Onge ng’ato ang’ata ma nogoyo Yesu picha. Bende onge ng’ato ang’ata ma nogore kata payo pichane ka ne en e piny. To e ma pod nitie pichni mathoth mag Yesu ma ji osebedo ka goro.

Joma goroga pichnigo ok ong’eyo ni Yesu ne chalo nade kuom adier. Jogoro mathoth goro picha Yesu ka luwore gi kit ogendini ma giwuokie, puonj mag dindegi, kod kaka weg pichnigo dwaro ni mondo ogornegi Yesu. Gimiwuoro en ni pichnigo nyalo miyo ji kik ong’e Yesu e yo maber kod gik ma nopuonjo bende.

Jomoko goro Yesu ka en ng’at modhero, modenyo, ma yie wiye boyo, yie tike chieko, to osiko okuyo akuya. Jomoko to gore ka en malaika man gi teko mang’eny ka ler olworo wiye, kata ginyiso ni en ng’at ma ok ohero ji. Be pichego nyiso kaka Yesu ne chalo adier? Wanyalo ng’eyo nade kaka Yesu ne chalo? Nono weche manie Muma e ma nyalo konyowa ng’eyo kaka Yesu ne chalo gadier. Wechego nyalo konyowa mondo wang’eye e yo maber.

Nyalo bedo ni Yesu nowacho wechego kolemo ka ne ibatise. (Jo-Hibrania 10:5; Mathayo 3:13-17) Ringruogno ne chalo nade? Higni moko 30 ka ne pok onyuol Yesu, malaika Gabriel nonyiso Maria niya: “Inimak ich, kendo ninyuol wuowi, . . . Wuod Nyasaye.” (Luka 1:31, 35) Omiyo, Yesu ne onge richo moro amora, mana kaka Adam ne chalo ka ne Nyasaye ochueye. (Luka 3:38; 1 Jo-Korintho 15:45) Nyaka bed ni Yesu ne en ng’at ma dende otegno maber, kendo nyalo bedo ni nochal gi Maria min mare.

Yesu ne nigi yie tike mana kaka chwo mamoko ma Jo-Yahudi, to mano nopogore gi Jo-Rumi ma ne ok pidh tikgi. Yie tik machalo kamano ne miyo ng’ato yudo luor, to bende ne ok gin yie tiek maboyo ma ok orit maber. Yesu bende ne ritoga tike, to wiye bende nobuso maber. Mana Jo-Yahudi manok ma nochiwore mondo obed Jo-Nazir kaka Samson e ma ne ok liel yie wigi.​—Kwan 6:5; Jobura 13:5.

Yesu nobedo fundi bao kuom higni moko kotiyo gi gige tich ma ne itiyogo e kinde machon. (Mariko 6:3) Kuom mano, nyaka bed ni ne en gi del motegno. Ka ne ochako tije mar yalo, en owuon “noriembo jogo duto ma ne nigi rombe kod dhok kogologi oko mar hekalu, kendo nopuko pesa ma mingli mag jowil pesago, mi noloko mesnigi ataro.” (Johana 2:14-17) Mondo notim kamano, nyaka nobed ng’at ma nigi teko. Yesu notiyo gi ringruok ma ne en-gono mondo otim tich ma Nyasaye nomiye. Nowacho niya: “Nyaka aland wach maber mar Pinyruodh Nyasaye e taonde mamoko bende nikech mano e momiyo ne oora.” (Luka 4:43) Ne dwarore ni ng’ato obed gi teko e ka owuoth e Palestina duto koyalo Wach Nyasaye.

Yo mamuol ma Yesu ne wuoyogo kod mor ma nonyiso nyaka bed ni nomiyo joma ‘nojony kendo ma ting’ ne turo’ owinjo maber. (Mathayo 11:28-30) Nikech ne ojahera kendo nong’won, mano nomiyo joma noyie winje obedo gadier ne gidhi yudo yueyo. Kata mana nyithindo bende ne dwaro bedo  gi Yesu. Muma wacho niya: “Nokawo nyithindogo moting’o e bade.”—Mariko 10:13-16, Luo New Testament, 2003.

