Goyo Mbaka gi Wuon Ot—Be en Adier ni Jomabeyo Duto Dhi e Polo?

JONENO MAG JEHOVA ohero goyo mbaka gi weg udi e wi Muma. Be dibed ni in gi penjo moro sie e wi Muma mosechando chunyi gaming’a? Be igombo ng’eyo weche moko e wi puonj kata tije mag Joneno mag Jehova? Ka en kamano, kik iluor penjo Janeno moro amora wachno ka uromo. Obiro mor ahinya wuoyo kodi kuom wechego.

Maluwoni en ranyisi achiel mar mbaka ma achiel kuom Joneno mag Jehova nyalo bedogo gi wuon ot. We waluong Janenono ni Marcus to wuon ot waluong ni Robert.

Jogo Madhi e Polo Dhi Timo Ang’o Kuno?

Marcus: Iparo nade kuom kinde mabiro, be weche biro dhi maber, biro kethore moloyo, koso biro mana dong’ kaka gin?

Robert: Aparo ni gik moko biro bedo maber. Awacho kamano nikech ageno dhi e polo mondo abed gi Ruoth.

Marcus: Mano geno majaber. Muma wuoyo ahinya e wi kaka polo chal koda kaka dak kuno en gimaber ahinya. Be isegaparo matut e wi gima jogo madhi e polo dhi timo kuno?

Robert: Wadhi bedo gi Nyasaye kendo wadhi pake nyaka chieng’.

Marcus: Kuom adier, mano en geno makelo mor. Gimaber en ni Muma ok wuo mana e wi gweth ma jogo mabiro dhi e polo dhi yudo, to owuoyo bende e wi tich ma gidhi timo.

Robert: En tich mane?

Marcus: En tich ma iwuoyo kuome kae e bug Fweny 5:​10. Ndikono wacho niya: “Nitimogi bedo jopinyruoth mar jodolo ma tiyo ni Nyasachwa, kendo ginibed gi loch e piny.” Robert, be ineno tich ma jogo madhi e polo dhi timo?

Robert: Ndikono wacho ni gidhi locho kaka ruodhi e wi piny.

Marcus: Donge mano en gimaber?

Gidhi Locho e Wi Ng’a Gini?

Marcus: Ka en adier ni jogo madhi e polo dhi locho kaka ruodhi, donge nyaka bedie jogo ma gidhi locho e wigi? Ka ok kamano, onge tiende bedo gi loch ka onge joma ilocho e wigi.

Robert: Awinji.

Marcus: Omiyo wanyalo penjore niya, gin ng’a gini ma gibiro locho e wigi?

Robert: Aparo ni wabiro locho e wi joma pod nie piny mapok otho modhi e polo.

 Marcus: Nyalo nenore kamano kapo ni en adier ni ji duto mabeyo dhi e polo. Kata kamano, iparo nade, be nyalore ni jomoko​—⁠ma bende gin jomabeyo​​—⁠ok bi dhi e polo?

Robert: Pok awinjo Jokristo mapuonjo gima kamano.

Marcus: Apenji penjono nikech gima Zaburi 37:29 wacho. Be diher somo ndikono?

Robert: Ee. Owacho ni: “Jo matir ginicham piny, mi ginidagie nyaka chieng’.”

Marcus: Erokamano. Be ineno kama jomabeyo mang’eny biro dakie?

Robert: Ndikono wacho ni gibiro dak e piny.

Marcus: Iyude​​—⁠to kendo ok gibi dak mana kuom kinde machuok. Ne ni ndikono wacho ni: ‘Ginidagie nyaka chieng’.’

Robert: Nyalo bedo ni gima ndikono wacho en ni kinde duto jomabeyo biro yudore e piny. Sama watho kendo wadhi e polo, jomabeyo monyuol kawo karwa.

Marcus: Ji mang’eny nyalo winjo ndikoni kamano. Kata kamano, ndikoni nyiso gima opogore. Donge owacho ni jomabeyo biro dak e piny nyaka chieng’?

Robert: Ok awinji maber.

Paradis e Piny Kinde Mabiro

Marcus: Ne ane gima ndiko machielo e Muma wacho e wi kaka ngima biro bedo e piny kinde mabiro. Wasom ane Fweny 21:4. Kowuoyo kuom joma biro dak e piny kinde mabiro, ndikono wacho niya: “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.” Donge mano en geno majaber ndi?

Robert: Ee. Kata kamano, donge ndikono nyiso kaka ngima biro bedo e polo?

Marcus: En adier ni jogo madhi e polo biro yudo gweth machalo kamago. Kata kamano, ng’i ane ndikono kendo. Owacho ni ibiro tim tho nade?

Robert: Owacho ni “tho ok nobedie kendo.”

Marcus: Mano adier. Mondo owach ni tho ok nobedie, donge mano nyiso ni tho ne nitie?

Robert: Mano adier.

Marcus: Pok ne wawinjo ni ng’ato otho e polo, koso in isewinjo? Pinyka ema ji thoe.

