SUD MACHIEGNI GI NYASAYE
“Ne! Achueyo Gik Moko Duto Obed Manyien”
Be igombo bedo gi ngima maber kendo dak aming’a kaachiel gi joodi? Be igombo dak e piny maonge rem, chandruok, kata tho? Gombo ma kamago ok gin mana lek ma nono. Mopogore gi mano, piny manyien ma tim makare otakie nobedie nikech mano e dwaro mar Jehova Nyasaye. Ne ane kaka Nyasaye biro chopo singone kaluwore gi bug Fweny 21:3-5.—Som.
“Nyasaye noywe pi wang’ duto e wengegi.” (Fweny 21:4) Nyasaye noywe kit pi wang’ mage? Ok obi golo pi wang’ mawuok sama ng’ato mor ahinya kata ma lwoko wang’. Kit pi wang’ ma Nyasaye singo ni obiro golo gin ma wuok nikech chandruok kod kuyo. Nyasaye ok bi yweyo ayweya pi wang’ ma kamago; kar mano, obiro tieko gik ma miyo pi wang’-go wuok, ma tiende ni obiro tieko chandruok kod kuyo duto.
“Tho ok nobedie kendo.” (Fweny 21:4) Kuom gik moko duto mosemiyo waywak ka wachwero pi wang’ mang’eny, be nitie gima dilo tho? Jehova biro gonyo joma luwo chikene oa e twech mar tho. Obiro timo kamano e yo mane? Obiro timo kamano kuom golo gima kelo tho, ma en richo ma ne dhano oyudo koa kuom Adam. (Jo Rumi 5:12) Jehova biro miyo joma oluore obed makare kotiyo gi mich mar rawar mar Yesu. * Kendo jasikwa mogik ‘mibiro tiek’ en tho. (1 Jo Korintho 15:26) Joma tiyo ne Nyasaye biro dak e ngima ma ne Nyasaye dwaro a chon. Gibiro dak e ngima makare nyaka chieng’.
“Rem ok nobedie kendo.” (Fweny 21:4) En kit rem mane maok nobedie? Rem duto machando paro, chuny, kod del ok nobedie, kendo rem mosemiyo ji tara gi tara chandore biro rumo pep.
Kinde mokayo machiegnini, ngima nobed maonge ywak, tho, kod rem. Nyalo bedo ni ipenjori ni ‘gigi biro timore kanye’. ‘Dibed ni ngima mwawuoyoeni en ngima me polo?’ Ooyo. Ne ane gimomiyo ok en kamano. Mokwongo, ne ni ndikono wacho ni ‘kar dak mar Nyasaye ji ni go,’ to dhano odak e piny. (Fweny 21:3) Mar ariyo, singono wuoyo e wi piny ma “tho ok nobedie kendo”—tiende ni en piny ma yande tho nitie to koro tho ongee. Tho pok nobetie e polo nyaka nene, en mana e pinyka ema tho osebedoe kuom higni gi higni. Omiyo, nenore maler ni singo mar Nyasaye mar bedo gi ngima maber biro chopo mana e pinywa ka.
Nyasaye biro yweyo pi wang’ duto ma dhano osechwero nikech chandruok gi kuyo
Jehova dwaro ni wabed gi yie kuom singone mar kelo piny manyien ma tim makare ogundhoe. Mana bang’ lero singo mogundho mabirogo, Jehova wacho niya: “Neuru! Achueyo gik moko duto obed manyien.” Kae to omedo wacho niya: “Ndik wachno, nikech wechegi gin migeno, kendo gin adier.” (Fweny 21:5) Donge nyalo bedo maber ka in gi joodi upuonjoru kaka unyalo bedo jotich Nyasaye mabiro bedoe ka Nyasaye chopo singone mabeyogi?
Ndiko mochan mondo osom e dwe mar Desemba
1 Petro 1-5; 2 Petro 1-3; 1 Johana 1-5; 2 Johana 1-13; 3 Johana 1-14; Juda 1-25–Fweny 1-22
^ par. 5 Mondo ipuonjri weche momedore e wi misango mar rawar mar Kristo, ne sula mar 5 e buk miluongo ni Ang’o ma Muma Puonjo Kuom Adier? mogo gi Joneno mag Jehova.