Kata obedo ni Yesu nosandore malit ka ne pok otho, ne ok en ng’at ma osiko okuyo seche te. Kuom ranyisi, nitie kinde ma ne odhi e nyasi mar arus e taon mar Kana ma oloko pi obedo divai. (Johana 2:1-11) Nitie kinde moko ma ne obudho gi ji kopuonjogi weche ma wigi ne ok nyal wilgo.​—Mathayo 9:9-13; Johana 12:1-8.

Maloyo duto, weche ma Yesu ne puonjo nomiyo joma ne winje geno mar yudo ngima ma nyaka chieng’. (Johana 11:25, 26; 17:3) Chieng’ moro ka ne jopuonjrene 70 odwokone wach bang’ ae tij yalo, nobedo ‘mamor’ mowacho niya: “Moruru nikech nyingeu osendik e polo.”​—Luka 10:20, 21.

Jotend dinde ma kinde Yesu noloso chike kod yore ma ne gichunogo ji mondo omigi duong’ kendo ma ne miyogi thuolo mar dhi nyime bedo gi telo. (Kwan 15:38-40; Mathayo 23:5-7) Yesu to nokwero jootene ni kik gibed “joloch” e wi jomoko. (Luka 22:25, 26) Nowacho niya: “Tang’uru gi jondiko ma dwaro wuotho koni gi koni ka girwako kandho kendo ma dwaro ni ji omosgi ka dhialogi e chirni.”​—Mariko 12:38.

Yesu nopogore ahinya gi jotend dindego, nikech nokikore gi ji maber ma kata seche moko fwenye ne tek ka en e kind ji. (Johana 7:10, 11) Fwenye ne tek kata sama ne en gi jootene 11 ma nomakore kode. Mano e momiyo ka ne Judas dhi ndhoge, nowacho ne joma ne ni kode ni nodhi nyodhe mondo mano obed ranyisi ma konyogi fwenyo Yesu.​—Mariko 14:44, 45.

Kuom mano, kata obedo ni nitie weche mathoth mong’ere e wi Yesu, ji mang’eny ok gore kaluwore gi kaka nochal gadier. Gima duong’ moloyo kata kaka nochal en kaka wanene gie sani.

Yesu notho moike mana e odiechieng’ ma nowachoe wechego. (Johana 14:19) Nochiwo ngimane mondo “obed rawar ne ji mang’eny.” (Mathayo 20:28) E odiechieng’ mar adek, Nyasaye ne ochiero Yesu “e del mar polo” kendo ‘nomiyo ofwenyore’ ne jopuonjrene moko. (1 Petro 3:18; Tich Joote 10:40) Yesu ne chalo nade ka ne ofwenyore ne jopuonjrene e kindeno? Nenore maler ni nopogore gi kaka nochalo ka ne pok otho, nimar kata mana jopuonjrene koro ne ok nyal fwenye mapiyo. Maria Magdalina ne paro ni Yesu en jarit puodho, to jopuonjre moko ariyo ma ne dhi Emau ne paro ni en wendo moro.​—Luka 24:13-18; Johana 20:1, 14, 15.

Onego wane Yesu ka en ng’at machal nade sani? Bang’ higni moko mokalo 60 ka Yesu nosetho, jaote Johana noneno Yesu e fweny moro. Johana ne ok oneno ng’at matho e yath. Kar mano noneno “Ruoth manie wi ruodhi kendo Jaloch manie wi joloch,” ma en Ruoth mar Pinyruodh Nyasaye ma chiegni ketho jochiende kod dhano mong’anyo ne Nyasaye. Bang’ mano, obiro miyo jogo duto ma winjo Nyasaye ngima ma nyaka chieng’.​—Fweny 19:16; 21:3, 4.