Ogweli gi Mor

NYALO bedo ni isekadho machiegni gi Od Romo (Kingdom Hall) mar Joneno mag Jehova manie alworau, ma iwuoro ni ang’o ma dhiga nyime e iye kanyo. Be ing’eyo ni ji duto ni thuolo mar dhi e chokruoge ma gitimo juma ka juma? Igwelo welo duto e chokruogego gi mor.

Kata kamano, podi inyalo bedo gi penjo moko. Ang’o momiyo Joneno mag Jehova chokore kanyachiel? Gin ang’o matimore e chokruogego? To welo mogwel maok gin Joneno mag Jehova wacho ang’o kuom chokruogego?

“Chok Ji”

Chakre kinde machon, ji osebedo ka chokore kanyachiel mondo gilam kendo gipuonjre wach Nyasaye. Chiegni higini 3,500 mosekalo, ne owach ne oganda mar Jo-Israel kama: “Chok ji, chwo gi mon gi jo matindo, gi jamwa ma ni e dalani, mondo giwinji, kendo mondo gipuonjre, mondo giluor Jehova Nyasachu, kendo mondo girit ka gitimo weche duto mag chikni.” (Rapar mar Chik 31:12) Kuom mano, e Israel ne ipuonjo nyithindo koda joma dongo lamo kendo winjo Jehova Nyasaye.

Higini mang’eny bang’e, kane ochak kanyakla mar Jokristo, chokruoge pod ne dhi nyime bedo achiel kuom gik madongo e lamo mar adier. Jaote Paulo nondiko kama: “Kendo ng’ato ka ng’ato opar owadgi mondo wami hera gi timbe mabeyo omedre. Kik waweuru chokruokwa kaachiel, kaka jo moko timo, to wajiwreuru ng’ato gi ng’ato, moloyo to ka koro uneno ni Chieng’no sudo machiegni.” (Jo Hibrania 10:​24, 25) Mana kaka winjruok maber e kind joot bedo motegno seche ma joot kawo kinde mar bedo kanyachiel kaka joot, e kaka winjruok maber manyiso hera e kind jogo madwaro tiyo ne Nyasaye bedo motegno seche ma gichokore kanyachiel mondo gilam Nyasaye.

Kaluwore gi gik ma Ndiko wacho ni ne timore chon-go, Joneno mag Jehova romo kanyachiel e Ute Romo maggi diriyo e juma. Chokruogego konyo joma obiro mondo opuonjre kendo ng’eyo ber mar chike koda puonj manie Muma mondo omi giti kodgi. E piny mangima, kuonde manyalore, chenro mar chokruok oket machal, kendo chokruok ka chokruok nigi gima duong’ momiyo itime. Kapok chokruogego ochakore kata bang’e, jogo mobiro yudo thuolo mar ‘jiwruok’ kokalo kuom mbaka magerogi. (Jo Rumi 1:​12) Gin ang’o matimore e moro ka moro kuom chokruogegi?

Twak mar Muma

Chokruok mokwongo ma thoth ji hinyo dhiye en twak mar Muma migolo ne ji duto, to ithoro time giko juma. Kinde mang’eny, Yesu Kristo ne golo twege e lela—achiel kuom twegego mong’ere ahinya ne en Twak mar Got. (Mathayo 5:1; 7:​28, 29) Jaote Paulo ne ogolo twak ne Jo-Athene. (Tich Joote 17:​22-​34) Ka giluwo ranyisi kaka mar Yesu kod Paulo, chokruoge mag Joneno mag Jehova bedo gi twak molos ne ji duto, ma moko kuom jogo nyalo bedo ni eka okwongo biro e chokruok.

Chokruogni ichako gi wer mogol e bug Mwimbieni Yehova Sifa. * Jogo duto ma diher chung’ kendo wer igwelo mondo otim kamano. Bang’ lamo machuok, jagol-twak mowinjore golo twak mar dakika 30. (Ne sanduk mawacho ni “Twege Migolo Makonyo Ji Duto.”) Twak ma jalo golo otenore chuth kuom Muma. Jagol-twak gwelo jowinjo nyading’eny mondo oel Ndiko kendo giluw kanyachiel sama osomo. Kuom mano, inyalo biro gi Mumbi iwuon, kata inyalo kwayo achiel kuom Joneno mag Jehova kapok chokruok ochakore.

 Puonjruok Ohinga mar Jarito

E kanyakla mang’eny mag Joneno mag Jehova, chokruok maluwo twak mar ji duto en Puonjruok Ohinga mar Jarito, ma en chokruok mitimo e yor penjo gi dwoko e wi puonj manie Muma, kendo itime kuom sa achiel. Chokruogni jiwo jogo mobiro mondo oluw ranyisi mar Jo-Beria ma nodak e kinde Paulo, nimar “ne girwako Wach ka chunygi oikore chutho, ka ginono weche manie Ndiko pile, mondo gine ka wechego dibed kamano.”—Tich Joote 17:⁠11.

