Ka Nyasaye ok e ma kelnwa chandruok, kare ang’o momiyo nitie kech mang’eny, dhier ma ok rum, lwenje ma nego ji modhuro, tuoche ma miyo ji bedo mong’ol, kod masiche ma ok nyal geng’? Muma ma en Wach Nyasaye nyisowa gik ma miyo ji chandore:

1. Ich-lach kod Sigu. “Loch dhano . . . kelo mana hinyruok.” (Eklesiastes 8:9, New World Translation) Kinde mang’eny, ji chandore nikech joma otelonegi gin dhano morem, ma igi lach, kendo ma ger.

2. Gik ma Timore Apoya. Ji chandore nikech “hawi marach mako ng’ato ang’ata.” (Eklesiastes 9:11, The Bible in Luo, 1976) Kokete e yo mayot, masiche ma timore apoya nyalo yudo ng’ato ang’ata kamoro amora, aksident nyalo timore, kata ji nyalo timo goyiem gik ma kelonegi hinyruok.

3. Ng’at Marach ma Locho e Piny Ngima. Muma nyisowa kuma thoth chandruok ma wayudo ae. Owacho kama: “Piny duto ni e bwo teko mar Ng’at Marach.” (1 Johana 5:19) ‘Ng’at Marachno’ en Satan Jachien. Satan nigi teko mathoth, kendo kinde machon ne en malaika mar Nyasaye e polo, to “ne ok ochung’ motegno e adiera.” (Johana 8:44) Malaike moko bende noriwore gi Satan e ng’anyo ne Nyasaye mondo gitim dwachgi giwegi, omiyo, ne gibedo jochiende. (Chakruok 6:1-5) Nyaka ne ng’anyono chakre, Satan gi jochiendene osebedo ka tiyo marach gi teko ma gin-go e chiko gik ma timore e piny, to ahinya-ahinya e kindewagi. Sani Jachien nigi mirima mager kendo ‘owuondo piny mangima,’ to mano osekelo lit mang’eny e piny. (Fweny 12:9, 12) Satan en jaloch mager. Omor ahinya sama oneno ka dhano chandore. En e mokelo ne ji chandruok, to ok Nyasaye.

PAR ANE: Donge mana ng’at marach kendo ma chunye tek ta e ma nyalo kelo ne ji chandruok? Nyasaye to opogore ahinya. Muma wacho kuome kama: “Nyasaye en hera.” (1 Johana 4:8) Nikech hera moherogo dhano, ‘ok onyal timo richo; Ng’a Manyalo Duto ok nyal timo tim mamono ngang’.’—Ayub 34:10.

Kata kamano, penjo ma pod inyalo dong’go en ma: ‘Nyasaye Manyalo Duto biro weyo Satan mondo odhi nyime timo gik maricho nyaka karang’o?’ Mana kaka waseneno, Nyasaye osin gi gik maricho, kendo owinjo malit sama wachandore. E wi mano, Wachne ma en Muma jiwowa ni ‘waket parruokwa duto kuome, nikech odewowa.’ (1 Petro 5:7) Nyasaye oherowa kendo en gi teko mar golo chandruok kod gik maricho duto, mana kaka sula ma luwo lero. *