Kinde moko, wachno ne inyalo tigo kuom ng’ama oro. E kinde Muma, chwo moko ne iroyo kaka yor kum, kata sama omakgi kaka mabuse, kata ka oketgi bedo wasumbni. Chwo mogen ma ne osero, ne itiyogo e rito ute moyang ne mon e ute ruoth. Kuom ranyisi, Hegai kod Shaashgaz ma ne gin bwoch ne tiyo kaka jorit ma rito mond ruoth kod mon mamoko mag Ruodh Jo-Persia miluongo ni Ahasuerus, ma iparo ni en Xerxes Mokwongo.—Esther 2:3, 14.

Kata kamano, ok ji duto ma Muma luongo ni bwoch ne gin joma oro. Josomo moko wacho ni wachno bende ne itiyogo e yo malach kiwuoyo kuom jatich matiyo e od ruoth. Nenore ni Ebed-melek ma ne otiyo gi Yeremia ne en bwoch e yo machalo kamano, kaachiel kod Ja-Ethiopia ma ne Filipo olendone. Nenore maler ni Ebed-melek ne nigi migawo maduong’ ahinya e od ruoth, nikech ne onyalo dhi achiel kachiel ir Ruoth Zedekia. (Yeremia 38:7, 8) To Muma bende wacho ni Ja-Ethiopia ma ne onwang’o ‘dhi Jerusalem mondo olem,’ ne en jarit mwandu duto mag ruoth.—Tich Joote 8:27.

Kane Yesu wuoyo kuom kinde ma ne idhi ng’adie bura, nowacho kama: “Ka Wuod dhano obiro e duong’ne, . . . eka obiro pogo ji koketogi e kidienje ariyo mana kaka jakwath pogo rombe gi diek.” (Mathayo 25:31, 32) Ang’o momiyo jakwath ne pogo rombe gi diek?

Pile, rombe kod diek ne iweyo mondo gikwa kanyachiel godiechieng’. To gotieno ne ichokogi e kul moger mondo ­oritgi kuom koyo, le mag bungu, kata jokuoye. (Chakruok 30:32, 33; 31:38-40) Kweth ariyogo ne iketo e kul mopogore opogore, mondo diek machach kik hiny rombe, to moloyo ma mon kod matindo. Buk miluongo ni All Things in the Bible wacho ni jokwath bende ne pogo rombe gi diek sama “ginyuol, sama inyiedhogi, kod sama ilielogi.” Omiyo, Yesu notiyo gi ranyisi mawuoyo kuom timbe ma jowinjone ma nodak e alwora ma ji kwayoe jamni e Israel machon, nong’eyo.