Sud Machiegni gi Nyasaye
Sud Machiegni gi Nyasaye
“Ong’iyo Chuny”
NENRUOK ma oko nyalo wuondo wang’. Kaka ng’ato nenore gi oko ok nyal nyiso gima nie chunye. Dhano ng’ado ne wadgi bura kaluwore gi kaka onene gi oko. En gima morowa ng’eyo ni Jehova Nyasaye to ok ng’i mana nenruok ma oko kende. Mano nenore maler e weche mondiki e 1 Samuel 16:1-12.
Tem ane paro gima ne timore kaluwore gi weche maluwogi. Jehova chiegni yiero ruoth manyien mondo olochi e wi oganda Jo-Israel. Nyasaye nyiso janabi Samuel ni: “Naori kuom Jesse ja Bethlehem: nikech aseyierona ruoth e kind yawuote.” (Matindo 1) Jehova ok chiw nying ng’atno, kata kamano owacho mana ni ng’atno en achiel kuom yawuot Jesse. Kane Samuel ni e yo dhi Bethlehem, nyalo bedo ni ne openjore ni, ‘Adhi ng’eyo nade wuod Jesse ma Jehova oyiero?’
Ka Samuel nochopo Bethlehem, nochano mondo Jesse kod yawuote obi ka mitimoe misango. Kane Eliab wuowi makayo obiro, nenruokne ma oko nomako wang’ Samuel. Samuel paro ni bor mar Eliab miyo owinjore bedo ruoth, kendo Samuel wacho kama: “Adieri ng’a mowir mar Jehova ni e nyime.”—Matindo 6.
Kata kamano, Jehova neno gik moko e yo mopogore. Onyiso Samuel ni: “Kik ing’i wang’e kata bor mar ringre; nikech asedage.” (Matindo 7) Bor kata ber mar Eliab ok en gima duong’ e wang’ Jehova. Jehova neno gik moko duto mani kuom ng’ato nyaka kama ber madier yudoree.
Jehova lero ne Samuel kama: “Nikech Jehova ok one kaka dhano neno; dhano ong’iyo kit nenruok ma oko, to Jehova ong’iyo chuny.” (Matindo 7) Ee, gima duong’ ma Jehova ng’iyo en chuny, tiende ni dhano ma iye, kaka ng’ato paro, neno gik moko kod kaka owinjo e chunye. Jal “manono chuny” nodagi Eliab kaachiel gi yawuot Jesse auchiel mamoko ma nobiro e nyim Samuel.—Ngeche 17:3, New World Translation of the Holy Scriptures.
Odong’ wuod Jesse achiel, Daudi, en e chogo, ‘okwayo rombe.’ (Matindo 11) Iluongo Daudi mondo obi e nyim Samuel. Kae to Jehova nyiso Samuel: “Amalo, iolne mo: nikech jali e en.” (Matindo 12) Kuom adier, Daudi ne en rawera “ma silwal, ma jachia, kendo ne en jaber mar neno.” Kata kamano, chunye ema nomiyo Nyasaye oyie kode kuom adier.—1 Samuel 13:14.
E pinyni ma nenruok ma oko ema ikawo kaka gima duong’, wanyalo yudo hoch kuom ng’eyo ni Jehova Nyasaye ok nyal wuondi gi kit nenruok ma oko. Borni ok e gima duong’ e wang’ Jehova, kata kaka jomoko neno ni ijachia. Gima duong’ e wang’ Jehova en kaka chunyi chalo. Be ng’eyo wachni jiwi e nyago kido mabiro miyo ibed ng’at maber e wang’ Nyasaye?