WACH MADUONG’ MA GASET WUOYOE | JONENO MAG JEHOVA GIN JOMAGE?
Ang’o Momiyo Walandoga Wach Nyasaye?
Nyalo bedo ni tijwa mar lando wach Nyasaye ot ka ot, lendo kuonde ma ji ng’enyie, kachiel gi lendo kamoro amora ma ji yudoree emomiyo ji nyalo pogowa mayot gi dinde mamoko. Ang’o momiyo walendo kamano?
Joneno mag Jehova lendo mondo gipak Nyasaye kendo miyo nyinge ong’ere. (Jo-Hibrania 13:15) Bende, watimo kamano mondo waluw chik ma Yesu Kristo nochiwo kowacho kama: ‘Kuom mano, dhiuru ulok ji obed jopuonjrena, kupuonjogi rito weche duto ma asechikou.’—Mathayo 28:19, 20.
E wi mano, wahero jowetewa bende. (Mathayo 22:39) Wang’eyo ni ji mang’eny ni giyie maggi, kendo ni ok ji duto ma biro rwako wach ma walandonegi. Kata kamano, pod waneno ni puonj mag Muma nyalo reso ngima ji. Mano emomiyo wadhi nyime “puonjo kendo lando wach maber e wi Kristo,” mana kaka Jokristo mokwongo notimo.—Tich Joote 5:41, 42.
Jasomo moro miluongo ni Antonio Cova Maduro nondiko e wi “kinda kod sinani ma Joneno mag Jehova timoga, nyaka chop kama giol . . . , to mana mondo wach Nyasaye ochop e piny ngima.”—Gaset mar El Universal, mar piny Venezuela
Ji mang’eny masomoga bugewa ok gin Joneno mag Jehova. Kendo ji milionde ma puonjre Muma kaachiel kodwa nie dinde mamoko. Kata kamano, gimor ni Joneno mag Jehova pod limogiga.
En adier ni inyalo bedo gi penjo mamoko e wi Joneno mag Jehova. Wakwayi ni imany dwoko mag penjo moro amora ma in-go kuom
-
Penjo achiel kuom Joneno mag Jehova.
-
Dhi e websaitwa mar www.mt1130.com/luo.
-
Dhi e chokruogewa ma wagweloe ji duto, kendo onge pesa moro amora mibiro chulo.
Samoro Inyalo Hero Magi Bende
PENJO MA JI JOPENJO
Be Joneno mag Jehova Wacho ni Gin Kendgi ema Gibiro Yudo Ngima?
Muma nyisowa joma biro yudo ngima.
PENJO MA JI JOPENJO
Be Joneno mag Jehova Ok Ochayo Dinde Mamoko?
Puonjri kaka miyo jomoko luor fwenyo Jokristo madier.