Puonjruok Ohinga mar Jarito ichako gi wer. Thuon wach mipuonjruok koda penjo ma jal matayo puonjruokno tiyogo, yudore e gasedni. Inyalo yudo gasedni kuom achiel kuom Joneno mag Jehova. Moko kuom thuond weche ma nyocha otwagie gin kaka: “Jonyuol—Tieguru Nyithindu e Yor Hera,” “Kik Uchul Ng’ato Richo Kar Richo,” kod “Gimomiyo Chandruok Duto Chiegni Rumo.” Kata obedo ni chokruogno itimo e yor penjo gi dwoko, jowinjo chiwo dwoko kata paro maonge achune, to kinde mang’eny joma chiwo paro gin jogo mosesomo kendo paro matut kuom sulano koda ndiko moketi kapok gibiro e chokruok. Chokruogno itieko gi wer koda lamo.—Mathayo 26:30; Jo Efeso 5:​19.

Puonjruok Muma e Kanyakla

E odhiambo moro achiel juma ka juma, Joneno mag Jehova chako romo kendo e Od Romo margi, mondo gitim program mopog nyadidek, ma gitimo kuom sa 1 gi dakika 45. Mokwongo, gichako kod Puonjruok Muma e Kanyakla, makawo dakika 25. Chokruogni konyo jogo mobiro mondo omed ng’eyo Muma, kendo gimed loko kitgi koda pachgi, mondo omi gimed timo dongruok kaka jopuonjre Kristo. (2 Timotheo 3:​16, 17) Mana kaka Puonjruok Ohinga mar Jarito, chokruogni bende itimo e yor penjo gi dwoko e wi puonj manie  Muma. Jogo machiwo dwoko timo kamano maonge achune. Pile gikonyore gi buk moro kata brosua mogo gi Joneno mag Jehova, e puonjruok Muma.

Ang’o momiyo gitiyo gi buge malero weche manie Muma e chokruogni? Chon e ndalo ma ne indiko Muma, somo asoma Wach Nyasaye kende ok ne oromo. “Ne ginyiso tiende, mit ji nowinjo gi ma ne gisomonigi.” (Nehemia 8:⁠8) E higini mosekalo machiegni, buge malero weche manie Isaiah, Daniel, koda Fweny ma gin buge mag Muma, osekonyo jogo mobiro e chokruogni ng’eyo weche manie bugego.

Skul mar Tij Nyasaye

Puonjruok Muma e Kanyakla, iluwo gi chokruok mar Skul mar Tij Nyasaye. Chokruogni makawo dakika 30, olosi mondo okony Jokristo obed “molony e puonjo.” (2 Timotheo 4:⁠2, NW) Kuom ranyisi, be nyathini kata osiepni moro osega penji penjo moro kuom Nyasaye kata Muma, mi iyudo ka tekni chiwo dwoko maber? Skul mar Tij Nyasaye nyalo puonji ng’eyo kaka inyalo chiwo dwoko machiwo jip kuom penjo matek, kitiyo gi Muma. Omiyo, wan bende wanyalo wacho kaka janabi Isaya, ma nowacho ayanga kama: “Jehova Nyasaye osemiya dho jo mopuonjore, mondo ang’e hoyo gi weche ng’at mojony.”—Isaiah 50:⁠4.

Skul mar Tij Nyasaye ichako gi twak mawuoyo kuom kamoro ei Muma, kendo mano yudo kane osejiw jogo mobiro mondo osom kanyo e juma motelo ne chieng’no. Bang’ twagni, jal matimo migawoni gwelo jowinjo mondo ochiw paro machuok ma ne giyudo ni nyalo konyo kaluwore gi kama chenro mar chokruogno nyiso ni ne onego osom. Bang’ migawoni, jopuonjre moseyiero tiegre e skundno golo twege ma ne omigi.

Imiyo jopuonjre migawo mar somo kamoro ei Muma ka gin e ndiri, kata golo twak mitimo kaka ranyisi manyiso kaka ginyalo puonjo ng’ato wach moro manie Ndiko. Bang’ twak ka twak, jal molony e tiego jopuonjre jiwo japuonjre kuom gino ma ne otimoe maber, kotiyo gi buk miluongo ni Faidika na Elimu ya Shule ya Huduma ya Kitheokrasi. Bang’e ka gin kar kendgi, jalo nyalo chiwo ne japuonjre paro  kuom kaka japuonjre nyalo medo timo dongruok.

Chokruogni ma en chokruok ma migepene dhi piyo piyo, olosi ok ni mondo okony mana japuonjre kende, to bende okonyo jogo duto mobiro magombo mondo gimed lony e somo, e wuoyo, kendo e puonjo. Bang’ ka osetiek chokruok mar Skul mar Tij Nyasaye, wer motenore kuom weche manie Muma iwero kapok ochak Chokruok mar Tijwa.