Robert: Hmm. Wachno nyienna.

Marcus: Robert, Muma puonjo ni nitie jomabeyo moko mabiro dhi e polo to jomabeyo mang’eny bende biro dak e pinyka. An gadier ni isewinjo weche mong’eregi: “Mano mor manadi ni jo mamuol; nikech gininwang’ piny ka girkeni margi.”​​—⁠Mathayo 5:5.

Robert: Ee, asewinjo ka isomo ndikono e kanisa ding’eny.

Marcus: Ka joma kare nonwang’ piny ka girkeni margi, donge mano nyiso ni ji biro dak e piny? Jogo ma nodag e piny biro yudo gweth mokor kae e bug Fweny. Nikech Nyasaye biro tieko gik maricho duto moriwo nyaka tho, gibiro dak e piny molokore chuth.

Robert: Atemo winjo gima iwacho, kata kamano, ndiko achiel kata ariyo ok oromo siro wachno.

Marcus: Iwacho kare. Kuom adier, nitie ndiko mogwaro manyiso kaka ngima biro bedo e piny e kinde mabiro. Anyalo nyisi ndiko moro ma ahero ahinya kapo ni in gi thuolo?

Robert: Ee, inyalo somonago.

‘Nogol Oko Joma Timgi Orochore’

Marcus: A wasesomo kwan matindo 29 mar Zaburi 37. Wadog ane e zaburino. Sani to wabiro somo kwan matindo 10 gi 11. Be diher somo ndikogo?

 Robert: Ee. “Nimar nogol oko jo ma timgi orochore: To jogo ma kiyo Jehova ginicham piny. Nimar podi kinde matin, kendo ng’a marach obiro onge: Ee, iniket chunyi kuom paro kar bet mare, kendo obiro onge. To jo mamuol ginicham piny; kendo ginimor moloyo kuom kwe mang’eny.”

Marcus: Erokamano. Kaluwore gi kwan matindo 11, “jo mamuol,” kata jomabeyo biro dak kanye?

Robert: Ndikono wacho ni “ginicham piny.” Kata kamano, an to aneno ni ndikono wuoyo kuom kindewagi, donge jomabeyo odak e pinyka gie sani?

Marcus: Mano en adier. Kata kamano, ne ni ndikono bende nyiso ni jomabeyo biro bedo gi “kwe mang’eny.” Donge en adier ni sani waonge kuwe e piny?

Robert: Ee, kuwe onge.

Marcus: Omiyo, ibiro chop singono nade? Anyalo tiyo gi ranyisini: Wawach ni in e wuon ot moro maduong’ ma ji opango. Moko kuom joma opango uteni gin jomabeyo​​—⁠girito uteni kendo gitimo maber ne jirendegi. Imor miyogi ot mondo gidagie. Kata kamano, jomamoko mopango odi gin jomaricho; giketho odino kendo gitimo marach ne jirendegi. Koro, kapo ni jomarichogo otamore timo lokruok, ibiro kawo okang’ mane?

Robert: Abiro riembogi e oda.

Marcus: Mano e gima Nyasaye biro timo ne jomaricho molworowa gie kindegi. Ng’i ane kendo kwan matindo 10. Owacho niya: “Ng’a marach obiro onge.” E yo machielo, Nyasaye biro “riembo” jogo machando jowetegi. Mano biro miyo jomabeyo odag gi kuwe e piny. Ang’eyo ni wach mar ni jomabeyo biro dak e piny nyaka chieng’ odwa pogore kod gima isebedo king’eyo.

Robert: Mano en adier, pok ne awinjo puonj ma kamano e kanisawa.

Marcus: To mana kaka ne iwacho motelo, somo mana ndiko achiel kata ariyo e wi wachno ok oromo. Kuom adier, dwarore ni wanon gima Muma mangima wacho e wi kaka ngima biro bedo ne jomabeyo e kinde mabiro. Kata kamano, kaluwore gi ndiko ma wasesomo kawuono, be iparo ni en adier ni jomabeyo moko biro dhi e polo to jomabeyo mang’eny mamoko biro dak e pinyka nyaka chieng’?

Robert: Ok an gadier. Kata kamano, nenore ni mano ema ndikogo wacho. Nyaka apar wachno matut.

Marcus: Kaka ibiro dhi nyime nono wachno, inyalo bedo gi penjo mamoko. Kuom ranyisi, biro bedo nade ne jomabeyo ma ne odak motelonwa? Be giduto ne gidhi e polo? Ka ok kamano, gin kanye gie sani?

Robert: Daher ng’eyo dwoko mag penjogo.

Marcus: Anyalo konyi e yore ariyo. Mokwongo, we andikni ndiko manok mawuoyo e wi wachno. * Mar ariyo, daher duogo kendo mondo wawuo e wi ndikogo bang’ kisesomogi kendo iseparo kuomgi. Ineno nade?

Robert: Mano ber. Erokamano.

[Weche moler piny]