Sud Machiegni gi Nyasaye

 Jehova Miyowa Thuolo mar Yiero

Rapar mar Chik 30:11-20

NYAMINWA moro ma Jakristo ma nokalo e chandruoge mapek kane otin, ne paro ni gigo ma nokaloe, ne dhi mone bedo ng’at makare e wang’ Nyasaye. Ne owacho kama: “Asegabedo gi luoro maok owinjore ni anyalo ketho winjruokna gi Jehova.” Be en kamano adier? Be en adier ni gik maricho manyalo bedo ni wasekaloe nyalo monowa bedo jomakare? Ooyo. Jehova Nyasaye osemiyowa thuolo mar timo yiero, omiyo, wanyalo yiero kaka wabiro tiyo gi ngimawa. Odwaro mondo watim yierono e yo makare, kendo Wachne ma en Muma, nyisowa kaka wanyalo timo kamano. Par ane weche mag Musa, mayudore e Rapar mar Chik sula 30.

Be en gima tek ng’eyo kendo timo gima Nyasaye dwaro? * Kotiyo gi Musa, Jehova nowacho kama: “Nikech chikni eni machikoi tinende, ok tek ahinya matamoi, bende ok obor kodi.” (Kwan matindo 11) Jehova ok nyiswa ni watim gik maok wanyal timo. Dwaro mage owinjore kendo gin mwanyalo timo. Bende wanyalo ng’eyogi. Ok ochuno ni nyaka wadhi “e polo” kata “loka nam” eka mondo wapuonjre gima Nyasaye dwaro. (Kwan matindo 12, 13) Muma wachonwa maler kaka onego wadag e ngima.—Mika 6:8.

Kata kamano, Jehova ok chunwa mondo watim dwache. Owacho kama kotiyo gi Musa: “Ne, tinendeni aseketo nyimi ngima kod gi maber, kendo tho kod gi marach.” (Kwan matindo 15) Wan gi thuolo mar yiero e kind ngima kod tho, e kind gimaber kod gimarach. Wanyalo yiero lamo kendo winjo Nyasaye ka wageno yudo gweth, kata wanyalo yiero ketho chikene mi wane rach. Wan wawegi ema wayiero e kind weche ariyogo.—Kwan matindo 16-18; Jo Galatia 6:7, 8.

Be Jehova dewo yo ma wayiero luwo? Ee, odewo! Kowuoyo kokalo kuom much Nyasaye, Musa nowacho kama: “Iyier ngima.” (Kwan matindo 19) Kata kamano, wanyalo yiero ngima nade? Musa nolero kama: ‘Her Jehova Nyasachi, winj dwonde, kendo padori kuome.’ (Kwan matindo 20) Ka wahero Jehova, wabiro luwo chikene, kendo makore kode chuth, kata ang’o matimore. Kuom timo kamano, wanyiso ni wayiero ngima—ma en kit ngima maberie moloyo gie sani, kendo wageno bedo gi ngima ma nyaka chieng’ e piny manyien mabiro mar Nyasaye.—2 Petro 3:11-13; 1 Johana 5:3.

Weche ma Musa nowacho gin adiera majiwowa. Kata bed ni ne ikalo e chandruoge machalo nade e piny marachni, podi inyalo timo yiero makare e wang’ Nyasaye. Jehova osegwedhowa gi mich mar timo yiero. Ee, inyalo yiero hero Jehova, luwo chikene, kendo makore kode chuth. Ka itimo yiero ma kamano, Jehova biro gwedho kinda mari.

Ng’eyo adiera ni wan gi thuolo mar yiero hero kendo tiyo ne Jehova—ne ohoyo chuny nyaminwa ma ondik wechene e chak sulani. Owacho kama: “Ahero Jehova. Seche moko, wiya jawil ni gima duong’ moloyo en ni ahero Jehova. Omiyo anyalo chung’ motegno.” Kokalo kuom kony ma Jehova chiwo, in bende inyalo chung’ motegno.

[Weche moler piny]