Chokruok mar Tijwa

Chokruok mogik e program mar odhiamboni, en Chokruok mar Tijwa. Kokalo kuom twege, migepe mitimo kaka ranyisi, penjo mipenjo jomoko, kaachiel gi migepe ma jowinjo duto nyalo chiwoe paro, jogo mobiro yudo tiegruok kuom puonjo adiera mar Muma e yo molony. Kapok ne ooro jopuonjrene e tij lendo, Yesu ne ochokogi kamoro achiel mi onyisogi weche duto monego giluw. (Luka 10:​1-​16) Koro kane giseikore chuth ne tij lendo, ne gibedo gi kinde maber kendo ne gimor kuom gik ma ne otimore negi. Bang’e, jolup Yesu noduogo ire mondo ginyise kaka weche ne odhi. (Luka 10:17) Kinde mang’eny, jopuonjre ne hulo ne jowetegi kaka tij lendo ne obedo.—Tich Joote 4:​23; 15:⁠4.

Chenro mar Chokruok mar Tijwa mitimo kuom dakika 35, iketo e kalatas moro mioro dwe ka dwe, miluongo ni Tijwa mar Pinyruoth. Weche ma nyocha otwagie e kinde mokalo machiegni gin kaka: “Lamo Jehova Kanyachiel Kaka Joot,” “Gimomiyo Wadok Monwore,” koda “Luw Ranyisi mar Kristo e Tij Lendo.” Chokruogni itieko gi wer, kae to jakanyo mar kanyakla imiyo migawo mar tieko gi lamo mogik.

Gik ma Welo Mobiro Osewacho

Kanyakla ka kanyakla temo mondo gine ni ng’ato ka ng’ato mobiro owinj ni orwake maber. Kuom ranyisi, Andrew noyudo osewinjo weche mang’eny maricho miwacho e wi Joneno mag Jehova. Kata kamano, kane obiro e chokruok mare mokwongo, nowuoro kuom kaka ne orwake. Andrew wacho kama: “Bedo kanyo ne ber ahinya. Ne awuoro kaka ji ne nyiso hera koda kaka ne ginyiso ni gidewa.” Ashel, ma en nyako moro ma rawera e piny Canada, bende oyie ni en kamano. Owacho ni: “Chokruogno ne ber ndi! Ne yot ahinya luwo gima dhi nyime.”

José, modak Brazil, ne ong’ere e gweng’gi kaka ng’at ma ohero miero. Kata obedo ni ne en kamano, ne ogwele mondo odhi e chokruok moro e Od Romo man machiegni kode. Owacho kama: “Joma ne nie Od Romo ne orwaka gi mor, kata obedo ni ne ging’eyo timbena machon.” Atsushi, modak Japan, paro kawacho kama: “En adier kane adhi e chokruokna mokwongo gi Joneno mag Jehova, ne awinjo ka aluor matin. Kata kamano, ne aduogo afwenyo ni jogi gin agina ji kaka jomoko. Ne gitemo ahinya mondo gimi kik abed maluor.”

Ogweli

Mana kaka paro ma jomoko ochiwo malo kanyogo nyiso, dhi e chokruoge e Od Romo en gima nyalo konyo ahinya. Ibiro puonjori e wi Nyasaye, kendo kokalo kuom puonj manie Muma miyudo kuno, Jehova Nyasyae biro puonji “mondo iyud konyruok.”—Isaiah 48:​17.

Chokruoge mag Joneno mag Jehova ok chul ni eka mondo ng’ato odhiye, kendo ok tim solro kuno. Be diher dhi e chokruok e Od Romo manie alworau? Ogweli gi mor mondo itim kamano.

[Weche moler piny]

[Sanduk manie ite mar 30]

Twege Migolo Makonyo Ji Duto

Twege mag Muma iyiero kogol kuom wiye madongo 170 mopogore opogore, moriwo nyaka maluwogi:

▪ Be Ng’eyo Kaka Dhano Nobedoe En Gima Dwarore Ahinya?

▪ Neno Kend kod Wach Nindo e Kind Dhako gi Dichwo Kaka Nyasaye Neno

▪ Ketho Piny Kelo Kum mar Nyasaye

▪ Kaka Wanyalo Loyo Parruok Machando Chunywa e Ngima

▪ Be Mani Kende e Ngima ma Nitie?

[Picha manie ite 30]

Twak mar Muma

[Picha manie ite mar 30]

Puonjruok “Ohinga mar Jarito”

[Picha manie ite mar 31]

Puonjruok Muma e Kanyakla

[Picha manie ite mar 31]

Skul mar Tij Nyasaye

[Picha manie ite mar 32]

Chokruok mar Tijwa