MOA E GIWA MACHON
“Jehova Nokelou France Mondo Upuonjru Adiera”
KANE Antoine Skalecki pod en wuowi matin, nosiko owuotho gi faras. Ne gijodonjo e yore moko ma ne okuny mita 500 e bwo lowo ka gigolo kite ma rotenge ma chalo gi maka (coal) kendo yorego ne onge ler moromo. Wuon Antoine nohinyore kane lowo ogore kuome kotiyo e buchego, to mano nochuno ni Antoine e ma koro odhi oti e buchego kuom seche ochiko pile eka giyud kaka ginyalo konyore. Chieng’ moro Antoine bende ne chiegni tho kane lowo osienyore kuome.
Gige tich ma Jo-Poland ne tiyogo, kod kama ne gikunyoe kite man Dechy, machiegni gi taon mar Sin-le-Noble, kama Antoine Skalecki ne tiyoe
Antoine ne en achiel kuom nyithindo mathoth ma Jo-Poland nonyuolo e piny France e higni mag 1920 kod 1930. Ang’o momiyo Jo-Poland mang’eny nodar odhi France? Kane Jo-Poland oyudo loch bang’ Lweny Mokwongo mar Piny, ne gibedo mathoth ahinya ma gihingo pinygi. To komachielo, chwo mokalo milion achiel notho e lweny e piny France, omiyo Jo-France ne dwaro ahinya joma ne nyalo konyogi kunyo kitego. Omiyo, sirkand France nowinjore gi mar Poland ma gigoyo sei e dwe mar Septemba e higa mar 1919 mondo Jo-Poland ma nyalo odar odhi France. E higa mar 1931 kwan Jo-Poland e piny France nochopo 507,800, to Jo-Poland mang’eny nodak yo nyandwat kuonde ma ne ikunyoe kitego.
Jo-Poland ma nodar ka dhi France ok noweyo kitgi gi timbegi kod yoregi mag lamo. Antoine ma sani koro jahigni 90 wacho niya: “Joseph kwarwa monyuolo minwa ne jawuoyo e wi Ndiko Maler gi luor ahinya mana kaka wuon mare nopuonje.” Jumapil ka Jumapil, Jo-Poland ne rwakoga lepgi mabeyo beyo ka gidhi kanisa mana kaka ne gitimoga thurgi. Mano en gima Jo-France mang’eny ma nokawo ni tich en gima duong’ nochayo malich.
Thoth Jo-Poland nokwongo romo gi Jopuonjre mag Muma e taon mar Nord-Pas-de-Calais. Jopuonjrego nosebedo ka lendo gi kinda e taondno chakre higa mar 1904. E higa mar 1915, nochak goyo The Watch Tower e dho Poland dwe ka dwe to The Golden Age (sani iluonge ni Amkeni!) nochak goyo e dhokno e higa mar 1925. Thoth ji norwako puonj mag Ndiko ma gasedego noting’o kaachiel gi puonj ma ne yudore e bug The Harp of God e dho Poland.
Joodgi Antoine nokwongo winjo humb Jopuonjre mag Muma kokalo kuom nergi, ma nohango dhi e chokruoggi e higa 1924. Higano e ma Jopuonjre mag Muma notimoe chokruok maduong’ kendo mokwongo e dho Poland e taon mar Bruay-en-Artois. Kapok dwe achiel orumo, Joseph F. Rutherford ma ofis maduong’ mar Joneno nooro nobedo gi chokruok ma noting’o ji 2,000 e taon achielno. Nikech thoth joma nobiro e chokruogno ne gin Jo-Poland, Owadwa Rutherford nonyisogi kama: “Jehova nokelou France mondo upuonjru adiera. Omiyo, koro un kod nyithindu nyaka ukony Jo-France! Tij lendo pod dwarore e okang’ malach, to Jehova biro kelo jolendo mondo oti tijno.”
To adier Jehova Nyasaye nokelo jolendo! Jokristo ma Jo-Polandgo ne lendo gi chunygi duto mana kaka ne gikunyo kite gi kinda! Moko kuomgi nodok thurgi Poland mondo giland adiera mabeyo ma ne gisepuonjore. Teofil Piaskowski, Szczepan Kosiak, kod Jan Zabuda ne gin moko kuom joma nowuok France ka dok Poland mondo gidhi giland wach maber kuno.
