Grup moro mar joma ok oyie kuom Nyasaye noketo lendo moro e bath ndara ma ne wacho kama: “Be in achiel kuom joma ok oyie kuom Nyasaye? Ji tara gi tara chal kodi.” Paro ma jogo nigo nyiso ni ok gine gima digidwarne Nyasaye.

To komachielo, ji mang’eny ma wacho ni oyie kuom Nyasaye timo gik moko mana ka gima Nyasaye onge. Bisop maduong’ mar Jo-Katholik miluongo ni Salvatore Fisichella nowacho kama kuom Jo-Katholik wetene: “Ka ng’ato ong’iyo ngimawa, ok obi fwenyo ni wan Jokristo nimar onge gima nyiso pogruok e kindwa gi jo kafiri.”

Jomoko to odich ma kata thuolo mar manyo Nyasaye giongego. Gineno ni Nyasaye ni mabor kata ni chopo ire tek maonge gimoro amora malong’o monyalo konyogigo. Joma kamago manyo Nyasaye mana seche ma gin gi chandruok kata seche ma gidwaro gimoro—Nyasaye chalonegi mana misumba ma gichiko kaka gidwaro.

Jomoko to ok ne gima puonj din konyogo kendo ok giluw puonj mag kanisa ma gintie. Ranyisi achiel manyiso mano en nonro moro ma ne otim kuom Jo-Katholik modak e piny Jerman. Kuom ji 100, ji 76 nowacho ni onge gima rach ka dichwo gi dhako maok okendore odak kanyachiel—to mano en paro ma kanisagi ok riw lwedo kendo Muma be kwedo. (1 Jo Korintho 6:18; Jo Hibrania 13:4) Ok Jo-Katholik kende ema neno ni gik ma gitimo obalo gi puonj din margi. Jotend din mang’eny ywagore ni rombegi odak mana ka joma ok oyie kuom Nyasaye.

Ranyisi ma wawuoyoego miyo wapenjore kama: Ang’o momiyo dwarore ni Nyasaye ota ngimawa? Ma ok en wach ma wendo. Penjo ma kamano ne okwongo wuok e weche miwuoyoe e buk mokwongo mar Muma. Mondo mi wayud dwoko mar penjono, we wanon ane weche mogwaro ma yudore e bug Chakruok.