Wapuonjore Kuom Nyasaye Kokalo Kuom Jonabine
E ndalo machon, Nyasaye nomiyo jonabine ote makende mondo gimi dhano. Be ote ma Nyasaye nochiwogo nyalo nyisowa yo ma wanyalo yudogo gueth moa kuom Nyasaye? Ee, ginyalo. We wane ane gik ma wanyalo puonjre kuom jonabi moko adek machon.
IBRAHIM
Nyasaye ok dew wang’ ng’ato kendo doher guedho dhano duto.
Nyasaye nosingo ne janabi Ibrahim kama: “Dhoudi duto mag piny noyud gueth kokalo kuomi.”—Chakruok 12:3.
Mano puonjowa ang’o? Ni Nyasaye oherowa ahinya kendo doher guedho dhoudi duto, gibed joma chwo, mon, kata nyithindo, tek mana ni giluwo chikene.
MUSA
Nyasaye ng’won kendo oguedho joma timo kinda mondo ging’eye.
Nyasaye Manyalo Duto nomiyo janabi Musa teko mar timo honni madongo. To e ma pod Musa nokwaye niya: “Akwayi ni ipuonja yoreni mondo ang’eyi, eka amed bedo ng’at miyiego.” (Wuok 33:13) Nyasaye noyie gi kwayono mi oguedho Musa gi rieko momedore kod nyalo mar ng’eyo yorene gi kite. Kuom ranyisi, Musa nopuonjore ni Jachuech en “Nyasaye mang’won kendo ma kecho ji.”—Wuok 34:6, 7.
Mano puonjowa ang’o? Ni Nyasaye diher guedhowa waduto, bed ni wan joma chwo, mon, kata nyithindo, tek mana ni watimo kinda mondo wang’eye. E Ndiko Maler, onyisowa kaka doher ni walame kendo ni oikore rwakowa kaka joge kendo guedhowa.
YESU
Nikech Yesu ne kecho ji, nochango joma ne nigi tuoche mopogore opogore
Wanyalo yudo gueth mochwere ma Nyasaye osingonwa ka wanono kit ngima Yesu kod gik ma notimo kendo puonjo.
Ndiko Maler oting’o weche mang’eny e wi ngima Yesu kod gik ma nopuonjo. Nyasaye nomiyo Yesu teko mar timo honni madongo kaka chango muofni, momni, kod joma ong’ol. Bende, nochiero jomotho. Kuom timo honnigo, Yesu nonyiso kaka Nyasaye biro guedho dhano e kinde ma biro. Nolero kaka ng’ato ka ng’ato kuomwa nyalo yudo guethgo. Nowacho kama: “Ka ng’ato ong’eyi, in Nyasaye makende mar adier kod jal ma ne ioro Yesu Kristo, to en gi ngima ma nyaka chieng’.”—Johana 17:3.
Yesu ne kecho ji, nong’won, kendo nohero ji. Chwo, mon, joma tindo, kaachiel gi joma dongo noyie rwako puonjne ka nonyisogi niya: “Puonjreuru kuoma, nimar adembora kendo chunya muol, to ununwang’ yueyo.” (Mathayo 11:29) Kata obedo ni ji nochayo mon ahinya e kindeno, Yesu to ne ng’won gi mon, kendo nomiyogi luor kod duong’.
Mano puonjowa ang’o? Ni Yesu nohero ji gadier, kendo noketonwa ranyisi maber kuom gik monego watim ne jowetewa.
YESU OK EN NYASAYE
Ndiko Maler puonjo ni nitie “Nyasaye achiel kende” kendo ni Yesu Kristo ne en jaote mar Nyasaye. (1 Jo-Korintho 8:6) Yesu nowacho achiel kachiel ni Nyasaye duong’ moloye kendo ni Nyasaye e ma noore e piny.—Johana 11:41, 42; 14:28. *
^ par. 17 Mondo ipuonjri weche momedore e wi Yesu Kristo, ne brosua mar miluongo ni Imani ya Kweli—Siri ya Kuwa na Maisha Yenye Furaha, kare mar 8 kod 9. Oyudore e www.mt1130.com/sw.
Samoro Inyalo Hero Magi Bende
DWOKO PENJO MA JI NIGO E WI MUMA
Be Yesu En Nyasaye Manyalo Duto?
Ang’o ma Yesu nowacho e wi migawo ma en-go kopime gi Nyasaye?