Thoth owete gi nyimine ma Jo-Poland nodong’ France kendo ne gidhi nyime lendo gi kinda ka gin gi owete gi nyimine ma wuok France. E chokruok moro ma ne otim e higa mar 1926 e taon mar Sin-le-Noble, ji 1,000 nowinjo program gi dho Poland, to ji 300 nowinjo gi dho France. Yearbook ma 1929 nowacho kama: “E higano, Jo-Poland 332 nonyiso ni gichiwore ne Nyasaye ka nobatisgi.” Kane Lweny mar Ariyo mar Piny pok ochakore, kanyakla 32 e kind 84 ne tiyo gi dho Poland e piny France.
Owete gi nyimine ma Jo-Poland man France dhi e chokruok moro maduong’. Weche manie kor basno wacho ni “Joneno mag Jehova”
E higa mar 1947, thoth Joneno mag Jehova noyie dok Poland kane sirkandgi okwayogi ni gidog thurgi. Kata mana bang’ dok, tich matek ma ne gitimo gi Jokristo wetegi ma France nokelo nyak miwuoro nikech kwan mar joland Pinyruoth nomedore gi pasent 10 e higano. Medruokno nodhi nyime mochopo pasent 20, 23, kod 40 kochakore e higa mar 1948 nyaka 1950! Mondo otieg jolendo manyien-gi, ofis Joneno ma France, nokwongo oyiero jorit-alwora e higa mar 1948. Kuom jorit-alwora abich ma noyier, ang’wen ne gin Jo-Poland kendo Antoine Skalecki ne en achiel kuomgi.
Thoth Joneno mag Jehova man France, pod nigi nyinge Jo-Poland ma nokwongo odhi France kendo ma ne tiyo matek e tij kunyo kite kod tij lendo. E kindegi bende, ji mathoth modar ka dhi France puonjore adiera kuno. Bed ni jolendogo biro dok e pinjegi kata gibiro dak France chuth, giluwo ranyisi mar owete gi nyimine ma wuok Poland ma notelonegi kuom lando wach Pinyruoth gi kinda.—Moa e giwa machon e piny France.
Samoro Inyalo Hero Magi Bende
OHINGA MAR JARITO—GOCHO MAR PUONJRUOK
Kaka ne Ohang Pidh Kodhi mag Pinyruoth e Piny Portugal
Gin pek mage ma joma nohango lando wach maber e pinyno noromogo?
OHINGA MAR JARITO—GOCHO MAR PUONJRUOK
Twege mag Ji Duto Nokonyo e Lando Wach Maber e Piny Ireland
Ang’o momiyo C. T. Russell nobedo gadier ni piny Ireland ne en “puodho mochiek moromo keyo”?
OHINGA MAR JARITO—GOCHO MAR PUONJRUOK
“Wabiro Bedo gi Chokruok Machielo Karang’o?”
Ang’o momiyo chokruok moro matin ma notim Mexico City e higa mar 1932 obedo makende?
OHINGA MAR JARITO—GOCHO MAR PUONJRUOK
‘Kinda kod Hera Moloyo ma ne Wasebedogo’
Bang’ chokruok maduong’ ma ne otim e higa mar 1922, ere kaka Jopuonjre mag Muma nochako ‘lando Ruoth kod Pinyruoth’?
OHINGA MAR JARITO—GOCHO MAR PUONJRUOK
“Onge Yo Moro Amora ma Tek Luwo Kata Mabor”
Ka ne higni mag 1920 dhi ka rumo to higni mag 1930 chakore, jopainia ma jokinda ahinya nolando wach maber mar Pinyruoth e gwenge mosokore e piny Australia.
OHINGA MAR JARITO—GOCHO MAR PUONJRUOK
“Jolendo mag Pinyruoth e Piny Britain—Meduru Kinda Maru!!”
Ne onge medruok moro amora e kwan mar jolendo e piny Britain kuom higni apar! Ang’o ma nomiyo lokruok obedoe?
