye kendo wasumbni mag Mwandu.” Bende, nojiwo ji mondo otim ne jowetegi gik ma digiher ni otimnegi. E wi mago, nowacho ni Nyasaye odich, ok mana gi gik ma watimo kende, to bende gik ma ni e chunywa kod pachwa. Omiyo, mondo wamor Nyasaye, nyaka wachik gik ma warwako e chunywa kod pachwa. (Mathayo 5:28; 6:24; 7:12) Yesu nojiwo bende ni mondo wabed ma mor gadier, nyaka wapuonjre gik ma Nyasaye dwaro, kendo timo gigo.​—Luka 11:28.

• Yesu nopuonjo ji tiend hera madier. Weche ma Yesu ne wacho kod timbene ne moro chuny jowinjone ahinya. “Oganda nowuoro ahinya yo ma nopuonjogo nikech nopuonjogi kaka ng’at ma nigi teko.” (Mathayo 7:28, 29) Ne opuonjogi niya: “Dhiuru nyime hero jowasiku.” Nolemo nyaka ne joma nomiyo onege, kowacho niya: “Wuora, wenegi nimar ok ging’eyo gima gitimo.”​—Mathayo 5:44; Luka 23:34.

Yesu e Ruoth mowinjore chuth locho e wi piny, nikech ong’won kendo ohero ji. Kata kamano, lochne ne dhi chakore karang’o?