Par ane wuoro ma wuoyo gi wuode ma jahigni abiriyo. Owachone niya: “Chon, chon gilala, Nyasaye ne ochueyo piny gi gik moko duto manie iye, kendo ne ochueyo, chieng’, dwe, gi sulwe.” Wuodeno parore matin kae to openjo wuon-gi niya: “Ng’ano ma ne ochueyo Nyasaye?”

Wuon-gi dwoke niya: “Onge ng’ama ne ochueyo Nyasaye. Nyasaye osebedoe kuom kinde duto.” Gi kanyo, wuowino winjo ka dwokono orome. Kata kamano, kaka omedo dongo, wachno medo chande. Oparore ni ng’ato dibed ma onge chakne nade! Omiyo, openjore niya: ‘Ee, ka piny gi polo to nigi chakruokgi, kare Nyasaye to ne oa kanye?’

Muma dwoko penjono nade? Muma chiwo mana dwoko ma dwa chalore gi ma wuorono miyo wuode. Musa ne ondiko niya: ‘Ruoth, ka ne pok ogol gode madongo e i piny, kata ka pok nisechweyo lowo gi piny, in e Nyasaye ma nyaka nene kendo ma nyaka chieng’.’ (Zaburi 90:1, 2) Kamano bende e kaka janabi Isaya nowuoro kowacho niya: ‘Ok iseng’eyo? Ok isewinjo? Jehova, Jachuech kuonde duto me piny nyaka gikone e Nyasaye ma nyaka nene ma nyaka chieng’.’ (Isaiah 40:28) Barua mar Juda bende wacho ni Nyasaye en ma “nyaka nene.”—Juda 25.

Ndikogo nyisowa ni Jehova en “Ruoth mochwere” mana kaka jaote Paulo nondiko. (1 Timotheo 1:17) Mano nyiso ni Nyasaye osebedoe kinde duto moloyo kaka wanyalo paro. Kendo obiro siko nyaka chieng’. (Fweny 1:8) Kuom mano, bedo ni en Nyasaye mochwere kendo ma nyaka chieng’ en gima duong’ ahinya e bedone ng’at ma Nyalo Duto.

Ang’o momiyo mano ok en wach ma yotnwa winjo kore? Mano en nikech kaka dhano kwano ndalo opogore ahinya gi kaka Jehova kwano ndalo. Nikech Nyasaye en Nyasaye mochwere, higni aluf achiel chalne mana ka odiechieng’ achiel. (2 Petro 3:8) We wati ane gi ranyisi: Be ongogo kata odacho ma dak mana kuom odiechienge 50 bang’ bedo maduong’, nyalo winjo tiend dak kuom higni 70 kata 80 adier? Ok nyalre! To mano e kaka Muma wacho ni wachalo kopimwa gi Jachuechwa maduong’. Parone bende oyombo parowa. (Isaiah 40:22; 55:8, 9) Omiyo, ok en gima dikawwa gi wuoro ka nitie gik moko kuom Jehova ma dhano ok nyal ng’eyo.

Kata ka winjo tiend Nyasaye ma nyaka chieng’ en wach ma winjo kore ok yotnwa, pod wanyalo neno ni mano owinjorego adier. Kapo ni ng’at machielo e ma ne ochueyo Nyasaye, ng’atno e ma dine obedo Jachuech. To mana kaka Muma lero, Jehova e ma ‘nochueyo gik moko duto.’ (Fweny 4:11) E wi mano, wang’eyo ni nitie kinde ma piny gi polo ne onge. (Chakruok 1:1, 2) Piny gi polo ne oa kanye? Jachuech ne nyaka bedie mokwongo e ka chuegi. Bende, Jachuech ne nitiere ka pok ochueyo chuech moko mariek kaka Wuode ma miderma kod malaike. (Ayub 38:4, 7; Jo Kolosai 1:15) Omiyo, nenore maler ni Jachuech nyaka ne bedie mokwongo. Onge kaka ne inyalo chue Jachuech nikech onge gima ne nitie motelone ma ne inyalo tigo e chueye.

Bedo ni ne ochuewa kaachiel gi gik moko duto e piny gi polo nyiso ni nitie Nyasaye ma nyaka chieng’. Ng’at ma ne omiyo gik moko duto obedoe kendo ma ne oketo chike ma tayogi, nyaka ne bedie mokwongo. Mano nyiso ni en e ma ne omiyo gigo duto much ngima.—Ayub 33:4.