Gik Mwapuonjore Kuom Yesu

E Wi Ngima mar Joot

En bedo gi paro mane kuom kend mamiyo joot bedo gi mor?

Kend en riwruok maler e wang’ Nyasaye. Kane openje kabe ketho kend chuth ne en gima nyalore, Yesu nowacho kama: “‘Pok usomo ni nyaka a chakruok Jachuech nochueyogi dichwo gi dhako?’ Kendo nowacho niya, ‘“Nikech wachno ng’ato nowe wuon mare gi min mare, kendo nopadre gi chiege, mi ji ariyogo nobed ringruok achiel.” E momiyo ok pod gin ji ariyo, to gin ringruok achiel. Omiyo gi ma Nyasaye oseriwo, kik dhano opogi.’ . . . ‘Ng’ato ma oriembo chiege, mak mana kuom terruok, mi okendo machielo, oterore.’” (Mathayo 19:4-6, 9) Ka joma okendore luwo puonj ma Yesu nochiwo kendo bedo joadier ng’ato gi nyawadgi, joot duto winjo maber kendo gibedo mamor.

Ang’o momiyo hero Nyasaye miyo joot bedo gi mor?

Yesu nowacho kama: “Her Ruoth Nyasachi gi iyi duto, kendo gi chunyi duto, kendo gi riekoni duto. Ma e chik maduong’ kendo mokwongo.” Chik mar ariyo maduong’ en mane? Yesu nowacho niya: “Her wadu [moriwo koda jogo machiegni kodi ahinya—joodi] kaka iherori iwuon.” (Mathayo 22:37-39) Omiyo, gino mabiro miyo joot odag e ngima mamor en bedo gi winjruok maber gi Nyasaye, nimar hero Nyasaye miyo waherore ng’ato gi ng’ato.

 Ere kaka chwo koda mondegi nyalo miyo ng’ato ka ng’ato kuomgi obed gi mor?

Chwo miyo mondegi bedo mamor sama giluwo ranyisi mar Yesu. Yesu nohero kanyakla, ma en kaka chiege e yor ranyisi, kochiwore chuth ne kanyakla. (Jo Efeso 5:25) Yesu nowacho kama: “Wuod dhano ne ok obiro mondo otine, to mondo oti ni ji.” (Mathayo 20:28) Yesu ok ne rit jogo manie bwoye kotimo gik moko gi agoko kata gi gero, kar mano ne oduogo chunygi komiyogi yueyo. (Mathayo 11:28) Kuom mano, chwo onego oti gi teko momigi e yo mang’won mamiyo joot duto yudo ber.

Mon bende nyalo puonjore kuom ranyisi mar Yesu. Muma wacho niya: “Wi Kristo en Nyasaye.” Owacho bende ni “wi dhako en dichwo.” (1 Jo Korintho 11:3) Yesu ok ne oneno ni bedo e bwo telo mar Nyasaye en gima duoke piny. Ne en gi luor matut ahinya ne Wuon mare. Yesu nowacho kama: “An atimo malong’one ndalo duto.” (Johana 8:29) Dhako mabolore e bwo chwore nikech hera koda luor moluorogo Nyasaye, konyo ahinya e miyo ngima mar joode obed gi mor.

Ang’o ma jonyuol nyalo puonjore kuom paro ma Yesu ne nigo kuom nyithindo?

Yesu ne kawo thuolo mar bedo gi nyithindo kendo nodewo weche koda paro ma ne gin-go e chunygi. Muma wacho niya: ‘Yesu noluongo nyithindo mayom ire, mowacho niya, “Yieuru ni nyithindo matindo obi ira.”’ (Luka 18:15, 16) Chieng’ moro, ji ne kwero yawuowi moko matindo ma ne wuoyo kuom yie ma ne gin-go kuom Yesu. Kata kamano, Yesu nopwoyo rowerego, mowacho ne joma ne kwerogi niya: “Pok usomo ni, ‘E dho nyithindo mayom gi madhoth isemiyogo pak obedo malong’o’?”—Mathayo 21:15, 16.

Ang’o ma nyithindo nyalo puonjore kuom Yesu?

Yesu nochiwo ranyisi maber ne nyithindo kuom dewo ahinya weche chuny to ok mag ringruok. Kane en jahigini 12, ne oyude ‘e hekalu, kobedo piny e dier jopuonj, kowinjogi kendo openjogi.’ Ang’o ma ne otimore nikech mano? “Ji duto ma nowinje nohum kuom riekone gi dwokone.” (Luka 2:42, 46, 47) Kata kamano, rieko koda ng’eyo ma Yesu ne nigo ne ok omiyo obedo gi sunga kata ng’awruok. Kar mano, ng’eyo ma ne en-go nomiyo ochiwo luor ne jonyuolne. Muma wacho niya: “Kendo ne owinjogi.”—Luka 2:51.

Mondo iyud weche momedore, ne sula 14 e buk miluongo ni Ang’o ma Muma Puonjo Kuom Adier? *

[Weche moler piny]