Nyasaye nomiyo dhano mich moro makende, ma en thuolo mar wuoyo kode e lamo ka wanyise kaka wawinjo e chunywa. Janabi Daudi nolamo kama: “A Nyasaye, ji duto nobi iri nimar in e Jawinj lamo.” (Zaburi 65:2) Ere kaka wanyalo lemo e yo ma Nyasaye biro winjo mi oguedhwa?

Sama ilamo in iwuon, iyudo thuolo mar nyiso Nyasaye weche duto ma ni e chunyi. (Zaburi 62:8) Nyasaye Manyalo Duto mor gi lamo ma kamago.

Kata obedo ni nitie nyinge mang’eny ma wanyalo tiyogo e pako Nyasaye, en gi nying achiel kende. En owuon owacho kama: “An Jehova. Mano e nyinga.” (Isaya 42:8) Nying Jehova yudore nyadi 7,000 kama e Ndiko Maler. Jonabi mang’eny noluongo Nyasaye gi nyingeno. Ibrahim nowacho niya: “A Jehova, akwayi . . . yiena apenji.” (Chakruok 18:30) Wan be onego wati gi nying Nyasaye ma en Jehova sama walemo.

Nyasaye nyalo winjowa sama wawuoyo kode bed ni watiyo gi dhok mane kata mane. Wachne nyisowa kama: “Nyasaye ok buon ng’ato ang’ata, to e oganda moro amora, ng’at moluore kendo ma timo gik makare, oyiego.”​—Tich Joote 10:34, 35.

Mopogore gi lamo, nitie gik mamoko ma dwarore ni watim ka wadwaro ni Nyasaye oguedhwa. E sula ma luwogi, wabiro neno gigo.