Mana kaka ing’eyo, miriambo en wacho gima ing’eyo ni ok en adier. Be isegawachoe miriambo?— * Kata mana jomadongo mohero Nyasaye osewacho miriambo. Nyalo bedo ni ing’eyo ng’at moro e Muma ma ne owacho miriambo. Ne en Petro, achiel kuom joote 12 mag Yesu. We wawinj ane siganano mondo wang’e gimomiyo ne owacho miriambo.

Bang’ ka osemak Yesu, ne otere e dala jadolo maduong’. Ne en chuny otieno. Petro donjo e dala jadolono maok ng’ato ofwenyo ni en ng’a. Nikech mach ma ne liel ne menyo Petro, jatich manyako mar jadolo maduong’ ne ofwenyo Petro. Owachone niya: “In bende ne in kod Yesu.” Nikech luoro, Petro tamore.

Muma wacho ni bang’e “nyako machielo nonene” mofwenye. Nowacho niya: “Jali bende ne ni kod Yesu.” Kendo Petro tamore. Bang’ kinde matin, jomamoko bende dhi ir Petro kendo ginyise kama: “Adier in bende in achiel kuomgi.”

Petro koro luor ahinya. Omiyo, mar adek, oriambo niya: “Akiya ng’atno!” Kae to thuon gweno kok. Yesu ng’iyo Petro, to Petro paro kaka Yesu nonyise mana seche manok motelo ni: “Ka pok thwon gweno okok, nikweda didek.” Petro winjo malit kendo ochako ywak. Owinjo marach nikech owacho miriambo!

Be gima kamano nyalo timoreni?— Nyalo bedo ni in e skul kendo nyithindo weteni chako wuoyo e wi Joneno mag Jehova. Moro wacho ni: “Ok gigo salut ne bendera.” Machielo medo ni: “Ok gidhi e lweny sama imonjo pinygi.” To moro wacho ni: “Ok gin Jokristo gadier nikech ok gitim kata nyasi mar Krismas.” Kae to moro ng’iyi kendo penji niya: “Donge in Janeno mar Jehova?” Ibiro dwoko nade?—

Dwarore ni itim ikruok chon mondo ibed gi dwoko maber kapok wach ma kamano otimoreni. Petro ne ok oikore. Kane okete kama diny, ne owacho miriambo!  Kata kamano, ne owinjo malit ahinya nikech gima notimono kendo Nyasaye nowene richono.

Anania, ma ne en achiel kuom jopuonjre machon mag Yesu, bende nowacho miriambo. En gi chiege ma ne iluongo ni Safira, to Nyasaye ne ok oweyonegi richogi. Safira nowinjore gi chwore ni giwach miriambo. We wane ane gimomiyo Nyasaye ne ok oweyo ne Anania gi Safira richogi.

Ndalo apar bang’ Yesu weyo jootene kendo dok ir Nyasaye e polo, nobatisi ji 3,000 Jerusalem. Ji mang’eny nowuok kuonde maboyo boyo mondo gitim Nyasi mar Pentekost, to bang’ bedo jopuonjre Yesu, ne gidwaro ni gibudh Jerusalem matin ka gipuonjore weche momedore e wi din margi manyien. Moko kuom jopuonjre Yesu notiyo gi pesagi giwegi mondo gikonygo jogo.

Anania gi chiege uso puothgi moro mondo giyud pesa mar konyo Jokristo manyien ma eka oa batisigo. Sama Anania kelo pesago ne joote, owacho ni pesa mokelogo e kar romb pesa duto ma ne ochule e puodhono. To mano ok en adier! Ne okano moko kuom pesago mondo otigo en owuon! Nyasaye fwenyo ne Petro wachni kendo Petro nyiso Anania niya: “Ok iseriambo ni dhano, to ni Nyasaye.” Gikanyono, Anania gore piny kendo otho! Bang’ seche adek kama, chiege donjo. Nikech ok ong’eyo gima otimore ne jaode, en bende owacho miriambo, kendo en be opodho piny kendo otho.

To mano kaka wayudo puonj kuom wachni: Wacho adiera en gimaduong’! Ee, waduto dwarore ni wapuonjre wacho adier! Kata kamano, waduto wajoboth, to moloyo sama pod watindo. Donge imor ni Jehova oheri kendo obiro weyoni richoni mana kaka ne oweyo ne Petro?— Kata ka en kamano, ng’e ni dwarore ni wabed jo adier. To kapo ni watimo richo maduong’ mar wacho miriambo, onego wakwa Nyasaye mondo owenwa, ee, wasaye mondo otimnwa kamano. Nyaka bed ni mano e kaka Petro notimo ma owene richone. Ka watimo kinda mondo wawe wacho miriambo chuth, Nyasaye biro weyonwa wan bende!