Ne Gichiwore Maonge Achune e Piny Brazil

HIGINI moko matin mosekalo, Rúbia (1), nyaminwa masani jahigini 30, ne odhi limo Sandra (2), ma en painia ma lendo e kanyakla moro matin yo milambo e piny Brazil. Kane Rúbia ni kuno noneno gimoro ma nomulo chunye ahinya, mi oloko chenro ma noyudo oseketo kuom kaka ne odwaro tiyo gi ngimane. Ang’o ma nomulo chunye? We en owuon ema mondo owachnwa.

“WACHNO NOMAKO DHOGA”

“Ne wadhi gi Sandra limo miyo moro ma ne opuonjorego Muma. Chieng’ moro ka puonjruok dhi nyime, miyono nowacho ka ng’ama tugo niya: ‘Sandra, nitie nyiri moko adek kama watiye, madwaro puonjore Muma, to nanyisogi ni biro chunogi girit mondi. Ang’eyo ni in gi ji mang’eny michano puonjorigo Muma higani ma dak imed moko.’ Wachno nomako dhoga. Ni joma ne dwaro ng’eyo Jehova rito mondo  ng’at manyalo puonjogi Muma oyud thuolo! To e kanyakla ma korwa, yudo kata ng’ato achiel madwaro puonjore Muma tek. Gi kanyono kapod wan e od japuonjreno, nabedo gi gombo matut mar konyo joma nodak e taon matinno. Bang’e, nadar awuok e taon maduong’ kama ne adakie, kae to adhi dak kama Sandra ne lendoe kaka painia.”

Bang’e, weche ne odhi nade ne Rúbia? Owacho kama: “Bang’ dweche ariyo kende, noyudo apuonjora Muma gi ji 15 kendo bang’ kinde matin, mana kaka Sandra an bende ne an gi ji mathoth ma ne rita mondo ayud thuolo mar puonjogi Muma! ”

NE OCHUNO NI ONON KENDO TIJE MAR LENDO

Diego (3), owadwa ma jahigini 20 kama, nolimo jopainia moko ma ne lendo e taon moro matin miluongo ni Prudentópolis, yo milambo mar piny Brazil. Limbeno nomulo chunye ahinya; ka kuom adier, nochune mondo onon kendo tije mar lendo. Olero niya: “E kanyaklawa, ok nakawo tij lendo gi pek madwarore nimar ne ajalendo mana kuom seche matin kende dwe ka dwe. Kata kamano kane alimo jopainiago, kendo awinjo weche mabeyo mane giwacho, naneno kaka gin gi chuny mamor e tij lendo mopogore gi chuny mang’ich ng’ich ma ne an-go. Kane aneno mor ma ne gin-go, an bende nagombo ni abedie gi ngima machal gi margi.” Bang’ limbeno, Diego nokawo tij painia.

Mana kaka Diego, be in Janeno ma rawera malendo kendo dhi e chokruoge mag Jokristo maok ibari, to kata kamano iwinjo ka gima tiji mar lendo ok miyi mor? Ka en kamano, be inyalo timo lokruok e ngimani mondo in bende iyud mor kuom lendo e alwora ma jolendo mag Pinyruoth dwarore ahinya? En adier ni weyo kit ngima ma ng’ato nong’iyogo chon mondo odhi odag e gweng’ machielo, en gima tek ne jomoko. Kata kamano, pod rowere mathoth oseyiero timo kamano. Giseloko chenro maggi mondo omi gitine Jehova e okang’ momedore. Ranyisi machielo en mar Bruno.

ABED JATHUM KOSO JALENDO?

Higini moko mosekalo, Bruno (4), masani jahigini 28, nosomo e skul moro mong’ere ahinya e puonjo  weche mag thum, kendo gombo mare maduong’ ne en mondo obed jal matayo jothum mag okestra. Ka kuom adier, notimo dongruok maber e sombe ma nochopo kama kinde ka kinde ne igwele mondo ota joma goyo thumbe mag okestra. Nochomo kama ne odhi yudoe tich maduong’ ahinya. To ema pod Bruno nowacho niya, “Nitie gima pod nawinjo ka aremo e ngimana. Noyudo asechiwora tiyo ne Jehova, to kata kamano nang’eyo ni pod ok atine gi chunya duto kaka dwarore to mano ne chando chunya ahinya. Nawuoyo gi Jehova kuom kaka nawinjo e chunya, kae to kendo awuoyo gi owete molony e kanyakla. Bang’ paro weche e yo matut, nang’ado mar keto tija mar lendo obed maduong’ e ngimana moloyo thum, kendo naweyo skundno, kae to achako lendo e alwora ma jolendo mag Pinyruoth ne dwaroree.” Notimo mano nade?

Bruno nodar odhi e taon mar Guapiara (ma nigi ji madirom 7,000), chiegni mail 160 (kilomita 260) kiwuok e dala mar São Paulo. Mano ne en lokruok maduong’ miwuoro. Owacho niya: “Nayiero dak e ot matin, maonge frij, televison, kata Intanet. Kata kamano, odno ne ber nikech ne nitie gik ma nayudo machon ne aongego​​—⁠puodho matin mopidhie alot koda olembe! ” E kanyakla matin ma ne odhiyeno, dichiel e juma, Bruno ne jating’o ofuko moro matin moting’o chiemo, pi kod buge kae to oidho pikipiki kodhi lendo e gwenge man maboyo. Ji mang’eny e gweng’no ne pok olandnegi wach maber nyaka nene. Owacho niya, “Ne ajapuonjora Muma gi ji 18. Neno kaka jopuonjregi ne timo lokruok e ngimagi, ne miya mor mogundho! ” Omedo wacho niya: “Kanyo e kama nafwenyoe ni ayudo gima naremo e ngimana​​—⁠mor mabedoe kuom keto dwaro mar Pinyruoth obed motelo. Dine ok ayudo morno ka dine adhi nyime luwo gige ringruok.” To ere kaka Bruno ne timo mondo okonyre e weche mag pesa ka en Guapiara? Owacho kama kobwonjo: “Ne ajapuonjo ji goyo gita.” Pod ne en jathum e yo mariek.

“NOCHUNO NI NYAKA ADONG’”

Mariana (5), masani hike hawo 30, bende ngimane ne ket gi mar Bruno. Notiyo kaka okil, to kata obedo ni ne otiyo tich ma ji mang’eny nyalo gombo,  ok nowinj ka en gi mor e chunye. Owacho niya: “Nawinjo e chunya ka gima alawo ‘gima nono, ka yamo makadho.’” (Ekl. 1:​17, The Bible in Luo, 1976) Owete koda nyimine mang’eny nojiwe mondo opar ane konyalo bedo painia. Bang’ paro wachno matut, Mariana, kaachiel gi osiepene ma gin Bianca (6), Caroline (7), kod Juliana (8), noyiero mar dhi konyo kanyakla moro miluongo ni Barra do Bugres, manie taon moro matin machiegni gi piny Bolivia, mail alufe kowuok dalagi. Ang’o ma ne otimore bang’e?

Mariana wacho niya: “An awuon nachano mar bet kuno kuom dweche adek kende. Kata kamano bang’ dwechego, noyudo apuonjora Muma gi ji 15! Jopuonjrego ne nyaka kony ahinya mondo gitim dongruok e adiera. Nikech mano, choko chir mondo anyisgi ni koro ne adok thurwa notama. Nochuno ni nyaka adong’.” To mano e gima nyiminewa ang’wen-go notimo. Be tich manyien ma Mariana noyierono, nokelone mor? Owacho kama: “Bedo ni Jehova tiyo koda mondo akony ji olok ngimagi obed maber, en gima kelo mor e chunya. En gweth maduong’ ahinya sani ng’eyo ni atiyo gi thuolona koda tekona duto e timo gima konyo gadier.” Caroline nyiso kaka giduto nyiri ang’wen giwinjo e chunygi, kowacho niya: “Sama anindo gotieno, awinjo ka amor ahinya nikech asetiyo matek e chopo dwaro mag Pinyruoth. Sani gimaduong’ matimo gi ngimana en konyo jopuonjrena mag Muma. En gima ber ahinya neno kaka gitimo dongruok. Aneno adiera mar wechegi: ‘Rang kendo ne kaka Jehova ber.’”​​—⁠Zab. 34:8.

Mano kaka Jehova mor koneno kwan masiko medore mar owete gi nyiminewa “machiwore gi hera” kuonde duto, mondo giland wach maber e tung’ piny mangima! (Zab. 110:3; Nge. 27:11) Jogo duto machiwore gi chunygi e yo ma kamano yudo gweth mag Jehova e yo mogundho.​​—⁠Nge. 10:22.

[Sanduk/Picha e ite mar 5]

“Onge Gima Wasechando e Ngimawa”

Kane João Paulo gi jaode Noemi, owacho kaka ne gigombo tiyo ne Nyasaye kuonde ma jolendo dwarore ahinya, ne giwinjo weche moko manyoso chunygi. Jomoko e kanyakla ne wacho niya: “Ang’o momiyo udar, udhi chandoru kuma udhiyeno nikech onge yuto malong’o e taon matinno. Pod nitie tije mang’eny monego otim e kanyaklawa kae.” João Paulo wacho niya: “Parogo ne nenore ka gima konyo, kata kamano ne ok wayie mondo ginyos chunywa.” To bang’ lendo kuom higini mang’eny e gwenge ma jolendo ne dwarore ahinya, João Paulo kod Noemi mor ahinya kuom bedo ni ne gimakore gi paro ma ne giseng’adono. João Paulo lero kama: “Kuom kinde ma wasebedogo kae kaachiel gi jaoda, onge gima wasechando e ngimawa. Kendo kodok korka gik mochuno ahinya e ngima, wan gi gik mathoth moloyo kaka ne wan-go chon.” Noemi to medo niya: “Paro ma nwang’adono ne en paro makare ndi.”

Dak e taonde matindo ok en gima yot. Jogo modar mondo odhi olendi e gwenge man maboyo konyore nade korka wach yuto? Kuom timo tije moko manyalo kelonegi yuto. Jomoko puonjo dho-Ingeresa kata dhok machielo, moko to puonjo nyithindo bang’ skul, to moko tiyo tije mag tweng’o, kata wiro ute rangi, kata gimoro machielo manyalo konyogi. To en paro mane ma jogo duto madhi lendo kuonde ma jolendo dwarore ahinya oyiego? Gweth ma giyudo ng’eny moloyo pek ma giromogo!

[Sanduk/Picha e ite mar 6]

Pek Mag Bedo Mabor gi Dala

Tiago wacho kama: “Mapiyo bang’ chopo e kanyakla manyien, chunya nochako nyosore. Ne nitie jolendo matin kende e taondno, to ne onge kuonde yudo mor. Nachako paro dala. Nang’eyo ni onego akaw okang’ moro mondo kik kuyo ma ne an-go loya. Kuom mano, nachako timo kinda mondo achak ng’era gi owete gi nyimine mei kanyakla, to mano e gima nokonyo maber! Naloso osiepe manyien, kendo nawinjo ka amor ahinya mana ka gima an dalawa.”

[Picha e ite mar 3]

Noemi gi João Paulo, Ascurra, Santa Catarina